I . Progrès d’icelle par feue Madame de Chasteauneuf

Venu donc ledit Dupont, il présenta à sa Majesté vn quarreau faict de soye et or auec vne chaire faicte de laine dudit ouurage de Turquie, que sa Majesté eut très agréable, et commanda sur l’heure audit sieur de Fourcy de faire bastir vn des logis de dessous sa Gallerie, auec vn attelier à costé pour ledit Dupont : pour estre comme vne pepiniere d’ouuriers de ladite manufacture, ce fut en l’an 1604. Auquel lieu il a tousiours fait sa demeure depuis le temps , et y a instruit plusieurs apprentifs, suiuant le commandement qu’il en auoit receu de sa Majesté, ainsi qu’il fait encore à présent.

Or le feu Roy venant vn iour veoir vn emmeublement qui se faisoit alors pour son seruice, qui estoit d’or et de soye, et qui est auiourd’hui dans l’Hostel de Luxembourg : promist en la presence de beaucoup de Seigneurs d’establir ladite manufacture par toute la France, ainsi qu’il auoit faict celle des tapisseries de Flandres, de l’or de Milan, des estoffes de draps d’or et de soye, et d’autres : affin (comme il disoit) d’empescher le transport de l’or et de l’argent qui se fait hors du pays, par le traffic continuel desdites estoffes, et par ainsi enrichir la patrie, et faire trauailler vne infinité de faineans et vagabonds.

Mais la mort funeste de ce grand Monarque ayant donné fin à ses braues et genereux desseins, arresta par mesme moyen ledit Dupont en ses entreprises : Toutesfois sçachant que les Roys ne meurent point, il s’adressa au Roy à présent régnant en l’annee 1626. venant veoir les ouurages qui se faisoient pour sa Maiesté, et luy fit entendre quelle auoit esté la deliberation du feu Roy, pour l’establissement de ladite manufacture, luy en proposant les moyens faciles, par la metode d’enseigner audit art les enfans qui demeuroient dans les Hospi-

taux, et les filles pareillement en plusieurs autres ouurages, ce que ledit Dupont promettoit et promet encore faire.

Auquel sa Majesté commanda d’en adresser la Requeste à son Conseil, affin d’y estre meurement pourveu. Ce qu’ayant délibéré faire ledit Dupont, et iugeant qu’il ne pourroit executer luy seul vne charge si onereuse, n’ayât encore aucun de ses enfans en aage competant pour luy ayder : s’associa vn qui auoit esté son apprenty, nommé Lourdet, auec lequel et conioinctement il présenta ladite Requeste au Conseil.

Et pour paruenir à cest effect, ledit Dupont et Lourdet allèrent trouuer M. de Fourcy qui auoit la charge de feu son pere, lequel les présenta à M. Aubery Conseiller d’Estat, auec ladite Requeste, pour en faire son rapport audit Conseil ; ce qu’il fit et a fait depuis auec tant de probité et d’equité, et auec tant de circonspection au bien public de la patrie, qu’il s’est montré vn rempart tellement inexpugnable contre les orages de l’enuie et de la mesdisance de quelques vns, qu’il en a obtenu les articles et Arrests suiuans, par sa seule diligence, ainsi qu’ils se peuuent icy voir, auec la suite d’une infinité de trauerses qu’ils ont rencontrez en quelques endroits.

MEDIIS TRANQVILLVS IN VNDIS.

[Ici est une tête de page avec les armes de Dupont.)