CHAPITRE XXX
Comment le roy d'armes d'Anjou recita a Saintré que le rov d'Arragon avait dontié congié a Enguerrant pour le délivrer de son entreprise, et luy avait faicte bonne ckiere, parquoy Saintré et ses compaignans furent moult joyeulx.
LE ROY d'armes. — « En disant ces parolles le roy, qui très fort me regardoit, me dist, en moy touchant la main, que je feusse le très bien venu. Puis me dist, que je disse ce que j'avoye dit à messire Enguerrant de Servillon. Alors je dis de mot à mot tout ce que luy avoye dit ; pour abréger : « Et où sont les lectres, dist le roy. — Seigneur, dist messire Enguerrant, veez les cy. » Lors le roy les fist lyre. Et quant elles furent leues, messire Enguerrant lui dist : « Sire, vous savez que les très nobles previleges mondains et d'honneur requièrent aux nobles cueurs que, par le très noble mestier d'armes, chascun de bien en mieulx à son povoir se doit employer d'acquérir la très noble grâce d'honneur, soit en armes
d'emprises, ou soit en guerres guerroyables, et en toutes aultres honnestes façons. Et pour ce que la grâce de ceste advanture est premier addressée à moy, jaçoit ce que plusieurs aultres sont icy en vostre court, assez meilleurs, plus puissans et plus suffisans que je ne suis; toutefois, sire, pour l'heur de mon advanture, qui suis le premier, si très humblement que je sçay, que je doy et que je puis, vous requiers et supplie, que se vous accordez ces armes parfaire à nuUy de vostre court, que ce soit à moy. »
Le ROY d'armes. — « Et quant le roy entend sa requeste, comme saige prince, avant qu'il fist responce, se tira à part, et apella plusieurs seigneurs, et aultres chevaliers et escuyers, anciens de conseils, qui là estoient. A laquelle ne demoura gueres qu'il l'appella, et publiquement lui dist : « Messire Enguerrant, nous avons ouy vostre humble et honnorable requeste, laquelle, pour l'honneur et amour de vous, aussi du noble escuyer qui porte l'emprise, nous le vous accordons, et donnons jour à voz armes, le quinziesme jour après sa venue ; si vrayement que Dieu vous ait tous deux en sa bonne garde ! et par ainsi donrez plaisir aux dames. » De laquelle très gracieuse responce du roy, messire Enguerrant et tous ses am3S très humblement le remercièrent, et aussi fis je de par vous. Alors le roy se part et va disner,
et messire Enguerrant me mena en son hostel, .et envoya quérir mes chevaulx et mener avecques les siens, puis avecques luy très bien disner, et oster vostre cocte d'armes et despouil- 1er en pourpoint; puis me donna une très belle et riche robbe de velours bleu figuré, et très richement brochée d'or et fourrée de martres sebelines, laquelle j'ay en ma mallette icy, et puis me fist tout ce jour et le lendemain séjourner, et plus assez se j'eusse voulu. Et endementiers qu'il vous faisoit sa responce, les heraulx du roy me vindrent festoyer et mener par la ville. Et quant mes lectres furent faictes, il me mena prendre congié du roy, qui me fit très bonne chiere, et pour l'amour de notre sire le roy, aussi de vous, me fist donner ung tabart de veloux figuré noir, fourré de martres sebelines et cent florins d'Arragon. Et au prendre congié, très doucement me dist que de sa part vous saluasse. Desquelles voz armes, comme il m'a par plusieurs fois esté dict, la royne, les dames et damoyselles, aussi chevaliers et escuyers, toute la cité et le pays en ont telle joye, que tout en bruyt. Et au prendre congié de messire Enguerrant, il me dist : « Roy, vous me recommanderez bien à mon frère Jehan de Saintré, et luy dictes que, au plaisir de Dieu, je serai tout en point à la journée que le roy nous a donnée, et aussi me recommandez à
152 LE PETIT JEHAK DE SAINTRE
toute sa compagnie, et à Dieu soyez ! » Et quant je fuz pour monter à cheval, il m'envoya quarante florins d'Arragon. »
L'acteur. — Et quant Saintré et toute sa compaignie ouyrent le rapport et bonnes nouvelles, et sa très briefve délivrance, la joye fut merveilleuse entreulx, et fut ceste nouvelle par tout publiée et portée au roy et à la royne, dont ma dame le sceut, et aussi toute la court, et par le royaulme espandue. Alors commencèrent dames et damoiselles à jeusner, à faire veuz, pellerinages et prières pour l'amour de luy ; mais de ces bonnes nouvelles, Saintré, comme bon chrestien, et qu'il tenoit de Dieu ses honneurs et ses aydes, retourna arrière au moustier, et là, à genoux, chief descouvert et mains joinctes, à Dieu et à nostre Dame faict dévotement ses prières et oblacions ; et puis s'en vont disner.
LÉ PETIT JEHAN DE SAINTKÊ iJJ
