CHAPITRE XXIX
Comment Saifitré, estant en Avignon, le roy d'armes d'Anjou lui apporta le scelle de la responce de sa lectre d'armes, et luy compta tout comment il avait parlé a Enguerrant, et monstre sa lectre d'armes, qui en fut moult joyeulx.
L'acteur. — Et quant Saintré fut en Avignon, pour la grant nouvelle de sa venue, le roy d'armes d'Anjou, qui le scelle de sa response portoit, au saillir de la messe, à Saintré ledit scelle présenta. Et quant Saintré eut bien leu et devisé ledit scelle, devant chascun publicqueraent retourna incontinent àt l'église remercier Dieu dévotement, puis audi
roy demanda devant tous toute la façon de son delivrement, et qui estoit celluy qui emprins avoit à le délivrer. Lors dit Lesignen : « Je premier arrivay à Barselonne le troisiesme jour de juing, assez tart, et celle nuyt me reposé. Le matin, après la messe ouye, je revins en mon logis, et vesty vostre cocte d'armes, ainsi que mon droit estoit, et mis la boite où vostre lectre d'armes estoit, en mon saing, puis par le varlet de l'hostel me fis conduire au palais du roy. Et quant je fuz à l'entrée, je rencontray ung chevalier très bel de corps et bien acompaigné, nommé messire Enguerrant de Servillon, lequel en passant je saluay humblement ; et quant il me veit vostre cocte d'armes vestue, subitement il me appela, disant : « Hérault que vous estes, au semblant de la cocte d'armes vestue que vous portez, comment est vostre nom? — IMonseigneur, dis je, mon nom de mon office est roy d'armes d'Anjou, de Thouraine et du Maine. » Alors il me dist : « Roy d'armes, vous soyez le bien venu ; il me semble que venez en ceste court du roy pour quelque fait d'armes, et se ainsi est, je vous pri^ que vous le me declairez. — Monseigneur, dis je, il est vray que je suis envoyé de part ung noble et renommé escuyer du royaume de France, nommé Jehan de Saintré, lequel au premier jour de ce derrain mois de may, par veux fais.
presens plusieurs haultes et nobles dames et damoiselles, seigneurs, chevaliers et escuyers à grant nombre, print emprinse de porter en son bras senestre ung très riche bracelet d'or paré de pierres précieuses, et ce par l'espace d'ung an, et jusques à tant qu'il trouve aucun chevalier ou escuyer de nom et d'armes, sans reprouche, qui le veuille délivrer des armes, à cheval et à pié, comme ceste lectre contient ; si luy porteray le scelle de celluy qui le vouldra délivrer. Et pour ce faire, il vient en ce royaulme, tout premier, en la court de ce très noble roy, où il sera ung mois entier, actendant sa délivrance par ung chevalier ou escuyer tel que j'ay dit. Et au cas qu'il ne le trouve cy, il yrasemblablement à la court du roy de Navarre, puis du roy de Castille, puis de Portingal, à chascune court demourer ung mois, s'il ne treuve son expedicion comme j'ay dit. — Ores, roy d'armes, je vous prie que ces lectres je puisse veoir, vous promettant, sur la foy de noble chevalier, que se elles sont armes honorables que, au bon plaisir de Dieu, de monseigneur sainct George et de mon souverain seigneur le roy, que je seray celuy qui à mon povoir luy accompliray ses armes. » Et quant à son estât bien accompaignié, façon de corps et honneste de parler, aussi la foy qu'il me promettoit, je apperceuz bien que noble estoit : et me sembla
ce que je queroye avoir trouvé. Lors de mon seing je prins voz lectres et les lui baillay, lesquelles à son plaisir leues, me dist :« Roy d'armes, venez vous en avec moy. » Lors il retourna et parla à plusieurs chevaliers et gens de la court, ausquels montra voz lectres. Puis me redist : « Roy, venez à moy. » Lors me print par la main, et me mena devers le roy, qui de sa messe sailloit. Alors luy et moy, tenant l'un l'autre par la main, nous agenouillasmes et tous les aultres aussi, puis en son langaige dist : « Seigneur, moy saillant de ce vostre palais, ay, par bonne advanture, trouvé le roy d'armes d'Anjou qui est cy présent , et à la cotte d'armes qu'il porte vestue j'ay congneu que, sans cause de quelque fait d'armes, ne la portoit especialement en la court d'ung si très hault prince comme vous estes. Si l'appellay et demanday dont il venoit et la cause pourquoy il portoit cotte d'armes vestue, en ceste vostre court, actendu que vous estes en paix avec tous les princes chrestiens. Si me respondit ainsi que s'il vous plaist ouyr je vous diray. »
