OCTOBRE

ATTESTATION SUR LA SITUATION DE l'abBAYE DE LA CHALADE.

A tous ceulx qui ces présentes lettres verront et orront, Jehan Bocart, escujer, prevost en garde pour et de par le Roy nostre sire de la prevosté de Saincte Manehoult, salut. Sachent tuit que ce jourd'huj vingt neufiesme jour d'octobre, l'an mil cinq cens et quinze, comparurent en jugement par devant nous Jehan Julpin, nostre lieutenant, aagé de trente sept ans ou environ; Jehan Liétart, lieutenant du maistre sergent audict Saincte Manehoult, aagé de cinquante cinq ans ou environ; Nicolas Maugarnj, procureur et praticien, aagé de soixante deux ans ou environ; Gilles du Val, aussy praticien, aagé de soixante ans ou environ, Jehan Cochon, sergent des bois et forestz du roy nostre Sire audict Saincte Manehoult, aagé de cinquante ans ou environ ; Jehan Mengin dit Colichart, aussy sergent desdicts bois, aagé de quarante ans ou environ; Nicolas Chapperon, sergent du grenier à sel dudict Saincte Manehoult, aagé de soixante six ans ou environ; Guillaume de Buissy, sergent royal au bailliage de Victry et prevosté dudict Saincte Manehoult et greffier de Monseigneur le bailly de Victry audict Saincte Manehoult, aagé de cinquante neuf ans ou environ; Guillaume Francon, aussy sergent royal, aagé de quarante quatre ans ou environ; et Remy Housset, aussy sergent royal, aagé de vingt cinq ans ou environ, tous demourans audict Sainte Manehoult, appeliez et évocquez à la requeste et diligence de révérend père en Dieu Damp Jehan de Monbleville, abbé de l'église et monastère de La Challaide, diocèse de Verdun et ordre de Citiaulx, lesquels concordemment ensemble ont dit, juré, affermé et attesté par leurs sermens, et nous mesmes, prévost, attestons que ladicte

église et abbaye dudict lieu de La Challaide est assise es termes et limites du duchié de Bar, bailliage et prévosté de Clermont, hors les termes et limites de ce rojaulme. Et le savent parceque de tout le temps qu'ilz sont demourans audict Saincte Manehoult, distant dudict lieu de La Ghalaide à deux lieues ou environ, ilz ont fréquenté ledict lieu de La Challaide, entre lequel et ledict Saincte Manehoult y a ung ruisseau appelle communément le ruisseau de Byemme, lequel ruisseau à l'endroit et au devant dudict lieu de La Challaide fait la separacion et lymites du royaulme de France et dudict duchié de Bar, et sortissant par appel et reformation audit lieu de Clermont en Argonne. Et ainsi l'ont tousjours veu tenir, clamer et repputer. Savent aussy les dessusdictz Jehan Julpin, Jehan Liétart, Nicolas Maulgarny, Gilles du Val, Jehan Cochon et Nicolas Chapperon, que ledict bailliage de Clermont est ressortissant au lieu de Sainct Mihiel, et que les appellations interjectées par devant le bailly dudict Clermont se terminent et ressortissent aux haulx jours dudict Sainct Mihiel oultre la Meuze; lesquelz haults jours sont court souverainne, et sont les deux lieux de Clermont et de Sainct Mihiel, et bailliage d'illecques, terres d'empire. Et ainsi en ont veu joyr et user lesdicts attestans. Et si dient oultre que ledict ruisseau de Byemme faict la separacion des bans et finaiges de Clermont et dudict lieu de La Challaide à rencontre des bans et finaiges dudict Saincte Manehoult et Florent. Dont et de toutes lesquelles choses ledit révérend nous a requis avoir lettres et attestations, que luy avons octroyé en ceste forme, pour luy servir et valloir ce que de raison. En tesmoing de ce nous avons seellé ces présentes de nostre seel, qui furent faictes et passées en jugement des plaitz par nous tenus audict Saincte Manehoult les jour et au dessusdits. Ainsi signé : Herbin.

{Bibl. nat., collection Dupuy, vol. 472, foL 16).