CHAPITRE XI

Comment le petit Saintré s acoustra honnestement , comme la dame luy avait commandé : puis comment la dicte le trouva es galeries ; le faisant ve?i!r en sa chambre, et l' interrogant de la devise qu'il portait, et tout à cause, affin que ses damoiselles ?ie sceussent de ses amours; et luy bailla encores soixante escuz en une bourse.

L'acteur encores. — Le petit Saintré, quand il fut bien loing de la chambre, se tira à un costé et regarda de çà et de là, se nul ne le veoit. Lors tira sa bourse de sa manche, et la desveloppa et regarda ; et quant il la veit si belle, et les douze escuz dedans, n'est pas à douter s'il en fut content. Lors commença en son cueur la joye telle qu'il ne pensoit pas estre moins riche que le roy. Mais pour donner fin aux commandemens de ma dame, et pour estre dimanche ainsi joly, fist en son cueur mains petis pensemens joyeulx. Lors s'en va à Perrin de Selle, qui tailleur du roy estoit, et luy dit : « Perrin, mon amy, pour combien aurois je, dimenche prochain, ung pourpoint pour

moy, tout fait, qui fust de damas bien cramoisy? » Perrin, qui l'advisa ung petit, prit sa mesure, puis luy dist : « Avez vous de l'argent? — Ouy, Perrin, mais qu'il ne me fust pas trop chier. » Et lors Perrin, pour ce qu'il estoit à tous si gracieux, luy dist : « Mon filz Saintré, sur ma foy, je ne puis à moins de six escuz, mais il sera du plus fin. » Adonc Saintré, comme jeune et voulentiers, mect la main à la bource et lui bailla les six escuz. Et quant il eut son pourpoint paie, lors s'en va à Jehan de Buffes qui de chausses servoit le roy, fîst marché que deux paires de chausses luy cousteroient, l'une parmy l'autre, deux escuz, qu'il paya tantost. Puis vint à François de Nantes, brodeur du roy, et lui monstra la bourse pour broder, ainsi que ma dame l'avoit devisé, dont le marché fust à deux escuz ; et par ainsi ne luy restoient plus que deux escuz. Lors s'en va à une bourgeoyse de Paris, à qui le seigneur de Saintré son père l'avoit plusieurs fois recommandé, et lui dist : « Marie de Lisle, ma bonne mère, aurois je bien deux paires de fins draps linges pour ung escu? — Ouy bien, dist Marie. — Ma mère, veez le cy, et faictes que dimenche je puisse porter les ungs. » Lors de son seing tira la bourse, ainsi enveloppée, et luy monstra les deux escuz. « Et mon filz, dist elle, qui les vous a donnés? — Certes, dist il, ma dame ma

mère m'en a envoyé douze, et vous prie que l'ung soit employé en linges, et l'autre, avecques la boursette, me soit gardé. » Et quant Marie vit la belle boursette, si en fut moult aise pour l'amour de luy, et dist : « Dieu doint bonne vie à ma dame, qui ainsi pense de son filz ! » Puis luy dit : « Et où sont les aultres dix escuz ? — Ma mère, dist il, ilz sont jà employez. — Helas! mon fils, dist elle, je croy que les avez jà perdus, ou très mal employez. — Ma mère, dist il, non ay vrayement, et dimenche vous le verrez. » Et ainsi passa toute celle sepmaine jusques au dimenche au matin, qu'en la chambre de Jacques Martel, premier escuyer de l'escuyrie du roy, où le petit Saintré et les autres paiges du roy dormoient, vindrent ledit Perrin de Solles, tailleur du roy, Jehan de Buffe, chaussetier, François de Nantes, brodeur, et Guillaume Soldan, cordonnier, tous du roy, qui portoient l'ung le pourpoint, l'autre les chausses brodées, soulliers et patins tout à un coup. Et quant Jacques Martel sceut qu'ilz estoient à l'huys de sa chambre assemblez, leur fist ouvrir; et quant ilz furent entrez ens, et il leur veit porter ces choses, leur demanda pour qui c'estoit. Nostre maistre, dirent ilz, c'est pour nostre maistre le petit Saintré ; nous sommes tous à luy. Alors Jacques se tourna vers le petit Saintré, et en riant luy dist : « Je

LE PETIT JEHAN DE SAINTRÉ Tj

croy, Saintré, que vous avez à voz recepveurs compté. — Nostre maistre, dist il, c'est ma dame ma mère qui y a doncques compté ; car elle m'a envoyé de l'argent pour moy esbanoyer et pour mes nécessitez, et me semble que d'argent n'ay je mye grandemment à faire» fors pour moy honnestement habiller. — Et vraye^ ment, dist l'escuyer, je vous aymoye bien paravant, mais encores vous ayme je assez mieulx. » Lors se tourna vers les autres gentilz hommes paiges, et leur dit : « Ha ! très mauvais garçons, vous ne feriez empiece ainsi ? Ains les yriez plutost despendre en jeux de dez par cabaretz et par tavernes, et en aultres deshonnestes lieux; si vous en ay je bien batuz pour en estre chastiez. » Et lors il dist aux maistres : « Or sus habillez le moy tost, et le me faictes bien joly. » Et quant il fut du tout habillé, le petit Saintré, qui desjà avoit tout payé, donna aux compaignons la moitié d'ung escuet l'autre moitié aux varlets de l'escuyer, qui jà assez plus que nul des autres paiges l'aymoient, pour ce qu'il leur donnoit de ses despouilles voulentiers. Et quant l'escuyer et tous furent habillez, après luy s'en vont à la messe; puis en la chambre de parement, actendre le roy ; mais ce n'estoit pas sans grans envyes, ne sans grans raisonnemens que les autres paiges sur luy avoient. Et quant le roy saillit de sa chambre,

et veit le petit Saintré ainsi habillé, il se print à rire, et demanda à l'escuyer dont ce venoit qu'il estoit ainsi joly devenu. « Sire, dist il, je fus huy matin très esmerveillé, quant Perrin de Solle, Jehan de Buffe, François de Nantes, Guillaume Soldan et leurs varletz vindrent en ma chambre apporter ses habillemens ; je cuyday bien estre prins. » Lors le roy et tous les seigneurs qui avec luy venoient, commencèrent fort à le louer ; puis dist le roy : « Je vouldroye qu'il eust plus trois ou quatre de mes ans, il seroit mon varlet tranchant. » Et à ces parolles, le roy entra en sa chapelle, et la royne qui venoit après luy. Et quant les messes furent dictes, au retourner qu'ilz firent, ma dame veit le petit Saintré ung petit loing, ainsi gracieusement habillé. Lors en allant s'avança, et dist à la royne : « Hée! ma dame, veez cy le petit et gentil garson Saintré, comment il est joly! — Ha ! dict la royne, Belle Cousine, vous dictes vérité, et vrayement il le faict bon veoir. » Lors entrèrent en la grant salle pour disner. Ma dame, à qui ses yeul.x ne cessoient de le regarder, pour plus couvertement le veoir et povoir à luy parler, appella les aultres dames, et leur dist : « Voulons nous veoir quelz devises en chausses porte le petit Saintré? Et n'a pas Dieu bon temps, dit elle, quant telz gens veulent devises porter et contrefaire l'amoureux. — Hée !

LE PKTlT JEHAN DE SAINTRÉ ^^

ma dame, il Iriy part de bonne voulenté. * Lors dist l'une : « Hée ! pour Dieu, ma dame, voyons que c'est. » Et l'autre dist : « Ma dame, déportons nous en. » Et lors ma dame et elles vers une des fenestres se retrahyrent, puis le firent à elles venir ; si luy dist ma dame, tout ainsi que s'elle n'en sçavoit riens : « Çà ! maistre, çà ! nous voulons sçavoir et veoir quelle devise est que vous portez en voz chausses ? » Alors le petit Samtré, qui à genoulx estoit, se fist aucunement prier. « Certes, dirent elles, nous le verrons, et faisons test, car le roy veult disner. » Lors l'une prent le bras, l'autre le prent par l'espaule, les aultres parmy le corps, tant que sur piez le font lever ; lors madame et toutes les aultres dames qui là estoient, et plusieurs qui n'y furent pas appellées, ces belles devises virent, dont il fut très loué ; mais du grant plaisir que ma dame en print, son cueur et son corps en fut tout rassasié. Et quant les tables furent levées et les Grâces dictes, pour abréger, lors tabours et menestriers commencèrent à bien corner, et les cueurs joyeux commencèrent à dancer, puis à chanter, tant que le roy, pour soy retraire, demanda les espices et vin de congié. Et endemantiers qu'ilz dançoient, le petit Saintré les yeulx de ma dame ne cessoient de regarder, tant dançoit et chantoit bien. Lors elle s'appensa qu'elle vou-

8o LE PETIT JEHAN DE SAINTRÉ

loit veoir plus à loisir sa devise et à luy parler, car tant plus elle le regardoit, et tant plus il luy plaisoit ; car en la cour n'avoit cellu}' ne celle qui ne le jugeast une fois estre homme de bien. Dont, endemantiers qu'il portoit la tasse ou vin de congié, ma dame en passant luy dist : « Faictes comme l'aultre jour, petit Saintré. » Laquelle parole il entendit bien. Si ne tarda gueres que le roy se retrahit, et que la royne à dormir se mist. Lors ma dame s'en vint en sa chambre, si trouva le petit Saintré aux galleries, comme elle luy avoit dist. Si luy dist, comme demy esbahye : « Hé ! maistre, vous estes moult joly, si marchez devant, vous vous estes fouy cinq ou six jours, il faut compter à vous. » Puis se tourna à ses femmes, et leur dist : « Il nous fault veoir les devises de ce garson, et sçaurons, se nous povons, dont il les a, et que c'est? je ne puis croire qu'il ait le sens, ne l'entendement d'estre amoureux. » Et en devisant ces choses, elle fut en sa chambre ; lors donna à tous congié, fors que à luy, puis list clore la porte. Et là, au meilleu de toutes, voult ma dame ses devises bien regarder, puis luy dist : « Ha ! maistre, maistre, vous dictes que n'avez point de dame, et vous vous faictes si joly. — Ma dame, dist il, c'est. Dieu merci, ma dame ma mère qui m'a fait ainsi joly. — Et comment, -dist ma dame, vous a elle fait si

tE PETIT JEHAN DE SAINTRÉ

joly? elle qui est en Touraine, et croy que jamais ne fut icy. — Ma dame, dit il, douze escuz qu'elle m'a envoyés en une belle boursette d'or et de soye m'ont fait ainsi joly. — Et vrayement,- dist ma dame, il nous faut veoir ceste boursette, et sçavoir où sont ces douze escuz allez ; et s'ilz ne sont bien employez, je luy escripray qu'elle ne vous en envoyé plus. » Lors le petit Saintré traict du seing la boursette enveloppée d'un fin petit coeuvrechief, et ma dame, qui bien assurée estoit que nulle de ses femmes ne la congnoistroit, prent la boursette, et devant toutes la regarde, comme se jamais veue ne l'eust ; et puis regarda les devises de ses chausses et celles de la boursette, et vit que toutes estoient semblables ; lors luy dit : « Or çà, maistre, tout premier, que vous cousta ce pourpoint ? — Ma dame, tout ainsi fait, j'en ay payé à Perrin de SoUes six escuz. — Et les chausses, dit ma dame, qui les a faictes, et que vous ont elles cousté ? — Ma dame, dist il, ces chausses d'escarlate, et unes aultres de brunette fine de sainct Lo, m'ont cousté deux escuz à Jehan de Buffe, et la brodeure de ces chausses m'a cousté de François de Nantes aultres deux escuz. — Et qu'avez vous fait des aultres deux? — Ma dame, de l'ung avec trois sols j'en ay eu deux paires de fins draps linges, et des xx sols j'en ay eu trois

tE PETIT JEHAN DE SAINTRÉ

paires de souillers et trois paires de patins, et le surplus donné pour le vin aux compaignons des maistres ouvriers et aux varletz de nostre maistre l'escuyer. » Ma dame, qui de tout ce fut bien aise, et voit que sa gracieuseté devers les maistres ouvriers luy a aydié, aussi la largesse bien employée, dit en riant à ses femmes : « Il en a la moitié cabassé. — Par ma foy, ma dame, dit il, sauf vostre grâce, il ne m'en est demouré denier. » Et lors dit ma dame: «A ce coup sçauray je qui est vostre dame? Or ça, venez parler à moi. — Ha! ma dame, dirent elles, ha ! par Dieu ! vous luy donnez trop à souffrir pour sçavoir de luy tant de choses. — Ne vous chaille, dist ma dame, tirez vous toutes arrière, car je le vueil sçavoir. » Et quant toutes furent arrière, ma dame luy dit : « Or ça, mon amy, jusques ici je suis bien contente de vous ; pensez tousjours de bien faire, car vous n'en vauldrez que mieulx ; entre toutes choses vous commande que tant soit il vostre amy, qu'il ne saiche rien de noz faictz. — Non sera il, ma dame, car par ma foy je aymerois mieux mourir. — Or ça, mon amy, je vueil que vous a3'ez deux aultres robbes, dont l'une sera de fine brunette de sainct Lo, qui sera fourrée de martres, et l'autre sera d'ung fin gris de Montevillier, qui sera doublée d'ung fin blanchet, pour vestir à tous les jours, fors quant vous

chevaucherez après monseigneur le roy. Et si aurez deux chapperons, l'ung d'escarlate, l'aultre noir ; et si aurez encores ung pourpoint de satin bleu, et deux aultres paires de fines chausses, coeuvrechiefs, chemises, patins et aultres choses nécessaires. Aussi que vous jouez et esbatez de fois à fois à la paulme, avoir des arcs et flesches qui sont jeuz honnestes, et dont les corps par raison en vallent mieulx. Et pour ce faire et vous entretenir, je vous donray soixante escuz, et verray comment vous vous gouvernerez ; car encores n'avez point de varlet ; pour ce vueil je qu'à Gillet, qui est bon et loyal serviteur de l'escuyer, vous donnez tous les mois huit solz de pension, et qu'il preigne bien garde à voz robbes, chausses et habillemens ; et se bien et honnestement vous gouvernez, vous aurez collier et chaisne, ceintures de Bahaigne, robbe de damas et aultres biens assez ; mais que soyez loyal, secret et homme de bien. — Ma dame, dist il, si seray je, se à Dieu plaist. — Or, mon amy, entendez à raoy : De quelconques menasses, parolles rigoureuses que devant mes femmes, ne ailleurs, je vous dye, vous ne soyez mal content. — Non seray je, ma dame, puisqu'il vous plaist, ne vous esmayez de riens. » Lors ma dame, devant ses damoyselles, et comme de luy très mal contente, devant ses femmes le tança, puis en sa garde robe ouvrit

l'escrinet, en une boursette de soye mect Ix escuz, lors revient, et l'appella : « Çà, maistre, çà, estes vous encores à deviser, et ne vous fierez vous point en moy? et se à moy ne le voulez dire, dictes le à dame Jehanne, ou à dame Katherine, ou à Ysabel, ou à qui mieulx vous plaira. — Et que vous dirois je, ma dame, quant je n'en ay point? — Et vous portez devises et lectres entrelacées, sire morveux que vous estes, et faictes de l'amoureux? — Ma dame, sur ma foy, je vous ay dit celle que j'ayme mieulx en ce monde, et qui me fait porter ces devises. — Ha 1 maistre, maistre, vous nous cuydez abuser que ce soit vostre mère ; je croy bien que vous aymez vostre mère, et que c'est celle qui vous entretient, mais ce n'est pas celle pour qui vous portez caste devise ; or çà, venez à moy, je me suis appensée d'une aultre que je n'ay pas nommée. » Lors l'appella à part, et luy dist : « Tenez ceste boursette, gardez bien que ne la perdiez, il y a soixante escuz dedans ; or verray bien comment vous vous gouvernerez ; et si vueil que vous ne veniez plus aux galleries à l'heure que je y doy passer, ne que trop souvent devant moi vous ne arrestiez , mais quant vous me verrez, que d'une espingle je purgeray mes dens, ce sera signe que je vouldray parler à vous, et lors frotterez vostre droit oeil, et par ce congnoistray que

LE PETir JEHAN DE SAINTRÉ 85

VOUS m'entendez, et à celle foys y viendrez. Or, avez vous bien entendu ce que je vous ay dit ? — Oy, ma dame, très bien. — Or, pensez doncques de bien faire, si vous aymeray ; et quant je verray que bien vous gouvernerez, alors je vous tiendray pour mon amy, et vous feray très bien joly. — Ma dame, dist il, si feray je, se à Dieu plaist. — Or, vous en allez, je vueil dormir, et de chose que je vous tance, die et rabroue devant les gens, comme je vous ay dit, ne vous esbahyssez de riens. »