Lequel il fist. » (Suppl. fr
coussis, lesquelles fortresses tenoient les gens du duc de Bourgongne. Lesquelz furent contrains de les rendre et délivrer es mains dudit connestable, lequel con,nestable y mist garnison de ses gens au nom du Roy.
f CHAPITRE GLXXXVIIL
Comment le roy d'Angleterre conquist plusieurs villes en Normendie. Et la prinse du conte de Harecourt et autres choses.
En ce mesme temps , Henry , roy d'Angleterre , comme dit est ailleurs, estoit à grant puissance ou pays de Normendie et conquestoit villes et fortresses. Car peu ou néant trouvoit qui feist résistence encontre lui, pour la division des François. Et en ceste saison se mirent en son obéissance les villes d'Evreux, Falaise, Baieux, Lisieux, Constances, Avrenches, Saint-Lô et plusieurs autres.
Pour la doubte duquel roy, le conte de Harecourt s' estoit lors retrait à tout son estât dedens le chastel d'Aumarle. Duquel lieu, ung certain jour, vint devers lui pour le veoir et lui faire amour et révérence, comme il monstroit semblant , Jaques de Harecourt, son cousin, lequel avoit avecques lui bien soixante compaignons combatans , et de fait apensé vint descendre à la porte dudit cbastel , laquelle, quant on le recongnut, lui fut ouverte, et par les officiers dudit conte lui fut fait grant honneur. Et adonc, à tout une partie de ses gens entra dedens et ala devers ledit conte, lequel lui fist très joieuse chère, disant : « Cou> sin, vous soiez le bien venu, m El avoit ledit messire Jaques ordonné aucuns de ses gens à venir dedens le chastel après ce qu'ilz auroient logié leurs chevaulx
dedens la ville. Lesquelz venus, dedens assez briefve espace , ledit messire Jaques , après ce qu'il eut fait plusieurs devises des guerres de France avec ledit conte, lors voiant son point, print ledit conte de Harecourt par la manche en disant : m Monseigneur, je vous fais prisonnier du Roy. » Et adonc ledit conte, moult esbahi, lui dist : « Beau cousin, que disles-vous ? je suis au Roy comme vous estes et n'ay riens fait à son préjudice ne contre sa majesté. » Toutesfoiz non obstant excusacions, lignage ou autre chose, il fut détenu prisonnier et mis par ledit messire Jaques en bien estroite garde et seure. Et lendemain, quant ledit messire Jaques eut prins tous les biens portatifz de ladicte fortresse et qu'il eut commis gens de par lui pour la garde, il se parti et emmena ledit conte de Harecourt prisonnier ou chastel du Crotoy. Duquel conte, entre les autres choses , il eut ung moult bon cheval fauvel à courte queue, lequel cheval fut depuis renommé d'estre bon et excellent pour la guerre. Et depuis ce jour en avant, demoura ledit conte prisonnier toute la vie durant dudit messire Jaques. Mais il fut par plusieurs foiz translaté d'un chastel en autre. Et estoit commune renommée qu'il estoit ainsi détenu prisonnier par le consentement de Jehan de Harecourt son filz, conte d'Aumarle.
