CHAPITRE XXVIII
Comment, après que Sainiré eut prins congiè des barons et seigneurs de la court du roy, s'en alla disner avecques ses compaignons, ausquelz comme il disnoit, la royne luy efivoya ung très fin drap d'argent, et plusieurs seigneurs aultres dons et largesses ; et comment a sa despartie se fit conduire par les heraulx, trompettes et joueurs d'i)tstrumens, et leur donna à soupper au Bourg la Royne, où il logea.
L'acteur sur le partement de sain- TRÉ. — Et quant Saintré eut prins congié des dames à l'hostel, il va prendre congié de mesdits seigneurs qui très bonnes parolles chascun luy dist. Et lors s'en va atout
sa compaignie en son hostel disner. Et endementiers qu'ilz disnoient, la royne luy envoya une pièce d'ung très fin drap d'argent ; monseigneur d'Anjou luy envoya ung très bel courcier très bien en point ; et monseigneur de Berry, ung biau mantel et cinq cens doz de fines martres sebelines ; et monseigneur de Bourgongne, cinquante mars de vaisselle. Et n'y eut celluy, ne ceulx qui firent les presens, à qui il ne donnast cent escuz pour l'honneur et amour de ma dame la royne et desditz seigneurs. Et quant ilz eurent disnez, tous montèrent à cheval, là furent chevaliers et escuyers de la court du roy, de la royne et de mesdits seigneurs, et plusieurs aultres, au nombre d'environ mille chevaulx, touz venus pour le convoyer. Lors il fait partir tous les premiers, ses deux fourriers, ses queux et son chapellain, quatre trompettes portans les banieres de ses armes et puis ses troys heraulx ; et après ses trois chevaliers et neuf escuyers, deux à deux et tous leurs gens après, vestuz de sa livrée ; ses cinq sommiers, couvers de tappis à ses armes, menés par deux varlets à pié, et puis ses tabourins ; et après ses quatre destriers, couvers de paremens de fin taffetas de Florence, gris, vert et violet, à grans lectres d'argent à sa devise, et sur leurs testes chascun ung très bel champffrain d'acier bien garny de très
belles plumes d'autrusse faictes de broderies et bien emplies de branlans d'argent ; et dessus les destriers quatre très gents paiges, vestuz de sa devise, toutes les manches chargées de branslans d'argent, et sur leurs chiefs chascun ung très bel chappel de plumes à ses couleurs. Et après les destriers venoient les deux pallefreniers, et puis le mareschal. Après venoient plusieurs tabourins, et après les menestriers qui le venoient convoyer. Après les menestriers venoient les poursuivans; et après, les heraulx des seigneurs et puis ceulx du roy, et puis les roys d'armes royaulx. Et après venoient toutes les trompettes et les clairons, premiers ceulx des seigneurs, et puis ceulx du roy. Et après ses trompettes venoit il, vestu de sa devise comme ses paiges, les manches toutes d'orfaveries branlans, et sur son chief ung semblable chappel de plumes, sur le très bel coursier que monseigneur d'Anjou à son partement luy avoit envoyé, et venoit au meilleu de quatre seigneurs, deux devant et deux après, et puis tous les aultres seigneurs, chevaliers, escuyers, comme ilz povoient, et en ce très grant honneur, à son partement de la court, en la ville de Paris une bonne lieue. Et au départir fit venir avec luy tous les roys d'armes, heraulx, poursuyvans, trompettes, menestriers, tabourins, et aultres compaignons d'esbatement, soupper avecques
luy au Bourg la Ro3'ne, où pour celluy jour il se logea, lesquelz il tint bien aises. Et au matin leur donna cinquante escuz. Et à tant me tairay cy de son partement, et parleray de son chemin et de la venue de Lesignen le poursuyvant.
