CHAPITRE XXXII
Co7mnent messire Enguerrant présenta Saintré au roy et a la royne, qui luy firent tris bel recueil et festoyèrent sollennellement.
L'acteur encores. — Alors messire Enguerrant va au roy luy conter sa merveilleuse bonté et gracieulx parler ; dont le roy, qui jà aucunement en avoit ouy conter, l'en prisa très grandement, et eut grand désir de le veoir, aussi la royne et toutes les dames de la court. Et après les vespres, messire Enguerrant très bien accompaigné, vint devers Saintré, et le tenant par dessoubz les bras, tout à genoulz le présenta au roy, où la royne estoit. Et quant le roy le commença à
veoir, deux ou trois pas au devant s'advança, puis dist : « Bien vienne ce beau filz et commencement d'escuyer. » Lors les fist lever ; et quant ilz furent levez, messire Enguerrant le mena à la royne présenter, qui luy dist : « Jehan, vous soyez le très bien venu. » Lors le prent et le fait lever. Messire Enguerrant le maine devers les dames, et jaçoit ce qu'il ne fust de coustume, il les lui fit toutes baisier, car ainsi estoii il ordonné. Lors revindrent devers le roy, et tous deux à genoulx se misrent ; messire Enguerrant dist au roy : « Seigneur, vous avez veu la lectre de mon frère de Saintré sur le contenu de ses armes, de vostre grâce m'avez donné licence, jour et place pour le délivrer ; doncques à vostre bon congié voulez que je parface ce que en son veu contient, c'est premier : de deslier le bracelet que en son bras senestre il tient. » Alors le roi, comme saige prince, voult de bouche à bouche savoir à Saintré s'il le confessoit, et illecques publiquement fist lire la lectre et sçavoir s'il l'advouoit ; puis luy dist : « Jehan de Saintré, portez vous ce bracelet d'emprinse par la façon que vostre lectre contient? — Sire, oyl, dist Saintré. — Or doncques, dist le roy, je vous donne congié de le deslier. » Alors messire Enguerrant le bracelet osta, et osté qu'il fut, tout ce jour, par ung très bel cordon de soye et d'or à son col le
porta, et puis le matin luy rendit. Et, ce faict, vont vers la royne et les aultres dames qui très grant honneur et bonne chère luy firent. Puis vont en la chambre de parement, et illec jouèrent à maints jeux, tant que l'eure fut de souper. Alors Saintré prinst congié, et messire Enguerrant avecques plusieurs chevaliers et escuj'ers le retint au soupper; dont tout ce soir et plusieurs jours après ne cessa le deviser de la beaulté et gracieuseté de Saintré et de tous les siens. Et au quatriesme jour le roy voult que la royne le fist convyer et semondre, et les gentilz hommes de sa compaignie, tous à disner ; et après les dances et chansons, où Saintré, qui très bien dansoit et chantoit, et aucuns de sa compaignie pleurent très grandement au roy, à la royne et à tous. Et ainsi par chascun jour en celle court estoient festoyez. Et du surplus, pour abregier l'hystoire, je m'en délaisse pour venir au fait.
