Il se nommait Charles

[1412] D'ENGUERRAN DE MONSTRELET. :i01

Et à ung certain jour au soir, le prévost de Paris et son bourrel , acompaignez de douze hommes ou environ tenans torches alumées et portans une eschèle, avec ung prestre revestu d'une aube et paré de fanon et estole, vindrent es halles. Et tantost, le bourrel par ladicte eschèle monta où ledit chef estoit , lequel il osta de la lance où il estoit fiché, et là fut mis en ung beau suaire que le prestre tenoit, lequel envelopé dedens par ledit prestre fut mis sur son espaule et de là porté par la compaignie dessusdicte, lesdiz flambeaux ardans , en l'ostel dudit feu Montagu grant maistre d'ostel dessusdit. Et pareillement fut son corps osté jus du gibet de Montfaulcon par ledit prévost et son bourrel , et fut rendu et porté à Paris , lequel fu joinct avecques le chef et enclos en ung sarcus et fut porté en la compaignie des enfans de lui et de ses amis, à grant compaignie et triumphe, à prestres chantans et grant luminaire , à Marcoussis, et là en l'église des Célestins , laquelle en son vivant avoit fait fonder et fait un couvent de religieux, moult honnorablement fut enterré. Et entre les autres biens qu'il fist quant il vivoit, il donna à l'église de Nostre-Dame de Paris celle grande cloche laquelle il fit nommer Jaqueline^^ comme il appert par ses armes et son tymbre qui sont entour d'icelle.