CHAPITRE LXXII

Comment ma dame fis i sa collacion fourrée.

MA dame, qui jeunoit et ne pensoit prendre que des espices et du vin trouva ses tables ainsi garnies ; car le traictre dieu d'amours l'avoit à son disner si fièrement assaillie, que de ses amoureux dars l'eut de mangier toute remplie ; neantmoins nature se volt acquiter, qui luy donna tel appétit qu'elle ne se fist guieres prier. Et quant les aultres de sa compaignie virent ma dame assise, et damp Abbez ou meilieu de la table viz à viz, chascun ou la plus grant partie se laissèrent aux prières de damp Abbez couler et consoler, aussi pour obeyr à ma dame et l'accompaigner; aux deux boutz de la table et des deux coustez tous s'assierent, et pour plus estre joieusement, quatre ou cinq moynnes des plus gracieulx entre deux. Lors veissiez boire d'autant, et menger à l'avenant. Que vous dirois je ? La joye et la lyesse y fut tant que à tel nombre de gens oncques n'avoit esté faicte ; mais il fault, pour celle fois, à grant regret et soupirs de ma

dame et de damp Abbez, départir. Mais au monter au chariot, illec fut damp Abbez et les prieurs remercier ma dame très humblement, en recommandant l'église et le couvent. Lors ma dame dist : « Nous nous verrons assez souvent, car nous entendons acquérir nostre part de voz pardons plus grandement ores que tous, » dont en furent très contens ; « mais quant à vous, Abbez, nous vous prions que de voz grans appareils de viandes vous despartez, car sans faulte vous en avez esté trop oultrageux, et n'en voulons plus. — Et bien, ma dame, de la tostée à la pouldre de duc, au vin blanc, et ypocras au muscadet, à la Granaiche, à la Malleveisie ou au vin grec, tout ainsi qu'il vous plaira, après la messe, pour le dangier du temps, ce ne défendez vous mye? — Si faiz, dist ma dame, car à ces jours nous entendons jeusner. — Jeusner, ma dame, jà pour ce ne laisserez vous à jeusner, et je vous en donray l'absolucion. » Et, à ces parolles, damp Abbez monte à cheval, et une pièce convoya ma dame, et puis print congié d'elle.