CHAPITRE XLVI

Comment Saintrê par ses journées est venu devers le roy ; l'honneur et les bonnes chères qui luy furent f aides, et le cueur de ma dame guery.

ET quant Saintré et sa compaignie eurent tant chevauchié, par leurs journées, qu'ilz furent à deux lieues de Paris, ilz trouvèrent maintz barons, chevaliers, escuyers, bourgeois et aultres de la ville de Paris, tous venus à rencontre pour l'honnourer et aconvoyer, tant estoit amé et bien volu de tous. Lors fut la joye des ungs aux aultres telle que c'estoit ung plaisir de les veoir. Et quant il eut au roy et à la royne faictes ses révérences, qui très grant joye luy firent, lors va à ma dame, qui de joye avoit tant que à paine savoit soy maintenir ; et combien que, comme saige dame qu'elle estoit, sa très entière joye elle celloit. Puis va aux aultres, qui très grant joye luy firent, lesquelles aiant toutes baisiées, lors pour sa venue la royne commanda à dancer. Et endementiers que les dances estoient, ma dame, qui

avecques la royne estoit, luy dist : « Hé ! ma dame, vous avez oy que Saintré en Arragon a assez dancé, aussi est il las, pour ce faictes le appeler, et le faictes seoir cy en bas avecques nous, et lui demandez des estatz et des façons des dames d'Arragon. — Et en vérité, dist la royne, ma Belle Cousine, vous dictes bien. » Lors la royne fist Saintré appeller, et encores trois aultres dames, lors dist à Saintré : « Saintré, mon amy, nous voulons que vous reposez. » Puis dist aux aultres trois dames : « Seezvous toutes, et la plus courtoyse le servira de la queue de sa robe. » Ma dame, pour le veoir plus clerement vis à vis, ne voult pas estre la plus courtoise, ainsi fist le sourt. Lors la royne premier arraisonna Saintré de sa venue à la court d'Arragon, de la chiere que le roy et la royne, les seigneurs, et especiallement les dames luy firent ; puis demande de ses armes, tant à cheval comme à pié, des beaultez, des maintiens et des habillements des dames. Desquelles choses premier Saintré touchant ses armes en passa bien legierement, comme il devoit, et de ce qu'il en dist, fut plus à l'honneur de messire Enguerrant que au sien ; mais du surplus, loua les dames en toutes façons grandement, et aussi fist le roy et tous les seigneurs, dont trop louer ne s'en povoit. Et à tant laisseray cy à parler des louenges et hon-

nours dont il fut interrogué par la royne et les dames, et diray de la très parfaicte joye et bonne chiere que ma dame luy fit, et comment elle repaissoit ses yeux, de fois à aultre, quant elle osoit.

L'acteur. — Ma dame, endementiers que ainsy devisoient, comme se rien n'y pensast, regardoit à dextre et à senestre, puis çà, puis là, et puis tout à coup son très doulx regard fléchissait sur luy ; et en ce faisant elle print de son atour une espingle, puis commença à purger ses dens, ainsi que son signal estoit. Et quant Saintré apperceust de ma dame son signal, incontinent luy respondit en frotant ung peu son ueil droit ; et ainsi, à très joyeuse destresse de leiu-s cueurs, passèrent ce très long et ennuyeulx jour, et jusques à la nuyt et heure entr'eulx ordonnée, qu'ilz se trouvèrent au jardin ; et lors commencèrent l'ung à l'autre festoyer, où furent mains baisiers donnez, et mains rendus. Là furent leurs joyes, là furent leurs désirs conjoints, et leurs cueurs et maulx gueriz ; auxquels delitz ilz furent depuis unze heures jusques à deux heures après minuit, que force leur fut l'ung de l'autre départir. Et à tant laisseray cy à parler de leurs parfaictes joyes, et diray de l'avancement de Saintré, et de la compaignie du premier dit Bouciquault.

LE PETIT JEHAX DE SAIXTRÉ 20^