CHAPITRE XI
Comme il faut esleuer les petits Chiens et nourrir la mere.
E= Chiennes portent neuf semaines et trois iours, et au bout de ce terme ne faillent de faire leurs petits. Comme l’on connoist que la Lice veut challer, faut que le valet de Chiens
qui en a la chargesoit soigneux, qu’ainsi qu'elle se deliure; les petits sortent les vns apres les autres, sans se serrer jusques à ce que le dernier soit sorty. Or la Lice estant deliurée, est besoin luy changer de nourriture : car comme auparauant il ne falloit la nourrir trop, pour les causes que l’ay dictes en l’autre chapitre. Au contraire ayant challé la faut nourrir de meilleurs viures que l'on peut trouuer, comme potages, chairs, et autres choses qui la peuuent engraisser; et la nature a si bien pourveu que tout ce que J'on luy peut bailler, au lieu de l’employer à sa nourriture, se conuertit en laict, pour nourrir et alimenter ses petits : Et si l’on voit que la quantité des Chiens soit si grande, que la force de la mere ne soit suffisante pour les nourrir, est besoin l'aider et secourir d’autres Chiennes qui ayent petits de mesme aage que la Lice, mesmes si on peut recouurer des Levrieres, pour deux occasions elles y sont meilleures que les autres : L’vne à cause de leur grandeur et force elles ont plus de moyens de nourrir et plus à leur aise les petits que l’on leur baille: L'autre, les Chiens qui en sont nourris retiennent de la vitesse du Levrier. Or cecy n’est point necessaire de faire, si les petits n’excedent le nombre de trois: car il faudroit que la Lice fust bien mauuaise nourrice si elle ne les pouuoit nourrir. Pour faire que
lesdictes Levretes ou autres Chiennes à qui l’on veut faire nourrir d’autres petits ne facent difficulté de les receuoir au lieu des leurs, il faut prendre vn des leurs, le tuer, puis du sang en frotter ceux que l’on leur baïlle, les voyans couuerts de sang ne faillent aussi tost de les lecher, car c’est le naturel des Chiens de lecher les petits incontinent qu'ils sont nez pour les nettoyer de la peau qu'ils ont sur eux, et en les lechant, sentent et reconnoissent leur sang, et par ainsi les prennent pour les leurs. Les anciens ont voulu dire que la mere mangeoit le fardeau et la peau qui enveloppe les petits : mais par l’experience on connoist le contraire, seulement elles ne font que les purger et net
toyer auec la langue, il s’en trouue de si mauvais naturel qu'incontinent qu'elles ont fait
leurs petits elles les mangent; cela ne leur prouient que deux causes, l’vne, que ne se sentans pas la force de les nourrir par despit les tuent, l’autre, est qu’en les nettoyant elles les leichent tant qu'elles leur font sortir le sang du corps, puis les mangent, à quoy il faut auoir l'œil et les tenir emmuselées depuis l’heure qu'elles ont challé neuf iours apres, et quand les neuf iours sont passez, pourueu qu'on ne leur en laisse que telnombre qu’elles puissent nourrir, ils sont hors de danger. Voylà doncques comme la Lice jette
ses petits, et le moyen de la nourrir quand ils sont au laict ; il y en a d’autres qui ont voulu dire que le laict de vache estoit meilleur que celuy de Chienne pour allaicter les petits, mais ie suis d'opinion contraire, et tiens que celuy qui leur est naturel fait meilleure nourriture : Mais quand ils sont hors de dessous la mere, comme ie diray cy apres, il est necessaire de les nourrir de toutes choses ui les peuuent croistre et renforcer, ils doiuent tetter deux mois ou deux mois et demy. Le lieu pour tenir la Lice pendant qu’elle a ses petits doit estre chaud, toutesfois sans feu : si l’on la peut mettre en quelque coing d'estable où il y aye vne separation de claye ou d'autre chose, afin que les cheuaux ne la puissent offencer, c'est le meilleur : car la claye y est temperée. Ie ne parle icy en quel temps les Chiennes entrent en chaleur, et quand elles en sortent, comme j'ay dict des Cerfs, car elles n'ont saison certaine et arrestée; ie diray bien que celles qui challent au mois de lanuier, communement les Chiens qui en sortent sont plus beaux que les autres, par ce que tandis qu'il fait froid ils demeurent tousiours sous la mere qui les en garantit, et comme ce vient le Printemps, ils sont assez forts pour se deffendre des pulces.