CHAPITRE LIX

Comment, après que le terme fut venu pour aller en Prusse, le roy bailla sa baniere a Saintré, le commettant son commissaire. Puis comment ledict Saintré et les aultres seigneurs prindrent congié du roy, de la royne et des dames, qui menèrent grant dueil au départir , especiallement la dame.

ET quant le terme de partir fut venu, et que Saintré et toute la compaignie furent en bon point, et eurent mandé leurs harnoys et leurs bagaiges, par chariolz et aultrement, et aussi leurs gens de traict, qui tous portoient jacquettes vermeilles où la croix blanche dessus estoit, alors Saintré et tous les nobles qui vestus estoient aussi de semblables robes comme leurs gens, qui estoient très belles choses à veoir, après la solempnelle messe ouye, que l'evesque chanta à Nostre Dame de Paris, eulx tous confessez, leur donna la bénédiction et la papale de paine et de coulpe absolucion ; et illec présent le roy, fut benoiste sa baniere et toutes les aultres. Lors

accompaignerent le roy, puis allèrent disner. Et quant vint aux deux heures, que tous furent absoubz, allèrent au ro}', qui en la grant salle estoit ; la royne, messeigneurs et dames, là tous presens, vindrent prendre congié. Et quant tous furent à genoulx, le roy dist à Saintré : « Saintré, je vous baille de ce voyage la conduite, et la charge de ma bannière qui représente ma personne, aussi des seigneurs et aultres nobles qui cy sont, et seront en la compaignie. » Et puis aux aultres seigneurs dist : « Mes amys, vous tous estes nobles et de nobles maisons partiz, esquelles il a eu de très vaillans hommes assez, ausquelz vous avez par voz vaillances maintes fois semblé ; ores vous allez au service de nostre vray Dieu Jésus Christ, où vous pourez acquérir le vray sauvement de voz âmes ; et vous recommande à tous nostre bannière, la très saine te foy et voz honneurs. Les gens combatent, et Dieu à ses gens donne les victoires; dont n'est point à doubter, que se vous et les aultres princes et seigneurs chrétiens, et tous ceulx qui combatre doivent, que se vous estes bien avec Dieu, qu'il ne soit assez mieulx avecques vous, pour quelconque grant puissance que les Sarrazins soient, qui sera telle que le nombre ne s'en pourra extimer ; et, quant à moy, je vous jure ma foy que, se ne fussent les grans affaires que

j'ay, nous serions tous d'une compaignie. Et de ce je me cesse, mais d'une chose à tous je vous prie, du plus grant au plus petit, que soyez amys et frères, sans envyes, sans desbas et sans noyses ; car, par ce, sont maintes fois compaignies rompues et mises à deshonneur et perdicion. » Et alors prent sa baniere et la baille au baron de Chastel Fromont à porter, et puis leur dist : « Ores, mes amys, comme vostre roy et vostre chief à tous, je vous vueil donner ma benedicion. » Lors fist le signe de la croix, et dist : « Au nom du Père, nostre Dieu créateur, au nom du Filz, nostre rédempteur, et au nom du sainct Esprit, nostre Dieu illumineur, ung vray seul Dieu en trois noms et en trois personnes, puissez vous tous aller et retourner au saulvement de voz âmes et de voz honneurs ; vous priant tous, que chascun, perte ou gaingne, que soyez honnorablement, vous recordant que nul ne retourne s'il fait autrement. » Et à ces paroUes, en lermoyant des yeulx, et à grant peine disant : « A Dieu, mes amys, » il toucha la main à tous. Lors ouyssiez de tous coustez cueurs tendrement souspirer, et veissiez yeulx de toutes gens plourer, qu'il n'estoit celluy ne celle qui peust ung seul mot parler. Lors vont à la royne, qui pour ses pleurs estoit avecques ses dames traicte arrière et de cousté ; adonc Saintré

pour tous, en mieulx qu'il peust, commença à parler et dist : « Notre souveraine dame, est il nulle chose qu'il vous plaise moy commander ?» La royne envers eulx se tourna, et, sans dire mot, à tous toucha les mains. Puis vont à mes trois seigneurs les frères, et dirent semblablement ; lors dist monseigneur d'Anjou : « Saintré, et vous aultres beaulx cousins et noz très bons amys, vous avez ouy ce que monseigneur le roy a dict, allez joyeusement, et le faictes ; si ne pourrez que bien finer. » Puis vont à ma dame ; de celle ne fault point à parler, car combien qu'elle efforçoit sa nature et la très griefve passion qu'elle avoit en regardant Saintré, que à bien peu s'en faillit qu'elle ne se pasma, et fust à l'envers tombée, se elle ne se feust bien tost levée. Puis s'en vont aux aultres dames et damoyselles, qui toutes ensemble tel dueil faisoient plus que se tous leurs parens et amys fussent mors, disant entre elles : « Helas ! dolentes, jamais ensemble telle et si joyeuse compaignie ne verrons. Les officiers de la court tous plouroient, en regrettant Saintré, l'ung à l'aultre disans : « Hélas ! or s'en va celuy qui en noz adversitez nous confortoit, et qui en nez affaires nous conseilloit, et qui en noz nécessités nous secouroit ; et si ne sçavons se jamais le verrons. » Lors de tous coustés le prenoient, faisans prières et veuz en leurs cueurs, que à

très grant peine le peurent laissier. Et ainsi s'en vont tous pour ce jour reposer.

L'acteur. — Et quant lendemain fut venu au matin les trompettes, pour mectre selles commencèrent à sonner. Lors trestous vont au moustier, et quant les messes furent dictes chascun monta à cheval, et commencèrent à partir; là furent mes trois seigneurs d'Anjou de Berry, de Bourgoigne et tous leurs gens qui, pour honnorer la bannière du roy, hors de Paris les vouldrent accompaigner ; et des aultres chevaliers et escuyers, bourgeois et marchands de la ville, tant que à peine y en demeura ung seul.