LE SECOND MORT

Pouruéez y se vous voulez, Autrement que vous ne soulez.

Car certes la mort vous espie Pour vous ester du corps la vie Plus briefment que vous ne cuiûez.

Qui estes sy oultrecuidez Que pour ung pou de ioye vaine Ung pou de plaisance mondaine Qui est de si courte durée Tost venue et plus tost allée.

Voulez perdre la joye fine De paradis qui point ne fine :

Et qui pis est dampnés serés Aultrement n'en eschapperés Mais ce sera sans déliurance.

Comment auez vous tel plaisance Dictes moy, meschans orguilleux En ce monde si périlleux Ou il n'a que diuisions.

Diuerses tribulacions.

Puis guerre, puis mortalité.

Tousjours nouuelle aduersité Renient auant que l'autre faille :

Vous ne sauez homme sans faille Tant soit puissant veulle ou ne veulle Qui ne seuffre et qui ne se deulle :

Ailleurs doncques repos querés Car cy point ne le trouuerés.

Repos aurez en paradis.

Se croire vous voulez les dis Des saiges, qui conseillent faire Ce que faire est nécessaire Pour l'acquérir et pour l'auoir. Bien milleur nul ne peult auoir.

Faicles des biens plus que pourrés Autre chose n'emporterés.