TENTATION DE PERCE VAL I

ment que ce est nef, et est toute coverte de dras noirs, ne sai de soie ou de lin. Et quant ele est auques près, si descent, car il voldra savoir que ce est. Et il, qui bien voldroit que ce fust li preudons a qui il avoit hui parlé, descent. Si li avient si bien toutevoies, ou par la vertu de Dieu ou par autre 5 chose, qu'il n'a si hardie beste en la montaigne qui l'osast adeser ne assaillir. Et il avale le tertre et vient a la nef au plus tost qu'il puet. Et quant il est a l'entrée, si i voit seoir une damoisele de trop grant biauté, et fu vestue si richement j corne nule mielz. i ' lo

Et si tost corne ele voit venir Perceval, si selieve encontre lui et li dit sanz saluer : « Perceval, que fêtes vos ci ? Qui vos amena en ceste montaigne, qui si est estrange que james n'i s'eroiz secoreuz se par aventure n'est, ne n'i avroiz a mengier, ainz morroiz de fain et de mesaise a ce que vos n'i tro- 15 veroiz qui vos i regart ?» — « Damoisele, fet il, se je i moroie de fain, dont ne seroie je pas loiax serjanz. Car nus ne sert si haut home comeje faz, por qu'il le serve loiaument et de bon cuer, que il ne demandera ja chose qu'il n'ait. Et il meismes dist que sa porte n'est close a nul qui i viegne,mes 20 qui i boute, si i entre, et qui i demande, si a. Et se aucuns le demande, il ne se repont pas, ainz se lait legierement trover. » Et quant celé ot qu'il li fet mencion de l'Evangile, si ne respont pas a celé parole, ainz le met en autre matière et li dit : « Perceval, sez tu dont je vieng? » — « Coment, damoi- 25 selle, fet il, qui vos aprist mon non ?» — « Je le sai bien, fet ele, et vos conois mielz que vos ne quidiez. » — « Et dont venez vos, fet il, einsi ?» — « Par foi, fait ele, ge vieng de la Forest Gaste, ou je ai veue la plus merveilleuse aventure del monde dou Bon Chevalier. » — « Ha ! damoisele, fet il, 3^ dites moi dou Bon Chevalier, par la foi que vos devez a la riens ou monde que vos plus amez ! » — « Je ne vos en diroie, fet ele, ce que j'en sai ennuie manière, se vos ne me

loé LÀ QUESTE DEL S. GRÀAL

creantez sor l'ordre que vos tenez de chevalerie que vos tiiâ volenté feroiz de quele hore que je vos en semondrai. » Et il li dit qu'il le fera s'il onques puet. «Assez en avez dit, fet ele. Or vos en dirai la vérité. Voirs est que je estoie ore n'a gueres en la Gaste Forest droit ou mileu, celé part ou la grant eve cort que len apele Marcoise. Ilcc vi ge que li Bons Chevaliers vint et chaçoit devant lui deus autres chevaliers que il voloit ocirre. Et cil se ferirent en l'eve por poor de mort; si lor avint si bien qu'il passèrent outre. Mes a lui en mesavint il : car ses chevax ifu noiez et il meismcs si fust s'il ne s'en fust issuz maintenant, et par ce qu'il s'en retorna fu il gariz. Si as orc oïe l'aventure dou Chevalier que tu demandes. Or si voil que tu me dies comcnt tu l'as puis fet que tu venis en ceste islc estrange, ou tu seras ausi come perduz se tu n'en es gitez. Car tu voiz bien que ci ne vient nus dont tu aies secors, et a issir t'en covient il o a morir. Dont il covient, se tu n'en veuz morir, que tu hccs tel plet a aucun par quoi tu en sois gitez. Et tu n'en puez estre gitez se par moi non ; por quoi tu doiz tant ferc por moi que je t'en ost, se tu es sages, car je ne sai nule greignor mauvestié que de celui qui se puet aidier et nel fet. »

— « Damoiscle, fet Perceval, se je cuidoie qu'il pleust a Nostre Seignor que je m'en ississe, je m'en istroie, se je pooie, car autrement n'en voldroie je pas estre fors. Car il n'est riens ou monde que je vousisse avoir fête, se je ne cuidoie que ele Li pleust, car dont avroie je chevalerie receue de maie hore, se je l'en fesoie guerre. » — « Tout ce, fet ele, lessiez ester et me dites se vos menjastes hui. » — « Certes, fet il, de terrienne viande ne menjai ge hui. Mes ci vint ores uns preudons por moi reconforter, qui tant m'a dites de bones paroles qu'il m'a peu et resazié si largement que je n'avroie ja mes talent dtî mengier ne de boivre, tant come il me souvenist de lui. »

TË>4TATiON DE PÉRCÈVAL tô7

— « Savez vos, fait ele, qui il est ? Ce est uns enchanterres, uns mouteploierres de paroles quifet adés d'une parole cent, et ne dira ja voir qu'il puisse. Et, se vos le créez, vos estes honiz, car vos n'istroiz ja mes de ceste roche, ainzi morroiz de fain et si vos mengeront bestes sauvages ; et si em poez ja veoir grant semblance. Vos avez ja ci esté deus jorz et deus nuiz et tant com de cest jor est aie ; ne onques cil de qui vos parlez ne vos i porta a mengier, ainz vos i a lessié et lessera, que ja par lui n'i seroiz secoruz. Si sera granz domages et grant malaventure se vos i morez : car vos estes si juenes hom et si bons chevaliers que encore porriezvos molt valoir a moi et a autres se vos estes de ci gitez. Et je vos di que je vos en giterai se vos voulez. »

Qiiant Perceval ot ce que celé li offre, si lidist : « Damoisele, qui estes vos, qui si volentiers m'osteriez de ci se je voloie ? » — « Je sui, fet ele, une damoisele deseritee, qui fusse la plus riche famé dou monde se je ne fusse chaciee de mon héritage. » — « Deseritee damoisele, fet il, or me dites qui vos deserita : car assez me prent ore greignor pitié de vos qu'il ne fist hui mes. » — « Et je le vos dirai, fait ele. Voirs fu que jadis me mist uns riches bons en son ostel por lui servir, et estoit cil riches bons li plus riches rois que len sache. Et je fui si bêle et si clere qu'il n'est nus qui de ma biauté ne se poïst merveillier : car je fui bêle sor toute rien. Et en celé biauté sanz faille m'enorgueilli un poi plus que je ne deusse, et dis une parole qui ne li plgt pas. Et si tost come je l'oi dite, si fu si corrociez a moi qu'il ne me ^•out puis soffrir en sa compaignie, ainz m'enchaça povre'et deseritee, ne onques n'ot pitié de moi ne de nului qui a mon acort se tenist. Si enchaça einsint li riches bons moi et ma mesniee, et m'envoia en désert et en essil. Si me cuida bien avoir maubaillie, et si eust il fet se ne fust mes granz sens par quoi je començai màintenï^nt contre lui la guerre. Si m'en

est puis si bien avenu que moût i ai gaaingnié : car je li ai tolu partie de ses homes, qui l'ont lessié por venir a moi por la grant compaignie qu'il voient que je lor port. Car il ne me demandent riens que je ne lor doigne, et encore assez plus. Einsi sui en guerre nuit et jor contre celui qui m'a 5 deseritee. Si ai assemblez chevaliers et serjanz et gens de toutes manières ; si vos di que je ne sai nul chevalier ou monde ne nul preudome a qui je ne face oifrir l'ennor por estre de ma partie. Et por ce que je vos sai a bon chevalier et a preudome sui je ça venue, que vos m'en aidiez. Et vos 10 le devez bien fere, puis que vos estes compainz de la Table Reonde ; car nus qui compainz en soit ne doit faillir a damoisele deseritee, por qu'ele le requière d'aide. Ce savez vos bien que ce est voirs, car quant vos i fustes assis, que li rois Artus vos i mist, si jurastes vos, ou premier serement 15 que vos feistes, que ja ne faudriez mes d'aide a damoisele qui vos en requeist. » Et il dist que cest serement i fist il sanz faille ; si l'en aidera volcntiers puis que ele l'en requiert. Et ele l'en mercie molt.

Tant parlèrent ensemble que midis fu passez et l'ore de 20 none aprochiee. Et lors fu li solaux chauz et ardanz : si dist la damoisele a Perceval : « Perceval, il a en ceste nèfle plus riche paveillon de soie que vos onques veissiez. Se il vos plest, je le ferai trere fors et le ferai ci tendre por l'ardor dou soleil, que mal ne vos face. » Et il dist que ce veut il bien. Et 25 ele entre maintenant en la nef et fet tendre le paveillon sor la rive a deus serjanz. Et quant cil l'orent tendu au mielz qu'il porent, si dist la damoisele a Perceval. « Venez vos reposer et seoir tant que la nuiz viegne, et issiez fors dou soleil, car il me semble que vos eschaufez trop. » Et il entre ou paveil- 30 Ion et s'endort maintenant ; mes ele l'ot fet avant desarmer de son hiaume et de son hauberc et de s'espee ; et quant il est remes en pur le cors, si le lesse endormir.