CHAPITRE XLIV

Comment le pape envoya une bende de sept à huyt mille hommes devant une place du duc de Ferrare, nommée la Bastide, et comment Hz furent deffaictz par Vadvis du bon chevalier sans paouret sans reprouche.

Quant le pape fut dedans la Myrandolle, fist ung jour assembler son nepveu et tous les cappitaines, tant de cheval que de pied, ausquelz il dist comment il vouloit sans plus autre chose entreprendre aller mettre le siège devant Ferrare ; si vouloit sur ce avoir leur advis, et comment la chose se pourroit plus seurement conduire; car il sçavoit ladite ville forte à merveilles et bien garnye de bonnes gens de guerre et d'artillerie, et que à grant peine, sans faulte de vivres, l'auroit-il qu'elle ne luy coustast beaucoup, mais par ce point les feroit-il venir à la raison, considéré qu'il avoit le moyen de leur coupper le passage du Pau, que au-dessus de Ferrare ne leur viendroit riens, et du dessoubz que les Véniciens aussi garderoient bien qu'ilz n'en auroient point. Il n'y eut celluy qui n'en dist son oppinion, tant que ce fut à parler à ung cappitaine de la seigneurie de Venise, qu'on appelloit Jehan Fort, qui en son langaige et en s'adressant au pape dist : « Très Sainct-Père, j'ay ouy

les oppinions de tous messeigneurs qui sont icy en présence; et à les ouyr, concluent, suyvant ce qu'avez proposé que, en gardant que par le Pau n'entrent vivres dedans Ferrare, et que par l'isle soit assiégée, en peu de jours sera affamée; je congnois le pays, et en a beaucoup et de bon le duc de Ferrare. Par Argenté^ luy pourront vivres venir en habondance, mais à cela pourvoyroit-on bien. D'autre part, il a ung pays qu'on appelle le Polesme de Sainct-George ^, qui tant est garny de biens que, quant d'ailleurs n'en viendroit à Ferrare, il est suffisant la nourrir ung an ; et est bien difficille de garder qu'il n'en eust de là, sans prendre une place à vingt et cinq mille dudit Ferrare, qu'on appelle la Bastide^ ; mais si elle estoit prise, je tiendrois la ville affamée en deux moys, au grant peuple qui est dedans. — A grant peine eut le cappitaine Jehan Fort achevé son propos que le pape ne dist : « Or, à coup, il fault avoir ceste place ; je ne seray jamais à mon ayse qu'elle ne soit prise. » Si furent ordonnez deux cappitaines espaignolz avecques deux cens hommes d'armes, ce cappitaine Jehan Fort avecques cinq cens chevaulx légiers, et cinq ou six mille hommes de pied pour aller exécuter ceste entreprise, acompaignez de six pièces de grosse artillerie. Eulx assemblez, se misrent à chemin et allèrent sans rencontre trouver jusques devant la place. Quant le cappitaine qui en avoit la garde veit si grosse puissance, eut frayeur, et non