PIÈCES JUSTIFICATIVES

ARRESTÉ 1)1 PARLEMENT ÜE PARIS, PORTANT RÈGLEMENT SIR LE FAIT DES MALADES DE LA GROSSE VÉROLE.

Aujourd’hui sixième mars (1496), pour ce que en ceste ville de Paris y avoit plusieurs malades de certaine maladie contagieuse, nommée la grosse vérole , qui puis deux ans ença a eu grant cours en ce royaume, tant de ceste ville de Paris que d’autres lieux, à l’occasion de quoi estoit à craindre que sur ce printems elle multipliast, a esté advisé qu’il étoit expédient y pourveoir.

Pourquoi ont été mandés les officiers du roi en Chastelet, lesquels venus en la Cour ont remonstré qu’ils avoient esté en la maison de l’évesque de Paris, pour y mettre provision ; mais n’y estoit encore advisé parmi le tout, pour les difficultés qui se trouvoient.

Si leur a ordonné la Cour y pourveoir, et pour assister avec ledit évesque a. esté commis M. Martin de Bellefaye, et moi, greffier (Pierre de Cerisay) en sa compagnie.

Et après ce que en la maison dudit évesque avons communiqué ensemble, me a été enjoint en faire l’ordonnance, ce que ai fait selon les articles ci-après enregistrés , laquelle Ordonnance par moi portée en Chastelet, et délivrée au prévost de Paris, a été mise à exécution, et jusques-ci bien gardée.

Pour pourveoir aux inconvénients qui adviennent chacun jour par la fréquentation et communication des malades, qui sont de présent en grand nombre en ceste ville de Paris, de certaine maladie contagieuse, nommée la grosse vérole, ont été advisés, concluds et délibérés par révérend père en Dieu monsieur l’évesque de Paris, les officiers du roi, prévôts des marchands et

eschovins de Paris, et le conseil et avis de plusieurs grants et notables personnaiges de tous estats, les points et articles qui s'en suivent.

I. Premièrement sera fait cry public, de par le roi, que tous malades de ceste maladie de grosse vérole estrangièrs, tant hommes que femmes, qui n’estoient demourans et résidens en ceste ville de Paris, alors que ladite maladie les aprins, vingt et

* quatre heures après ledit cry fait, s’envoisent et partent hors de ceste dite ville de Paris ès pays et lieux dont ils sont natifs, ou là où ils faisoient leur résidence, quand ceste maladie les a prins, ou ailleurs où bon leur semblera, sur peine de la hart. Et à ce que plus facilement ils puissent partir, se retirent ès portes Saint-Denis et Saint-Jacques, où ils trouveront gens députés, lesquels leur délivreront à chacun 4 sols parisis, en prenant leur nom par escript et leur faisant défenses, sur la peine que dessus, de non rentrer en ceste ville jusques à ce qu’ils soyent entièrement garis de ceste maladie.

II. Item. Que tous les malades de ceste maladie, estant de ceste Ville, ou qui estoient résidens et demourans en ceste ville, alors que ladite maladie leur a prins, tant hommes que femmes, qui ■avont puissance de eulx retirer en maisons, se retirent dedans les dites vingt et quatre heures, sans plus aller par la ville, de jour ou de nuit, sur ladite peine de la hart. Et lesquels ainsi retirés en leurs dites maisons , s’ils sont povres et indigents, pourront se recommander aux curés et marregliers des paroisses dont ils seroient. pour estre recommandés ; et, sans ce qu’ils partent de leurs dites maisons, leur sera pourveu de vivres convenables.

III. Item. Tous autres povres malades de ceste dite ville, hommes qui avont prins icelle maladie, eulx résidens, demourans ou servans en ceste ville , que ne avont puissance de eùlx retirer en maison dedans les vingt-quatre heures après le cri fait, sur ladite peine de la hart, se retirent à Saint-Germain-des-Prés, pour estre et demourer ès maisons et lieux qui leur seront baillés et délivrés par les gens et députés à ce faire, auxquels lieux durant ladite maladie, leur sera pourveu de vivres et autres choses nécessaires, et auxquels l’on défend sur ladite peine de la hart de non rentrer en ceste dite ville de Paris, jusques à ce que ils soient entièrement garis de ladite maladie.

IV. Item. Que nul soit si hardi de prendre lesdits 4 sols parisis, s’il n’est estrangier, comme dit est , ou qu’il voulust partir de ceste dite ville sans plus entrer jusques à ce qu’il soit entièrement gari.

V. Item. Et quant aux femmes malades, leur sera pourveu des autres maisons et demourances, esquelles elles seront fournies de vivres et autres choses à eulx nécessaires.

VI. Item. A esté ordonné que, pour satisfaire audit cri, lesdits malades qui estoient de cette ville, qui estoient demourans en ceste ville à l’heure qu’ils ont été prins de ceste dite maladie, seront mis en la maison, que ja a esté louée pour ceste cause à Saint-Germain-des-Prés, et où elle ne pourroit fournir, seront prins granges et autres lieux estant près d’icelles, afin que, plus facilement, ils puissent estre pansés ; et en ce cas seront ceulx à qui seront lesdites granges et maisons, rémunérés et satisfaits de leurs louaiges par ceulx qui sont commis députés à recevoir l’argent cueilli et levé en ceste ville de Paris pour lesdits malades, par l’ordonnance desdits évesques et officiers du roi et prévost des marchands, et à ce souffrir seront contraints réaument et de fait.

Vil. Item. Après ledit cry fait, sera pourveu par ceulx qui sont commis à recevoir ledit argent, à ce qu’ils mettent deux hommes, c’est à savoir ung à la porte Saint-Jacques et l’autre à la porte Saint-Denis, pour, en la présence de ceulx qui seront commis par les officiers du roi et prévost des marchands, payer lesdits 4 sols parisis, et prendre les noms par escript de ceux qui les recevront, et leur faisans les défenses dessus dites.

VIII. Item. Sera ordonné par le prévost de Paris aux examinateurs et sergeps, que ès quartiers dont ils ont la charge, ils ne souffrent et permettent aucuns d’iceulx malades aller, converser ou communiquer parmi la ville ; et où ils en trouveront aucuns, ils les mettent hors d’icelle ville, ou les envoient ou manent en prison pour estre pugnis corporellement selon ladite ordonnance.

IX. Item. Après ledit cry mis à exécution , soient ordonnés gens par lesdits prévost et échevins, lesquels se tiendront aux portes de ceste ville de Paris, pour garder et défendre qu’aucuns malades de ceste maladie ne entrent apertement ou secrètement en ceste dite ville de Paris.

X. Item. Soit pourveu par ceulx qui sont députés à recevoir l’argent donné et ausmoné auxdits malades, à ce que à iceulx retirés esdites maisons soit pourveu de vivres et autres choses nécessaires soingneusement et en diligence, car autrement ils ne pourroient obéir auxdites ordonnances.

No 2.