XXXV

Après lequel mandement publié à Paris, à Amiens et es autres lieux du royaume, le Roy envoya ses ambaxadeurs devers les ducs d'Orléans et de Bourgongne, leur requerre bien acertes que chascun d'eulx lui voulsissent envoier cinq cens bacinets pour lui aidier à bouter hors le roy d'Angleterre. Car point ne les vouloit avoir en personne, pour cause qu'ilz ne eussent noise Tun à l'autre. Lesquelz cinq cens bacinetz ledit duc d'Orléans fut content d' envoier. Mais depuis y ala lui mesmes avec toute sa puissance. Et le duc de Bourgongne fist response que point n'y envoieroit ses gens, mais yroit en propre personne avec tous ceulx de ses pays servir le Roy. Néantmoins, par aucune atargence qui survint, n'y ala pas, mais grant partie de ses gens se mirent sus et y alèrent.