PERCEVAL DANS L ILE

aidié a cest besoign. Car quant li anemis fu en l'eve, il l'i eust sanz faille lessié chaoir et einsint poïst estre noiez et periz, si eust perdu et cors et ame. Et il se tret en sus de l'eve, car toutevoies a il poor des asauz a l'anemi, si s'agenoille vers orient et fet ses proieres et ses oroisons teles come il les savoit. Si désire molt le jor por savoir en quel terre il est, car il pense bien que li anemis l'ait porté moût loign de l'abeie ou il vit ier le roi Mordrain.

Einsi fu Perceval jusqu'au jor en proieres et en oroisons, et atendi que li solaux ot fet son tor ou firmament et qu'il aparut au monde. Et quant li solauz fu levez biaus et clers, et qu'il ot auques abatue la rosée, lors resgarde Perceval tôt entor soi et voit qu'il est en une montaigne grant et merveilleuse et sauvage durement, qui estoit close de mer tout entor, si largement qu'il ne voit de nule part terre se trop loign non. Et lors s'aperçoit qu'il est portez en une isle, mes il ne set en quele isle ; si le savroit volentiers, mes il ne set cornent ce puisse estre, car il n'a près ne chastel ne forterece ne recet ne meson ou genz puissent habiter, ce li est avis. Et neporquant il n'est mie si seuls qu'il ne voie entor lui bestes sauvages, ors et lyons et liepars et serpenz volanz. Et quant il voit qu'il est en tel leu, si n'est mie moût aeise, car il redoute les bestes sauvages qui nel lairont mie en pes, ce set il bien, ainz l'ocirront s'il ne se puet deffendre. Et neporquant se Cil qui sauva Jonas ou ventre dou poisson et qui gari Danyel en la fosse as lyons li veut estre ci escuz et deffendemenz, il n'a garde de quan qu'il voit. Si se fie plus en s'aide et en son secors qu'il ne fet en s'espee, car ce voit il bien que par proesce de chevalerie terriane n'en porroit il eschaper, se Nostre Sires n'i metoit conseil. Et lors se resgarde et voit en mi l'isle une moût haute roche et moût merveilleuse, ou il ne quidoit avoir doute de nule beste sauvage se il s'i estoit mis. Et por ce s'adresce il celé part einsint

armez corne il estoit. Et en ce qu'il aloit celé part, si se regarde et voit un serpent qui portoit un petit lyon et le tenoit par le col as denz, et s'asist ou sommet de la montaigne. Et après le serpent coroit uns lyons criant et braiant et fesant si maie fin qu'il semble a Perceval que li lyons face son duel por le petit lyoncel que li serpenz emporte.

Quant Perceval voit ceste aventure, si cort au plus tost qu'il puet contiremont la montaigne. Mes li lyons, qui plus ert legiers, l'ot ja trespassé et ot comenciee la meslee encontre le serpent ainçois qu'il i poist estre venuz. Et neporquant, si tost come ilfu amont venuz en la roche et il vit les deus bestes, si pense que il aidera au lyon por ce que plus est naturelx beste et de plus gentil ordre quç li serpenz. Et lors tret l'espee et met l'escu devant son vis, por le feu qui mal ne li face, et vet requierre le serpent et li donc un grant cop entre les deus oreilles. Et cil gite feu et flamme si qu'il li art tôt son escu et son hauberc par devant ; et encore li eust il plus mal fet. Mes cil fu vistes et legiers et reçut le feu ausi come de tisons, si que la flamme nel feri pas de droit, et por ce fu li feux mains nuisanz. Et quant il voit ce, si est moût efl"reez : car il doute que li feus ne soit entremêliez de venim. Et toutevoies recort il sus au serpent et li done de grans cox la ou il le puet ateindre. Si li avint einsi a celui point que il l'asena en cel leu meismes ou il l'avoit asené au comencement. Et l'espee fu legiere et bone, si cola legierement parmi la teste puis que li cuirs fu entamez, a ce que li os n'estoient mie dur, si qu'il chaï morz en la place.

Quant li lyons se voit délivrez dou serpent par l'aide dou chevalier, si ne fait pas semblant que il ait talent de combatre a lui, ainz vient devant lui et besse la teste et li fet la greignor joie que il puet, si que Perceval aperçoit bien que il n'a talent de lui mal fere. Si remet s'espee ou fuerre et gite jus son escu, qui toz ert brûliez, et oste son hiaume de sa