CHAPITRE GGXXII
Comment messire Jehan de Luxembourg ala courir devant Alibaudlères, et autres matières.
Item, après les besongnes dessusdictes, environ dix jours devant Pasques , fut envoyé messire Jehan de Luxembourg avec cinq cens combatans, pour adviser une forteresse à six lieues de Troies vers Moyniers, nommée Alibaudières, dedens laquelle estoient aucuns Daulphinois qui moult dommagoient le pays de Champaigne. Et quant ledit de Luxembourg fut venu assez près d'icelle, il laissa la plus grant partie de ses gens en embusche et ala avec aucuns courir devant la barrière. A rencontre duquel saillirent très asprement , et tout à pié , ceulx de ladicte forteresse, et commencèrent roidement à traire et à lancer et combatre contre leurs adversaires. En laquelle besongne messire Jehan de Luxembourg chey jus de son cheval pour cause de ce que sa selle se party, mais tantost fut relevé par ses gens. Et incontinent, de grant courage, tout esmeu
de yre, ala de pie , sa lance en sa main , très vaillamment combatre à iceulx Daulphinois. Et de fait, jà soit ce que de présent eust moins de gens que eulx , leur fist clorre leurs boulevers, et se retrahirent en grant desroy. Et prestement manda ses gens qui estoient en embusclie et fist hastivement assaillir ledit bolevert , qui en conclusion fut prins d'assault et mis en feu. Mais à ce faire y eut plusieurs hommes blécez. Et après ledit messire Jehan s'en retourna à Troies devers le duc Phelippe de Bourgongne, ouquel lieu, pour ce temps, on faisoit grans préparacions pour recevoir le roy Henry d'Angleterre, qui dedens brief temps devoit venir pour solemnizer et faire la feste de son mariage.
Et ce pendant , le duc de Touraine Daulphin et ceulx de son conseil, qui estoient à Bourges en Berry, oirent certaines nouvelles des aliances qui se faisoient contre lui. Si fut pour ce en grant soussi comment il pourroit résister aux entreprinses et efforcemens des deux parties dessusdictes , c'estassavoir du roy d'Angleterre et du duc de Bourgongne, sachant que par le moins de celle aliance il estoit en péril de perdre sa seigneurie et l'actente qu'il avoit à la couronne de France. Néantmoins il eut conseil de pourveoir à son fait et soy défendre au mieux qu'il pourroit. Si fist garnir de ses gens plusieurs villes qui estoient sur les frontières de ses adversaires, et y constitua capitaines des plus féables de ceulx de son parti. Entre lesquelz, mist à Meleun le seigneur de Barbazan , grandement et bien accompaigné, à Monstereau le seigneur de Guitry, le seigneur de Gamaches à Compiengne, et ainsi en plusieurs autres lieux , et avecques ce, se
pourveut de très grant nombre de gens d'armes pour tousjours estre au plus près de sa personne, en aclendant les aventures qui de jour en jour lui pourroient survenir.
DE L'AN MCCCCXX.
[Du 7 avril 1420 au 23 mars 1421.]
