DE LA VENUE DE MA DAME, ET DE LA JOIE ET BONNE CHIERE DES GENS DU PAIS

Quant la nouvelle fut par le pais sceue de la venue de ma dame en son hostel, seigneurs et dames, escuyers et damoyselles, bourgeoys et bourgeoyses, la vont veoir ; dont par leur venue, peu à peu, son grant dueil commença à passer. Et à tant laisseray à parler aulcun peu du séjour de ma dame, et diray de l'abbaye et de damp Abbez.

L'acteur cy parle de damp abbez et DE SON abbaye. — Comme j'ay dit, ceste abbaye, qui cy n'a point de nom, les prédécesseurs de ma dame la fondèrent ; et tant y firent de biens que aujourd'huy elle est une des dix meilleures abbayes de France. Damp Abbez, qui pour lors estoit, fut filz d'ung très riche bourgeoys de la ville, qui, pour dons et pour prières de seigneurs, aussi des amys de la court de Romme, donna tant que son filz en fut Abbez, qui de l'aage de vingt cinq ans estoit ; grant de corps, fort et abille pour luicter, saillir, gecter barres, pierres, à la paulme jouer,

né trouvoit moyne, chevalier, ne escuyer, ne bourgeoys, quant il estoit à son privé, qui son maistre en feust. Que vous diroy je ? En toutes joyeusetés s'employoit, affin qu'il ne fust trop oyseulx; et d'aultre part, large et libéral de tous ses biens, dont estoit moult amé et prisé de tous bons compaignons. Quant damp Abbez sceut la venue de ma dame, il fut très joyeulz; lors fist ung de ses chars charger de cymiers de cerfs, de hures, de costes de sangliers, de lièvres, de connins, de faisans, de perdriz, de gras chappons, de pouUailles et de pigeons, et une queue de vin de Beaulne ; et tout envoya présenter à madicte dame, luy supplyant qu'elle print en gré. Ma dame, qui vit ce beau présent, ne demandez mye se elle fut joyeuse, et commanda festoyer le presenteur, et à damp Abbez remercyer. En celuy temps on estoit près de karesme, et en l'abbaye estoient de grans pardons le lundy, le mercredy et le vendredy de la sepmaine. Ma dame, esprinse de grant dévouions, délibéra d'y aller, mais que la presse et foison du peuple fut passée, et les quinze premiers jours. Lors manda à damp Abbez qu'elle seroit demain à la messe, en son abbaye, pour gaigner les pardons. Damp Abbez, qui oncques ne l'avoit veue, en fut très bien joyeulx ; lors ordonna à parer le grant autel de reliques, l'oratoire ou la chapelle où gisoient

ses prédécesseurs ; et d'autre part l'Abbez, à la bonne ville, fist retenir lamproyes, saulmons, et d'autres meilleurs poissons de mer et d'eaue doulce que l'on pourroit trouver. Puis commanda les estables à chevaulx appareiller de toutes choses, et fist semblablement appareiller viandes de diverses façons, et faire feuz en plusieurs chambres, car encores en estoit de saison. Et quant ma dame fut venue et descendue à la porte du moustier, là furent les officiers, les plus nobles religieux de l'église, qui, de par damp Abbez, à genoulx, offrirent tous les beaulx joyaulx de leans avecques leurs services, ce que ma dame remercya grandement. Et quant elle eut au grant autel son oblacion faicte, fut en sa chapelle conduicte pour sa messe oyr. Lors au partir, à la fin des heures, fut damp Abbez, accompaigné des prieurs et du couvent, qui à genoulz luy dist : « Ma très redoublée dame, vous soyez la très bien venue en nostre maison, bien sommes très lyez et joyeulx, quant Dieu nous a donné la grâce de vous y veoir ; comme nostre patronne et fonderesse, nous vous offrons l'abbaye, les corps et les biens. » Alors ma dame luy dist : « Abbez, à très bon cueur vous remercions; aussi s'il estoit chose que pour vous nous puissions faire, et pour tout le couvent, nous l'accomplirons de très bon cueur. » Alors ma dame demanda

à veoir les reliques ; damp Abbez se leva, qui à genoulz estoit, lors prent les chiefs, les bras et les ossemens de corps saincts à grant planté qui là estoient, disant: « Ma dame, cy gist le très vaillant prince, nostre premier fondeur, qui des premières conquestes de la Terre Saincte apporta cest chief, ceste main et ces os de messire sainct tel et tel ; monseigneur son frère donna céans en don ces machoueres et ces os de bras de monseigneur sainct tel et tel, et saincte telle. Et, pour abréger, ont tous voz prédécesseurs donné toutes ces relicques, et faicte ceste église et grant parti du surplus tel que voyez ; et le surplus ont faict mes prédécesseurs Abbez, et les seigneurs et dames, mes voysins, qui gisent céans. » Quant ma dame eut les relicques baisiées, et donné une chappe et deux tunicques, avec le parement du grant autel, tout de fin veloux velouté cramoysy et très richement brodé d'or, et ce fait, elle s'en cuyda retourner. Et tandiz que les chevaulx des charriotz, et aultres, mengeoient, qu'on hastoit pour brider, damp Abbez mena ma dame en sa chambre chauffer, qui estoit très bien tendue et necte, tapissée, verrée. Comme celuy qui bien aise et joyeusement s'en tenoit, et comme très bon compaignon, dist à chascun : « Saillons tous hors, et laissons ma dame chauffer, et soy un peu aiser en son

privé ; » et ainsi fut. Et quant ma dame et toutes les dames et damoyselles de sa compaignie se furent très bien chauffées et aysées, ma dame fist demander se les charriotz étoient prests. Alors damp Abbez, qui jà avoit dit au maistre d'hostel que ma dame disneroit leans, et que tout le manger estoit appareillé, luy priant qu'il luy voulsist tenir la main, à ces parolles entra devers ma dame ; puis la mena en sa très gente sallette, telle comme une chambre de parement très bien tendue, tapissée et natée, et les fenestres verrées, et très beau feu ; et illec estoient trois tables couvertes de très beau linge merveilleusement, et le dressouer garni de très belle vaisselle à grant largesse. Et quant ma dame vit les tables ainsi mises, dist à damp Abbez : « Abbez, voulez vous jà disner ? — Disner, dit il, ma dame, n'est il pas temps ? veez cy l'hourloge, » qu'il avoit fait avancer d'une heure et demye, et qui sur l'heure de midy frappée estoit. Ma dame, qui oyt sonner mydy, se voult haster de partir ; et damp Abbez luy dist : « Ma dame, par la foy que je vous doy, ne partirez jusques ayez disné. — Disné, dist ma dame, certes je ne pouroye demourer, car j'ay moult à besongner. — Hé! maistre d'ostel, et vous, mes dames, souffrerez vous que jesoye de marequeste reffusé? » Alors les dames et damoyselles, et

aulcunement le maistre d'ostel, qui jeusnoient et avoient bon appétit, pensant que trop mieulx disneroient que de l'ordinaire de l'ostel, l'une guignant, l'aultre boutant, tant prièrent pour la première requeste de damp Abbez, que ma dame se consentit. Alors damp Abbez, comme joyeulx, gracieulx et amyable, à genoulx prestement se mist, et ma dame remercya, et aussi les autres dames et damoyselles. Lors furent les chevaulx es estables retournez, dont toute la compaignie, jaçoit ce qu'ilz fussent bien desjeunez, si en furent ilz très joyeulx. Alors dist damp Abbez : « Ma dame, vous estes au sainct temps de pénitence, et pour ce ne vous esmerveillez point se vous estes petitement servie ; et pour aultre raison que jusques au soir bien tart, de vostre venue n'en sçavoye riens. — Abbez, dist ma dame, nous ne povons que bien estre. » Alors damp Abbez demanda l'eaue pour laver les mains, qui estoit toute eaue rose tiède, dont ma dame et les aultres firent grant joye. Ma dame voult que damp Abbez, comme prélat, lavast le premier, mais il ne le voult oncques faire ; mais pour donner aux prières de ma dame, il s'en alla laver au dressouer. Lors fut la table levée, et ma dame dist à damp Abbez qu'il se seist, et il respondit : « Ma dame, vous estes dame et abbesse de céans, seez vous, et laissez faire à

moy. » Quant ma dame fut assise, et au bas bout de sa table ma dame Jehanne, ma dame Katherine et le seigneur de Gency, qui avecques elle estoit, y furent assis, à la deuziesme table, le prieur du couvent, Ysabel et aultres damoyselles et deux ou trois escuyers, et messire Geoffroy de Saint Amant viz à viz de ladicte Ysabel ; alors damp Abbez, une serviette sur son col, s'en va au dressouer au vin, et fait servir ma dame de toustées à l'ypocras blanc, et aussi toutes les tables, puis les figues de karesme, avecques le succre rosties ; à ma dame, qui moult le prie de seoir et ne le puist faire seoir, disant : « Ma dame, ne vous soit à desplaisir, je tiendray compaignie au maistre d'ostel, et pour ceste fois luy monstreray le chemin. » Et quant damp Abbez et le maistre d'ostel furent venuz, et le premier mets assis, ma dame dist à damp Abbez : « Vrayement, Abbez, se vous ne vous seoyez, nous nous lèverons. — Or bien, ma dame, je vous vueil et doy obeyr. » Ma dame voult faire retirer la table, mais damp Abbez dist : « A Dieu ne plaise que la table en bouge jà pour moy. » Lors fist apporter une escabelle, et viz à viz de ma dame, ung petit plus bas, se assist ; lors faict servir de vin blanc de Beaulne, puis du vermeil de trois ou de quatre façons, dont tous en furent serviz. Que vous diroye je? Les

prières de faire bonnes chieres, et de boire les ungs aux aultres y furent bien faictes ; et tellement que grant temps avoit que ma dame n'avoit faict si bonne chiere. Dont en beuvant, ma dame à damp Abbez, et damp Abbez à ma dame, les 3-eulx, archiers de cueur, peu à peu commencèrent l'ung des cueurs à l'aultre traire ; et tellement que les pies, couverts de la très large touaille jusques à terre, commencèrent de peu à peu l'ung à l'aultre toucher, et puis l'ung sur l'aultre marcher. Alors ce très enflammé dart d'amours fiert le cueur de l'ung, et puis de l'aultre, tellement qu'ilz en perdirent le menger; mais damp Abbez, qui de ceste queste nouvelle estoit sur tous le plus joyeulx, boj't à l'une, puis à l'aultre. Que voulez vous que je vous d3'e ? Oncques abbez ne fut si joyeulx ; une fois se lieve, et fait porter son escabelle devant les dames, et là aucun peu s'assiet, et puis va devant les damoyselles, et les prie de mangier et faire bonne chiere joyeuse ; puis va aux femmes de la chambre, et boyt à elles, et revient à ma dame, et de joye, viz à viz d'elle, se siet. Alors recommencèrent leurs archiers d'amours plus fort à traire, et leurs pies l'ung sur l'aultre marcher plus qu'encores n'avoient faict. Des aultres bonnes chieres, de vins, de viandes, de lemproies, de saulraonz, de mains aultres poissons de mer et

d'eaue doulce, pour abréger, dont ilz furent serviz, je laisse tant qu'à présent à en parler plus avant, pour venir au surplus de l'istoire qui est gracieuse.