Le Plessier de Roye {Oise

nombre de gens d'armes, lesquelz tenoient le parti du conte d'Armignac, lesquelz furent par le moien du dessusdit Bugle de Grouches et de la communaulté d'icelle ville, contrains, par condicion qu'ilz s'en alèrent sauf leur corps et leurs biens, et en demoura icellui Bugle capitaine certain espace de temps.

En oultre, quant à parler de Testât et gouvernement dudit Perrenet le Clerc et ses complices, qui avoient livré la cité de Paris comme vous avez oy cy-dessus, ilz commencèrent à lever et tenir très-grant estât et eurent par aucun peu de temps très grande auctorité, mais en la fin demourèrent aussi povres et meschans que paravant ilz avoient esté.

Et après , ceulx de la ville de Péronne , qui tousjours avoient tenu le parti du Roy et de son filz le Daulphin et du conte d'Armignac, quant ilz oyrent les nouvelles de la prinse de Paris et la reddicion d'autres bonnes villes furent moult esmerveillez et eurent grant doubte, actendu qu'ilz estoient près des pays et puissance du duc de Bourgongne, d'estre prins d'assault ou du moins asségez. Si se mirent ensemble et conclurent de envoier devers le conte de Charrolois et son conseil afin qu'ilz peussent estre receuz à eulx mectre en l'obéissance du Roy et du duc de Bourgongne, et sur ce envoièrent leurs ambaxadeurs devers ledit de Charrolois, jà soit ce que messire Thomas de Liersis, bailli de Vermendois, les exhorta fort à tenir la partie du Daulphin. Lesquelz ambaxadeurs, c'estassavoir maistre Oudart Taperiel, ung chanoine de Saint -Foursy et aucuns autres, traictèrent tant devers le dessusdit conte de Charrolois et son conseil, que la ville se rendi en l'obéissance dudit Roy

et du duc de Bourgongne. Non obstant que les gouverneurs et habitans d'icelle eussent promis de non faire traictié ou préjudice dudit messire Thomas, néantmoins il fut prins et mené à Laon, et là décapité. Et pareillement furent décapitez Jehan de Brimencourt, son lieutenant, et Alart de Vertigneul.