CHAPITRE XXVI
Comment Saintré fut au preau prendre congiè de la dame, qtii l'advertit de rechief de iotis ses affaires ; et comment en la fin prindrent congié , non pas sans gecter grosses larmes d'une part et d'autre.
L'acteur encores. — Et quant les dix, les douze et les quatorze jours du moys furent venus, ma dame, pour les très grands et angoisseux regretz que elle avoit en luy, tous les jours faisoit son signal de l'espingle, auquel il respondoit. Et quant ilz estoient au preau assemblés, dont pour le très brief parlement estoient maints durs soupirs et maintes larmes gectées, lors ma dame luy dist : « Mon seul bien, et tout tant que je puis dire, monseigneur le roy vous a donné trois mille escuz, ma dame mille, messeigneurs mes beaulx oncles chascun mille, qui sont sept mille, sans le surplus des autres seigneurs. Et pour ce qu'on ne scetdesavantures,je vous en donray trois mille, qui seront dix mille ; desquelz, sans trop grans
excès, ne prodigues despenses, en pourrez longuement bonne despence maintenir. D'une chose vous prie, que à la fin de vostre messe, chascun jour, vous estant à genoulx, vostre prebstre, après ce que il aura donné la generalle beneysson que nostre Seigneur dist à Moyse de sa propre bouche, si comme est contenu en la Bible, ainsi que devant vous ay dit, que pour la vous ramentevoir encores die : Benedicat tibi Dominus, et custodiat te. Ostendat faciem suam tibi, et misereatur fui. Convertat Dominus vultum S7itim ad te, et det tibi pacem. Laquelle beneysson encores vous prie que, sur le point de desmarcher pour faire voz armes, soit à pié, soit à cheval, vous mesme de bon cueur, en faisant le signe de la croix, faictes en disant : Benedicat michi Dominus, et custodiat me. Ostendat tnichi faciem suam Dominus, et misereatur met. Convertat Dominus vultum sutim ad me, et det michi pacem. Et lors partez seurement, et faictes vertueusement ce que devez faire, car par ainsi ne pourrez faire chose, gaigne ou perte, que tout ne vous soit à honneur; et en adviengne ce qu'il pourra, car jamais ne vous fauldray. » Et à ces parolles, la source des larmes de son cueur saillirent de ses yeulx tellement que sa langue cessa pour leur donner paix.
L'acteur. — Et quant Saintré, qui jà, par les grans biens et honneurs que ma dame luy
138 LE PETIT JtHAN DE SAINTRÉ
avoit tant fais, à laquelle il se tenoit sur tous les aultres amans du monde le plus eureux, et tant plus, quant tous les jours de bien en mieulx renouvelloient les biens, les honneurs et les très nobles et chevaleureux records qu'elle luy faisoit, à très grant destresse de son cueur liii dist : « Ha ! maistresse haulte et souveraine déesse sans per, vous qui me deveriez reconforter du très desplaisant dueil que mon cueur a, à cause du départir de vous qui estes mon seul désir, mon seul plaisir et mon bien souverain, et je voy ores que vostre dueil, allié du mien, ont tant assailiy et combatu mon cueur, qu'ilz l'ont vaincu et navré à mort ; et par ainsi je m'en vois ailleurs mourir, et ma dame à Dieu soyez. » Et à ces paroles il tourna ses espauUes pour soy partir.
L'acteur. — Ma dame, à qui le ruyssel de ses larmes estoit presque vuidé, oyant les paroles de Saintré, par ung très merveilleux souspir meslé de sa paroUe, luy dist : « Hé ! mon amy, revenez se vous voulez, vous savez que nous femmes avons les cueurs tendres et piteux aux choses qui sont par nous aymées, si ne vous soit en desplaisir, car je suis toute reconfortée, espérant que Dieu vous ramènera à très grant joye. Or, mon très loyal amy, or, mon bien, or, ma pensée, or, le .trésor de ma vie et de ma mort, faictes bonne chiere, allez
joyeusement ; car, sur ma foy, pour l'amour de vous, je me tiendray joyeuse et lie; et de voz nouvelles gardez bien que vous ne m'escripvez sur tant que avez ma vie chiere, mais bien à plain à ma dame en escripvez, et de là sans nul danger je sçauray tout à plain ; et sur ce, mon amy, nous fault baisier. » Et là furent donnez baisiers, et baisiers rendus sans compte et sans mesure, tous acompaignez de piteux souspirs. Et tant furent en ce doloreux plaisir et en celle desconfortée joye, que la minuyt sonna, dont furent tout esbahys. Et alors convint que le très doloreux départir se fist. Et au prendre congié, ma dame, le baisant, en l'ung de ses doigtz un très bel et riche dyamant luy mist ; et « à Dieu soyez ! »
