CHAPITRE LXXI Comment damp Abbez fut loué

QUANT les dames et damoyselles furent appareillées, lors Ysabel se print à parler, et dist : « Vous ne dictes riens, ma dame, ne vous aultres sotes, de la bonne

chère de damp Abbez, et comment il nous a festoyees, et tenu aises de bons vins, de bonnes viandes et de bons poissons, à grant largesse. — Certes, dist ma dame, il me semble estre homme de bien. — Comment de bien, dist ma dame Jehanne, oncques si gracieulx moynne ne vyz. — Et vous, ma dame, dist Katherine, vous vous faisiez prier de demeurer? — Ha! dist Ysabel, je congneuz bien à ses prières que la chose alloit bien, et le faisoit de cueur. » Alors les dames toutes ensemble, ainsi que femmes ont accoustumé, louèrent les largesses, les joyeusetez et la belle personne de damp Abbez, tant qu'elles ne se sçavoient taire. Ma dame, qui jà en estoit férue, et qui ses dueilz avoit oubliez, dist à briesves paroUes : « Il est très homme de bien. » Et endementiers que de damp Abbez parloient, vespres commencèrent à sonner ; et pour y estre, sans dormir les convint lever. Et quant vespres furent dictes, et que ma dame cuyda monter, damp Abbez la print par la main, et elle luy dist : « Abbez, hé ! où nous menez vous ? — Je vous prie, ma dame, dist damp Abbez, que je vous maine à ung peu de collacion, car il est temps de la faire. » Et en ce disant, damp Abbez la vous print par dessoubs le bras, et en estraingnant la main, la maine en la salle basse bien tappissée et à bon feu, où estoit le dressouer et les

tables mises, les sallades dessus, cresson, vin aigre, plats de lemproyes rousties et en pastez, et en leurs saulces grantz soUes bolies, frictes et rousties au verguz d'oranges rouges, barbeaulx, saulmons roustis, boulliz et en pastez, grans carreaulx et grosses carpes, plats d'escrevices, grans et grosses anguilles renversées à la gallentine, plats de divers grains couvers de gellée blanche, vermeille et dorée, tartres bourbonnoises, talemouses et flans de cresmes d'amendes très grandement succrées, pommes et poires cuites et crues, amandes sucrées et pellées, cerneaulx pelez à l'eaue rose, aussi figues de Melicque, d'Allegarbe et de ^larseille, et raisins de Corinthe et de Orte, et maints aultres choses, dont, pour abréger, je me passe ; tout mis par ordonnance en façon de bancquet.