CHAPITRE VIII

Quant Brutus eut ainsi par telle pestilence dégastées toutes les villes et places d’Acquitaine il vint au lieu où est de présent située et assise la cité de Tours, laquelle comme Homère le tesmoigne il

fonda par après. Et quant il congneut le lieu estre trésconvenable pour sa retraicte, il y tendit ses tentes et pavillons, affin que s'il estoit besoing, il se peust retirer dedans, car il avoit occasion de craindre pour cause de Goffarion que avecques les roys et princes de Gaulle avec grant compaignie de gens armez estoient venuz près dudit lieu. Et quant les tentes furent tendues il attendit là Goffarion [1531 v°] par l'espace de deux jours ayant grant fiance [1528 v°] en sa prudence et en sa hardiesse. Et après que Goffarion fut adverty que la compaignie des Troyens estoit illec assemblée, ne cessa nuyt ne Jour de chevaucher et traverser pays pour les rencontrer. Et commanda à ses gens quilz les prinssent comme brebis pour les détenir en son royaulme. Et lors tous ses gens qu'il avoit amenez avecques luy se armèrent, et eulx establiz par douze compaignies ilz s'en vont vers leurs ennemvys. Et aussi Brutus de son costé se disposa d'aller à l'encontre d'eulx, et ne marchoit pas indiscrètement, mais avecques sa compaignie en les enseignant sagement de ce qu'ilz avoient à faire, et comment ilz devoient assaillir et combatre leurs ennemys, et aussi leur remonstroit comment ilz se devoient deffendre. Et quant l’assault fut commencé les Troyens avoient du meilleur au commencement, et firent lors une cruelle occision de leurs ennemys, car ilz en occirent plus que les autres plus de deux mille dont les autres furent moultesbahiz, et cuydèrent tous prendre la fuite. Mais on dit que là où le plus grant nombre des ennemys habonde voulentiers leur eschet la victoire, parquoy ceulx de Gaulle qui estoient trois fois plus que les autres, Jaçoit ce que au commencement ilz eussent esté oppressez, toutesfois en la partfin 1lz firent ung moult grand esbahissement aux Troyens de toutes pars, car en les mettant à cruelle occision ilz les contraignirent de eulx retirer en leurs tentes, et tellement qu'ilz eurent sur eulx la victoire. Et ce pendant Corineus de nuyt bastit ung conseil à Brutus qui estoit tel que Corineus sortiroit celle nuyt par aucunes voves, et se retireroit en la forest qui estoit près de là pour reposer jusques au Jour, et quant Brutus seroit yssu au matin et qu'il se combatroit à ses ennemys Corineus y arriveroit à toute sa compaignie et assailliroit les ennemys et les mettroit à desconfiture : laquelle sentence et oppinion pleut bien à Brutus. Et lors Corineus ainsi qu'il avoit dit saillit malicieusement hors, et à tout trois mille hommes s'en alla embuscher ès plus secretz lieux de la forest. Et quant le jour fut venu et que Brutus eut ordonné ses batailles, et que les tentes furent ouvertes il saillit hors pour combatre, et tantost s'approchèrent de luy ceulx de Gaule et leurs batailles préparées qui se

meslèrent ensemble, et lors eussiez veu gens trébuscher par milliers tant d'ung costé que d’autre, car nul n'espargnoit son adversaire. Et y avoit là ung Troyen qui estoit nepveu de Brutus nommé Turnus plus fort et plus hardy que nul autre, excepté Corineus. Celluy Turnus occist tout seul de son espée six cens hommes, mais il fut enclos parles chevaliers de Gaule et fut mis à mort. Du nom d'icelluy la cité de Tours print son nom pourtant qu’il fut illec ensevely. Et ainsi que les deux batailles se combatoient aigrement l'ung contre l’autre Corineus survint, et légièrement il assaillit ses ennemys vers leurs dos, parquoy les siens furent en trop plus grande hardiesse, et les ennemys plus esbahiz. Si furent moult espoventez ceulx de Gaulle de la seulle clameur de Corineus qui les avoit ainsi assailliz au dos, et cuydoient les Acquitains quil eust beaucoup plus de gens que ïl n'avoit. Si se misrent tantost à gaigner les champs et à fuyr, et les Troyens les suyvoient de deux costez, et en fuyant les abatoient par terre et ne les habandonnèrent point jusques à ce que d'eulx ilz eussent remporté victoire. Et Jaçoit que Brutus eust remporté telle victoire de ses ennemys et qu'il en deust démener grant Joye, toutesfois 1l estoit grandement oppressé de douleur pourtant que il voyoit que le nombre de ses gens appétissoit de jour en Jour, et ceulx de Gaulle multiplyoient tousjours par le secours qu'on leur donnoit, parquoy il estoit fort en doubte s'il combatroit plus longuement ses ennemys ou non. Et finablement il esleut pour le mieulx de retourner en ses nefz et sauver la plus grant partie des gens qu'il avoit encores, et de soy enquérir de l'isle qui par les admonnestemens divins et de la déesse Dyane luy avoit esté dicte et déclairée auparavant, et sans plus arrester il se retira à ses nefz par le conseil de ses gens, et les remplist de toutes les richesses qu'ilavoit conquises. Et luy entré dedans ses nefz après qn'il eut bon vent il feist tant quil arriva au port de Toconiso, et s'appelloit lors ceste isle Albion qui n'estoit habitée de nully fors et excepté d’ung petit de gens, et estoit icelle isle fort habondante et plantureuse de bons fleuves plains de poissons, et à l'entour et au devant estoient moult belles forestz. Si print à Brutus voulenté de habiter en icelle isle, et aussi faisoit il à ses compaignons, et en cherchant par les contrées et provinces du pays ilz trouvèrent les grans géans qui habitoient et estoient dedans les cavernes des montaignes. Et après qu'ilz eurent ung petit demouré là ilz partirent entre eulx le pays que leur gouverneur leur avoit donné, et commencèrent lors à cultiver et labourer les terres, et édiffier des maisons, et firent tellement leur devoir que en peu de temps vous eussiez jugé que icelle isle eust esté habitée dès le commencement du monde.

Comment Brutus arriva en Bretaigne, et appella icelle isle Brelaigne selon son nom, et Corineus appella de son nom Cor-

nouaille.