CHAPITRE GXXXVII
Comment la paix qui avoit esté faicte nouvellement devant Arras entre le Roy et le duc Jehan de Bourgongne, fut jurée solemnellement par les ambaxadeurs dudit de Bourgongne et des princes du royaume de France.
Le xiii' jour de mars ensuivant, le duc de Brabant, l'évesque de Tournay, le seigneur de Ronq , sir Guillaume Bouvier, chevalier et gouverneur d' Arras, conseiller et ambaxadeur du duc de Boui^ongne , et les
députez par les trois Estas de Flandres procureurs et aians puissance en ceste partie du duc de Bourgongne, jurèrent tous , ou nom dudit duc et pour lui , en la présence du Roy, par les foy et serement de leur corps, sur la vraie croix et sainctes évangiles de Dieu. Et pareillement ledit duc de Brabant , lesdiz ambaxadeurs dudit duc de Bourgongne , les ambaxadeurs de la dame de Haynnau et les dessusdiz députez jurèrent lesdiz seremens en leurs noms privez. Et ainsi jurèrent les ducs de Berry, d'Orléans, d'Alençon et de Bourbon, les contes d'Eu et de Vendosme, grant maistre d'ostel, le seigneur de Préaulx, le chancelier de France, l'arcevesque de Sens, de Bourges, de Rouen, les évesques de Laon, de Lizieulx, de Paris et de Chartres, le chancelier d'Acquitaine , le conte de Tancarville et plusieurs autres du grant conseil du ik)y. En après furent envoiez de Paris les commissaires du Rov, c'estassavoir le Maistre des arbalestriers de France , le seigneur de Rambures et maistre Jehan de Vailly président en parlement , et vindrent à Tournay oudit mois de mars. Ouquel lieu vindrent pareillement ledit duc de Brabant et la dame de Haynnau et Phelippe de Bourgongne conte de Charrolois , et nobles et prélatz, avecques ceulx de Gand et autres bonnes villes de toute la conté de Flandres , des appartenances et enclavemens. Et là, après la lecture et publicacion desdictes lectres de la paix , iceulx , c'estassavoir le conte de Charrolois et tous les autres dessusdiz, jurèrent les seremens dessusnommez es mains desdiz commissaires , en la présence dudit duc de Brabant et dame de Haynnau, et promirent à tenir ladicte paix et contenu desdictes lectres royaulx par la forme qu'il a
pieu au Roy à ordonner et commander , en tant qu'il leur touche. Semblablement jurèrent le clergié et les nobles de Tournay et du pays , tous baillans leurs lectres comme avoient fait lesdiz de Charrolois et de Flandres ausdiz commissaires , à porter à maistre Estienne de Mauregard, garde des Chartres du Roy, à Paris, séellées de leurs seaulx. Après, en la sepmaine peneuse, par ledit seigneur de Charrolois furent convoquez par lectres à Arras les prélas, collèges, les nobles et bonnes villes de toute la conté d'Artois et avecques, les ressors et enclaveures d'icelles, lesquelz jurèrent tous et baillèrent leurs lectres ausdiz commissaires comme avoient failles autres à Tournay. Et depuis furent envoiez de par le Roy, en Bourgongne, lesdiz commissaires, pour recevoir lesdiz seremens dudit duc de Bourgongne et des trois Estas de sadicte duchié. Lesdiz commissaires estoient , le seigneur de de Thyonville et maistre Simon de Nan terre, président en parlement, lesquelz jurèrent tous les seremens contenus esdictes lectres royaulx et les promirent à tenir comme avoient fait les autres dessusnommez , en baillant leurs lectres et en envoiant icelles audit garde des chartres du Roy à Paris. Toutesfoiz ledit duc de Bourgongne ne voult point jurer, et dist qu'il parleroit au Roy et au duc d'Acquitaine son filz, avant qu'il jurast ladicte paix, pour certaines causes qui à ce le mouvoient.
DE L'AN MCCCCXV.
[Du 31 mars 1415 au 19 avril 1416.]
