LE COMMENCEMENT DU PAS
Le dimenche premier jour du moys et ouverture du pas, arriva ledit seigneur et conte de Boucaingham, le matin après la messe, en très grande et belle compaignie, qui fist sur le hault pignon de son logis mectre sa banière qui portoit d'Angleterre à une bordure d'argent, et crioit : Angleterre, Sainct George.
L'acteur. — ; Et quant l'heure fut venue de commencer le pas, leurs deux juges, roys d'armes de Champaigne et Jartierre, accompaignés de tous leurs heraulx, furent montés sur leur hourt, pour mieulx juger, lors commença la jouxte, qui fut forte, fiere et très honnourable pour tous deux : mais non pourtant que ledit conte, à la dernière cource, fut aulcun
peu blessé en sa main droicte. Pour avoir sa lance mieulx rompu, il gaingna le dyamant.
Le deuxiesme jour vint le conte Mareschal, qui aussi fist mectre sa bannierre sur le pignon, en très grant estât, qui portoit d'Angleterre, à trois lambeaulx d'argent, et crioit : Angleterre, Sainct George. Lequel fist très honnestement ; mais pour les lances bien rompre, Saintré gaigna le dyamant.
Le troysiesme jour vint le seigneur de Gobehen, en moult bel estât, qui portoit de gueulles à ung chevron d'or, à trois lyons de sable sur le chevron, et cryoit : Sainct George, Gobehen. Et fist mectre sa bannière sur le pignon ; mais de la septiesme course, luy et son destrier furent portés par terre ; dont par ainsi il paya le rubis.
Le premier jour de la seconde sepmaine, vint le seigneur Dangorde, en très bel estât, qui fist mectre sa bannière, comme les aultres, qui estoit d'ermines à chevrons de gueulles, et dessus trois besans d'or, et cryoit : Sainct George, Dangorde. Lequel gaigna le dyamant.
Le deuxiesme jour de la seconde sepmaine, vint, en très bel estât, le conte de Warvich, qui ainsi fist mectre sa bannière, qui estoit de gueulles à une faisse d'or à croisettes de
252 LE PETIT JEHAN DE SAINTRé
mesmes, et cryoit : Sainct George, Warvich. Qui perdit le dyamant.
Le troisiesme jour d'icelle sepmaine, vint en moult bel estât, -le seigneur de Clisfort, qui aussi fist mectre sa bannière, qui estoit chiquetée d'or et d'azur à une bordure d'armines, et crioit : Sainct George, Clisfort. Et perdit le dyamant.
Le premier jour de la troisiesme sepmaine, vint le conte de Hostindon, en très bel estât, qui ainsi fist mectre sa bannière, qui estoit d'azur, semée de croisettes d'or recroisetées aux longs pies, au chief d'or, et cryoit : Sainct George, Hostindon. Et perdit le ruby.
Le deuxiesme jour d'icelle sepmaine, vint, en bel estât, le conte d'Arondel, qui fist aussi mectre sa bannière, qui estoit de gueulles au lyon langue et armé d'argent, et cryoit : Sainct George, Arondel. Et perdit le ruby.
Le troysiesme jour ensuyvant, vint, en très bel arroy, le seigneur de Beauchamp, qui ainsi fist mectre sa bannière qui estoit de gueulles à une faisse d'or, et cryoit : Sainct George, Beauchamp. Et perdit le dyamant.
Le premier jour de la dernière sepmaine, vint, en très bel et grant estât, le conte de Norfort, qui semblablement fist mectre sa bannière qui estoit party en pal d'or et de sinople, à ung lyon de gueulles, à une fasse d'or sur le
tout, armé d'argent, et cryoit : Sainct George, Norfort. Et gaigna le dyamant.
Le deuxiesme jour de la dernière sepmaine, vint, en très bel et moult grant estât, le seigneur de Brues, qui ainsi fist mectre sa bannière qui estoit de gueulles au lyon d'or à queue forchée, et cryoit : Sainct George à Brues. dui perdit le ruby.
Le troysiesme et dernier jour du pas, vint, en très grant estât, le comte de Cambruges, qui fist sa très riche baniere, qui estoit d'Angleterre à trois lambeaulx couponnez d'argent et de gueulles, mectre comme les aultres, et cryoit : Angleterre, Sainct George. Et gaigna le ruby.
L'acteur. — De laquellejouste entre les juges fut grant difficulté^ car les lances furent si bien rompues, qu'ilz ne sçavoient du meilleur. Si furent une fois délibérés que chascun se partist sans prix ; toutesfois ilz conclurent à la fin que nul ne perdist son droit ne sa peine, et ordonnèrent que, se perte y avoit, l'ung le payast à l'aultre, et que le conte commençast, car Saintré avoit rompu le premier. Et par ainsy Saintré perdit trois dyamans et en gaigna huyt, qui sont unze, et le douziesme perdu et gaigné.
L'acteur encores. — Desquelles armes et coups qui y furent faitz, je me passe, car trop
longue chose seroit à escripre, fors que tous firent très bien et mieulx* les ungs que les aultres, et, Dieu mercy ! sans aulcune mort et grant effusion de sang ; dont, au départir les ungs des aultres, firent tant d'honneurs et de révérences que s'ilz estoient frères ; et n'y eut celluy qui ne donnast à l'aultre, oultre le pris gaigné, dons^ bagues, draps d'or et de soie, chambres de tapisserie, coursiers, hacquenées, vaisselle d'or et d'argent, et maintes aultres choses ; dont par ainsi les uns des aultres très contens se départirent. Et donna Saintré à soupper à eulx tous, après que les armes furent faictes, et au départir donna à Jartière la première houssure de son destrier, qui estoit de cramoisy chargé d'orphaverie à grans hors de martres sebelines, et deux cens frans à cheval ; et aux aultres heraulx donna leurs dicts logis, leur hourt, et cent francs aux trompettes, clarons et menestriers angloys ; donna à tous ensemble deux cens francs ; et au roy d'armes de Champaigne, l'ung de ses juges, donna sa dernière housseure de son destrier, qui estoit d'ung très riche cramoysy de satin figuré en drap d'argent, tout fourré de martres sebelines, et trois cens frans ; et aux aultres heraulx et poursuyvans françois, donna son logis et deux cens frans; aux trompettes et menestriers de sa compaignie, qui grant nombre estoient, donna
trois cens frans. Et n'y eut chevalier, escuyer, herault, ne aultre de sa compaignie, qui n'eust robbe de livrée, sans les aultres dons qu'il donna à part à certains chevaliers et escuyers qui accompaigné l'avoient ; qui eut bien souffiz à ung des haulx princes de la couronne. Et ainsi, les ungs des aultres, très haultement contens de luy, se partirent.
L'acteur. — Et quant Saintré fut retourné devers le roy, Dieu scet l'onneur et la haulte chiere qu'il lui fist; aussi la royne, et tous et toutes, pour abréger. Ma dame^ comme dit est, ne fault point escripre ne parler, car chascun en soy le doit penser, tant à cause de l'amour que à luy avoit que pour le grant bien que chascun en disoit. Et à tant laisseray cy à parler de ces honneurs et des amours de ma dame et de Saintré, qui par ung aultre assault d'armes fut assailly.
