CHAPITRE XXIV
Comment la dame advertit la royne que Saintré estait merveilleusement bien acoustré de coursiers et aultres choses ; parquoy ladicte royne dist a Saintré qu'il fi st admener ses chevaulx en la gallerie , pour les voir, ce qu'il fist. Et comment le roy et la royne les virent, qui moxilt le prisèrent.
L'acteur. — Lendemain au matin, à l'atourner de la royne, ma dame n'eust pas mis en oubly la veue de ses beaulx paremens ; si dist à la royne tout bellement : * Ma dame, j'ay ouy dire que ce jeune filz Saintré a fait faire très beaulx paremens à merveilles ; vrayement je ne le puis croire ; toutefois, ma dame, se c'est vostre bon plaisir, que vous les voyez? et entre nous femmes sans plus, car j'entens qu'il les tient bien serrez ; et quant vous l'en prierez, il le fera très voulentiers. — Dictes vous. Belle Cousine, qu'ilz sont si beaulx, selon ce que on dit? — Ma dame, encore plus beaulx, que je ne vous sçauroye dire. — Alors, dit la royne, se nous ne sommes
LE PtTir JEHAN DE SAINTRE I3I
esconduyttes, nous les verrons, ma dame, et sçaurons que c'est pour ce qu'il les tient si cellées. — Dictes luy qu'il face venir ses quatre destriers cy bas en la petite court, et face porter les paremens couverts, lesquelz seront là mis dessus, et vous ferez les portes clore et bien garder. — Ha! par ma foy, dist la royne, vous dictes très bien ; faictes m'en souvenir quant le verrez. » Et ces parolles fînées, la royne va à la messe, et en la chambre de parement vit Saintré qui là estoit. Lors ma dame s'avança, et dist bellement à la royne : « Ma dame, veez là Saintré. » Lors la royne appella Guillaume de Lins, son huyssier d'armes, et fit appeller Saintré : « Saintré, se Dieu vous doint joye, dist la royne, de la chose que plus desirez, nous vous prions que puissions veoir voz paremens d'armes sur voz destriers, qu'on dit qui sont si beaulx. — Eh ! ma dame, dist il, saulve l'honneur des diseurs, ce ne sont que paremens à simples compagnons ; ce seroit à moy honte que vous veissiez si povre chose. — Et, beau sire, telz qu'ilz sont, nous vous prions que les veons en ceste basse court après disner, et nous ferons clorre et bien garder les portes ; et pour le faire plus celement, se vous voulez, faictes porter voz paremens couvers par voz gens ; et puis faictes venir tous voz destriers ; et quant ils seront couvers, faictes nous secrètement
appeller. — Ma dame, puis que ainsi vous plaist, dit Saintré, voz prières me sont entiers commandemens. »
L'acteur. — Après que le roy et la royne eurent disné, et que les tables furent levées, Saintré manda quérir ses paremens et puis les destriers. Les portes furent closes ainsi que ordonné estoit, et puis les paremens mis sur les destriers. Alors Saintré s'en va à la ro3'ne, ainsi qu'elle avoit dict. Lors la royne, hastée de ma dame et du désir qu'elle en avoit, ne se peut tenir que au roy ne dist la venue des destriers couvers. « Et comment, dist le roy, sont ilz si beaulx ? — Monseigneur, vous les verrez, se vous plaist. — Ouy, vrayement, dist le roy, faisons venir le vin de congié. — Ah I monseigneur, dist la royne, que gueres de gens n'y soient. » Après le vin de congié, le roy et la royne se partirent, et de dessus les galleries virent les destriers couvers, qui leur semblèrent très riches et très beaulx. Lors toutes dames et damoiselles commencèrent à louer Saintré, et à faire veuz et prières que Dieu luy donnast grâce de à grant honneur retourner. Et quant le roy se voulut retraire appella Saintré, et en devisant de plusieurs choses, il fut entré en sa chambre, puis s'en va en sa garde robbe ; et ne tarda guère que par Jehan de Seuffle, son varlet de chambre, luy envoya, en trois saichetz,
trois mille escus, pour employer aux affaires de ses armes. Et quant la royne entend que le roi lui a donné trois mille escus, elle en fut très joyeuse. Lors appella ma dame, et luy dist : «. Belle Cousine, je suis très joyeuse de ce que monseigneur a donné à Saintré trois mille escuz pour employer à son voyage; vrayement, dist elle, moins de mille ne luy en puis je donner, et je vous prie que luy en donnez deux ou trois cens. — Ha ! ma dame, dist ma dame à la royne, vous taillez larges courroies d'autruy cuyr. » Et à ce faire se fit moult prier. Et quant messeigneurs d'Anjou, de Berry et de Bourgoigne sceurent ce que le roy luy avoit donné et la royne, chascun d'eulx luy en donna mille. Ainsi furent sept mille qu'il eust, sans les autres dons que plusieurs aultres seigneurs luy firent. Et en vérité il n'en enquist, ne fit enquérir oncques deniers, dont il fut assez plus prisé, et disoit on : « Nous devons nous bien ayder à un tel jeune escuyer, qui n'est encores que ung enfant, et de la bonté de son cueur entreprend tant de vaillance ; en vérité, il se doit bien aymer. »
