CHAPITRE II

L'an de l’Incarnation Nostre Seigneur mil deux cens Ixxxvi, le jour de la Purification de la benoiste Vierge Marie, Edouard roy d'Angleterre espousa la fille du roy de France que on appelloit le beau roy, ausquelles nopces se trouvèrent grant nombre de princes et barons tant d'une part que d'autre, entre lesquelz si trouva le conte Guillaume de Haynault qui avoit espousé la fille de Charles

de Valois frère dudit beau roy. Icelluy Guillaume passa la mer avec grant nombre de chevaliers et gentilzhommes de France pour conduyre et faire honneur à ladicte royne. Mais pourtant que nous n'avons pas encommencé ceste matière pour racompter le grant honneur que on feist à la royne, nous n’en parlerons point plus avant, ains parlerons dudit Guillaume qui fut cause mettre ceste présente hystoire en évidence. Cestuy duc de Haynault tant monta par sa prouesse en honneur et valeur de chevalerie qu’il fut nommé le dieu de prouesse. Et feit tant de haultes entreprinses en son temps qu'il n'avoit voisin qui n’eust paour et craincte de le courroucer. Et quant il avoit à faire quelque grosse chevauchée et entreprinse contre quelcun, chascun venoit incontinent à son ayde si faire le povoit par honneur. Or il advint que quant les nopces furent passées, le gentil conte de Haynault eut désir et voulenté d’aller veoir et visiter le pays d'Angleterre, car jamais n'y avoit esté ; sise mist en chemin pour aller veoir les villes, bourgs, citez et chasteaulx dont nous n'en voulons à présent deviser, ains nous tirerons à la matière dont à présent parler voulons. Or il advint ung Jour que ce gentil conte ung soir arriva en une abbaye située près la rivière de Hombre qui estoit appellée Burtimer pour ce que le roy Burtimericus avoit fondée icelle abbaye en l'honneur de Dieu et de saint Pierre qui luy avoit donné une fois victoire contre les mescréans de Germanie. Et quant ce gentil conte eut prins son hostel en icelle abbaye, l’abbé le receut moult |joyeusement et luy feist moult grant honneur, et mena le conte par tous les lieux de l’abbaye. Et entre autres lieux, il le mena veoir une vieille tour qui estoit près de son église laquelle il vouloit faire réédiffier pour estre appropriée au service de Dieu et del’Eglise. Et quant le conte futvenu près d'icelle tour il la print moult à regarder pour l’ancien ouvrage dont elle estoit bastie, car la muraille d'icelle tour avoit bien quatorze piedz d'espesseur au lieu là où les ouvriers qu’il y avoit mis l'avoient commencé à percer. Et l’abbé qui tenoit le conte par la main dextre commença à luy dire : « Sire, je voy que ceste tour vous semble moult merveilleuse », et le print de rechief par la main et le mena vers ung arc voulté qui estoit par dedans le mur, moytié en terre et moytié dehors, et puis luy dist telles parolles : « Sire conte, vous povez veoir ceste [armaire 1528, armairie 1531] qui est dedans ce mur, par ma foy elle souloit estre par dehors si subtillement fabriquée qu’il n'estoit homme vivant qui l’eust peu appercevoir. Mais quant les ouvriers l'eurent trouvée d'aventure qui à l'endroit vouloient faire ung huys ilz me mandèrent quérir, car ilz

ne vouloient point mettre les mains aux Jovaulx qui estoient dedans au dessus de l'autel que vous voyez sans le me faire assavoir. Et sachez pour vérité qu'il y avoit léans ung livre de Cronicques, et par dessus y avoit une couronne moult riche appartenant à ung roy. Et quant je euz apperceu ce livre, Je le feiz porter en ma chambre et commençay à ouvrir le livre, mais je ne peuz sçavoir ny entendre en quel langage il estoit escript, et la couronne je l’envoyay [1528, 4] au roy Edouard qui est à présent : car à moy n’appartenoit pas. Et quant au regard de la cronique 11531, #] je l'ay gardée plus de dix ans, et tant qu'il y a environ ung an qu'il arriva une nef du pays de Grèce, et en icelle nef avoit ung clerc de Grèce qui venoit en ce pays pour vouloir apprendre philosophie en la langue latine, car de cela est l'estude à Paris; mais iln y povoit plus estre ne demourer pour ung homicide qu'il avoit commis, et feiz tant envers ce qu’il me translata ce livre de grec en latin, car il ne sçavoit point le langage breton. Et veulx bien que vous sachez que l'hystoire est moult plaisante et délectable à ouyr, et est moult prouffitable et advantageuse en l'art de chevalerie qui bien la vouldra entendre, et n’est nul chevalier que si une fois l’a leue et visitée

qu'il n’en vaille mieulx. » Et lors le conte dit à l'abbé : « Sire, je vous prie que je puisse faire lire le livre à mon clerc, car il entend ung peu le latin, et le surplus lui feray exposer en françois. — Sire,

dit l'abbé, jele vueil trèsbien puisque vous estes estrangier, carjene vouldroye pas que le livre fust encores leu en ce pays. Si le feray escripre et copier par plusieurs affin que je ne perde l'original. » Et lors le conte dit à l’abbé : « Sire, ne vous doubtez aucunement de moy. — Non fais je, dist l'abbé, ains plus tost le vous bailleroy pour en faire à vostre voulenté. » Et alors manda l'abbé quérir le livre et luy mesmes en leut en la présence du conte, et ce qu'il pouvoit entendre 1l l'exposoit en françois. Et pource que nous traicterons de l'hystoire cy après plus amplement nous nous en déporterons pour le présent, mais je vous veulx bien advertir que le livre est ainsi intitulé : En ce livre est contenu l'histoire longuement celée et absconsée d’un bon roy nommé Perceforest roy de Bretaigne. Et quant le conte se fut délecté et esjouy ung long temps des beaulx propos touchant les armes, batailles et amours qui sont contenuz au livre, il luy pleut et fut tant aggréable que c’estoit tout son plaisir que d’avoir la copie du livre, et ne se peut taire qu'il ne le dist à l’abbé. Et l’abbé luy respondit : « Sire, je seroye joyeulx par ma foy sije vous povoye faire plaisir : mais tant y a que le clerc grec qui est céans il y a plus de demy an ne m'en a encores translaté que

cecy, et Je crains beaucoup de tomber en la malvueillance des gentilzhommes de ce pays : car s’ilz sçavoient que vous en eussiez eu premièrement la coppie, 1lz m'en sçauroyent mal gré. Et si debvez sçavoir que par cestuy cy j'en pourroye avoir dedans brief temps trois ou quatre dont je pourroye appaiser les seigneurs. — Sire, dist le conte, je ne vouldroye pas que pour moy vous feussiez mis en hayne des seigneurs du pays, mais si vous povez bonnement, je vous prie tant comme je puis, que je puisse avoir cestuy cy tant que je l’aye fait copier. Et je vous prometz que je le mettroy en tant de mains pour le copier que vous le raurez dedans ung moys ; » et pour vous le faire bref, tant pria le conte l’abbé qu’il en eut la copie avant que de se départir d'avec luy, et l'apporta au pays de Haynault sa conté. Et puis 1l print moult de peine. et soucy de sçavoir comment et par qui il le pourroit faire translater de latin en françois. Et en la finil s'advisa qu'il y avoit à Crespin en l’abbaye de sainct Landelain ung movne de sa congnoissance, auquel il pria et requist que de teste œuvre il se voulsist entremettre. Et le moyne qui désiroit fort de faire tous plaisirs et services au conte luy respondit qu'il verroit voulentiers que c’estoit. Et le conte luy bailla le livre pour mettre l'œuvre à fin, fust par luy ou par autre. Je ne vous vueil pas dire que le moyne entreprinst l’œuvre à faire de paour de mesprendre, car je sçay bien que celluy qui l’entreprint ne vouloit pas adoncques estre de l’œuvre blasmé ne loué, pourtant qu'il l’entreprint assez doubteusement. Car il estoit requis à celluy qui vouloit faire l'œuvre estre instruict pour aorner et vestir l'œuvre de parolles dont le personnage ne se sentoit pas bien pourveu, car 1l convenoit selon la matière que les parolles fussent colorées d'armes et d’amours, dont le conte le pria moult que l’œuvre en fust aornée. Et aussi le gentil prince puis après en feit si grans faictz d'armes en faisant joustes et tournoys tant de la lance que de l'espée qu'il passa tous ses voisins en prouesses et renommées. Car la voix couroit de luy par tout le monde qu'il estoit le plus preux et hardy de tous les chrestiens, tellement que par les haultes entreprinses qu il faisoit 1l délaissa les petites, dont il advint qu’il ne luy chalut plus guères de l’histoire, parquoy elle en demoura plus longuement à estre mise à fin. Et pourtant qu'il n’est chose en ce monde qui puisse avoir fin sans commencement, nous commencerons cest œuvre à l'honneur de Dieu, de la benoiste Vierge Marie et l'édiffication de noblesse et chevalerie, et dirons premièrement

de quelles gens les ysles de la Grant Bretaigne et Escosse ont esté habitées.

Comment Brutus yssu du noble sang des Troyens tua ses père et mère, puis s'en alla en Grèce.