Au pris, en comparaison

eschaufFé et bien courroucé, car j'ay ouy qu'il disoit qu'il venoit de la guerre et que les dyables d'enfer avoit trouvés et non pas hommes. En m'en venant à quatre ou cinq mille d'icy suis passé en ung village où j'ay laissé tout plain de leurs gens de pied qui y sont logez, et semble ad vis à les veoir qu'ilz soient bien las. » Alors dist le bon chevalier : « Je vous donne ma vie se ce ne sont leurs gens de pied que nous avons aujourd'huy combatuz, qui n'ont pas voulu aller jusques à Sainct-Boniface. Si vous voulez ilz sont nostres ; la lune est clère , faisons repaistre noz chevaulx, et sur les trois ou quatre heures allons les resveiller. » Son oppinion fut trouvée bonne; on fist penser les chevaulx le mieulx qu'on peut, et après avoir assis le guet, chascun se mist au repos. Mais le bon chevalier qui taschoit d'achever son entreprise ne reposa guères ; ains environ les trois heures après minuyt, sans faire bruit, monta à cheval avecques ses gens et s'en vint droit à ce village où estoient demourez les gens de pied véniciens, lesquelz ilz trouvèrent endormys comme beaulx pourceaulx, sans aucun guect, au moins, s'il y en avoit, il fut trèsmauvais. Eulx arrivez commencèrent à crier : « Empire ! Empire ! France ! France ! à mort ! à mort ! » A ce joyeulx chant s'esveillèrent les rustres qui sortoient des maisons les ungs après les autres, mais on les assommoit comme bestes. Leur cappitaine, acompaigné de deux ou trois cens hommes, se gecta sur la place du village, où là se cuydoit assembler et fortiffier; mais on ne luy en donna pas le loysir, car il fut chargé par tant d'endroitz que lui et tous ses gens furent rompuz et deffaictz , et n'en demoura que trois

en vie, dont l'ung fut le cappitaine et deux autres gentilzhommes qui estoient frères, pour lesquelz, en les relaschant, on retira deux autres gentilzhommes françois prisonniers es prisons de la seigneurie de Venise. Quant le bon chevalier eut du tout et à son grant honneur achevé son entreprise, ne voulut plus séjourner, doubtant nouvel inconvénient : si se retira avecques tous ses gens dedans Véronne, où il fut receu à grant joye. Et au contraire les Véniciens, quant ilz sceurent la perte de leurs gens, furent bien marris , et en voulut messire André Grit, providadour de la Seigneurie, blasmer le cappitaine Jehan-Paule Moufron de ce qu'il les avoit laissez derrière; mais il s'excusa très bien, en disant qu'il n'avoit esté à luy possible les tirer du village où ilz avoient esté deffaictz, et de l'inconvénient les avoir très bien advisez, mais jamais ne les avoit sceu renger à congnoistre la raison. Toutesfois en luy-mesmes se pensa bien venger en peu de jours ; mais il acreut sa honte, ainsi que vous entendrez.