CHAPITRE XL VII

Cy parle comment Saintrê fut chambellant du roy, et des aliances de luy et de l'escuyer dit Bouciqiiault.

LE roy, qui jà tant aymoit Saintré, ainsi que avez ouy, l'honneur de luy peu à peu creut tant en peu de temps qu'il l'ordonna à dormir dans sa chambre, et puis son premier chambellant. Saintré, qui bien avoit retenu les doctrines de ma dame, quant elle, en son enfance, l'adreçoit à estre vertueux et bien moriginé, recordant le dit de Albertus, qui disoit :

Non tua claudatur ad vocem pauperis auris.

Et encores du très bel vers que Aristote dit ainsi :

Vir bone, quam curas res viles et perituras; Nil profituras, dampno quandoque futuras. Nemo diu mansit in crimine, sed cito transit, Et brevis, atque levis in mundo gloria queris.

Et plusieurs aultres enseignemens touchant ceulx qui sont eslevez es haulx estas. Et, pour ce, oncques pour estât qu'il eust du roy, oncques son cueur ne s'en orgueillit, ne ses maintiens n'en furent plus grans ; ains à ung chascun plus doulx et aymable et plus courtois se monstroit tous les jours. Et en celuy temps estoit en la court ung très jeune escuyer, très gracieulx, de la duchié de Thouraine, qui par esbatement fut nommé Bouciquault, grant père des Bouciquaulx qui sont aujourd'hui ; très saige, subtil, et estoit celluy très advenant escuyer, qui assez avant en la grâce du roy estoit. Celuy Bouciquault voyant Saintré qui si tant en la grâce du roy estoit, et plus que les aultres, s'en acointa. Saintré qui jeune estoit, le voyant si homme de bien, aussy pour l'amour du pais très voulentiers s'en acointa ; et tellement se accompaignerent et aymerent, que deux frères ne sceussent mieulx se plus entre aymer. Pour laquelle amour d'eulx, le roy, qui jà bien aymoit Bouciquault, fut content et ordonna qu'il couchast avec Saintré en la couchette, c'est assavoir quant il ne couchoit avecques la royne. Que vous dirois je? Ces deux escuyers se aymerent tant que oncques deux frères ne se aymerent plus, et furent, l'ung et l'autre, sy loyaulx et sy certains que oncques une seuUe faulte ne fut faicte entr'eulx.

Et quant l'ung d'eulx alloit hors pour ses affaires, ou pour emprises, ou voyages d'armes, comme ilz faisoient souvent, l'ung à l'autre gardoit la place, tellement que nul n'y peust entrer. Et jaçoit ce que Bouciquault fust puis très vaillant chevalier, oultre plus estoit il soubtil et attrempé plus que Saintré n'estoit ; mais au faict des armes, Saintré estoit tenu le plus vaillant. Et, pour ce, les heraulx et roys d'armes en firent un commun proverbe en disant :

Quant vient à ung assault,

Mieulx vault Saintré que Bouciquault ;

Mais quant vient à un traité.

Mieux vault Bouciquault que Saintré.

C'est assavoir : l'ung pour les armes, l'aultre pour le conseil. Dont pour ainsy tant qu'ilz vesquirent ensemble, leur amour et estât dura. Et à tant laissera}' cy à parler d'eulx, et diray des aultres nouvelles armes que ledit Saintré fist à rencontre du seigneur de Loisselench, baron de Poullaine, qui porte d'argent à ung beuf rampant de gueulles, cornes et ongles de sable ; lesquelles armes furent à Paris devant le roy et la royne, ma dame et aultres seigneurs et dames sans nombre.