CHAPITRE LXXXIII

Comment ma dame et damp Ahbez avec leurs gens sont demeurez.

QUANT ma dame se fut atournée, et que toutes eurent assez plouré, et que damp Abbez fut desarmé, fut le sur- 'gien mandé ; là veissiez pleurs et soupirs, et mauldire leurs vies quant oncques s'estoient là arrivez. Damp Abbez, qui ne povoit parler, fut devestu et couchié, et puis convint ma dame despartir et laisser son amy. Et qui pour ce ouyst ses pleurs, plains et gemissemens à cause de damp Abbez, il sembloit que tous ses prouchains parens et amys fussent mors. Ses femmes disoient : « Ha! ma dame, nous n'en pensasmes oncques moins, quant nous le vismes arriver, et que meschief n'en advenist de tant charger l'onneur des gentilzhommes. — Voyre, dist l'aultre, et de l'avoir ainsi traictié et blecié ; et à ce est bien fait. — Ne vous chault, dist ma dame, il en sera bien vengié, mais qu'il en soit guery ; aussi qu'il m'a voulu batre et m'a villainée,

puis ma sainture emporté, comme meurdrier et larron qu'il est. » Et à tant laisseray cy à parler de ma dame et de la guerison de damp Abbez, qui par l'espace de deux mois s'estoient donnez du bon temps ensemble, meilleur que jamaiz n'avoient eu par avant, et en fut dure la départie.