CHAPITRE XIX

Comment le petit Saintré remercya ma dame, puis fist faire le bracelet comtne elle luy avoit commandé , et puis vmt à elle, et luy monstra; dont elle fut bien joyeuse.

L'acteur. — Lors Saintré à genoulx se met et dist : « Ma très redoubtée dame, ma déesse et mon seul bien, si très humblement que je sçay et puis, du tout vous remercie ; et quant aux armes que me ordonnez, Dieu avant, nostre dame et monseigneur sainct Michel l'ange, oncques de choses, après vostre grâce et amour, je ne fuz si content ; car vous orrez, au plaisir de Dieu, nouvelles telles que, vous et messeigneurs, tous serez contens. » Lors print congié d'elle et par ung amoureux baiser,

dix, quinze ou vingt rendus, et : « à Dieu soyez. »

L'acteur. — Saintré, sur ce nouvel pensement, fut toute celle nuji;. Et quant le jour fut venu et qu'il eut messe ouye, lors fist à soy venir Gilbert Lorin, orfèvre du roy, qui renom de preudhomme avoit, et à part lui dist : « Gilbert, mon amy, je vouldroye ung bracelet d'or esmaillé de mes couleurs et à ma devise, et brodé aux deux lez de deux diamans, six rubis et six perles que veez cy. » Lors les monstra à Gilbert, qui moult lui pleurent ; et, pour abréger, en deux jours le bracelet fut faict.Et quant Saintré fut en la présence de ma dame, il frota son dextre oeil, pour le signe qui estoit entre eulx, auquel ma dame de son espingle respondit ; et quant ilz furent ce soir au preau pour deviser, Saintré lui monstra le bracelet à la clarté de la lune; mais bien veoir ne se pouvoit. Ma dame luy dist : « Je le verrai à la torche, et aussi demain, puis le vous rendrai demain au soir, quant revendrons cy ensemble et à noz plaisirs deviserons. »

Il8 LE PETIT JEHAN DE SAINTRÉ