CHAPITRE L

Comment le duc de Nemours reprist la ville de Bresse sur les Véniciens, où le bon chevalier sans paour

276 fflSTOIRE DE BAYART

et sans reprouche acquist grant honneur^ et comment il fut blessé quasi à mort.

Le duc de Nemours, qui ne voulut point songer en ses affaires, après qu'il fut monté au chasteau assembla tous ses cappitaines pour sçavoir qu'il estoit de faire, car dedans la ville y avoit gros nombre de gens, comme huyt mille hommes de guerre et douze ou quatorze mille vilains du pays qui s'estoient avecques eulx assemblez, et si estoit la ville forte à merveilles. Ung bien y avoit, qu'on descendoit du chasteau en la citadelle sans trouver fossé qui guères donnast empeschement ; bien avoient fait ung bon rampart. Or en toute l'armée du roy de France n'estoient point alors plus de douze mille combat ans, car une grosse partie estoit demourée à Boulongne. Toutesfois, au peu de nombre qui y estoit n'y avoit que redire, car c'estoit toute fleur de chevalerie, et croy que cent ans paravant n'avoit esté veu pour le nombre plus gaillarde compaignie et davantage avecques le bon vouloir que chascun avoit de servir son bon maistre le roy de France. Ce gentil duc de Nemours avoit tant gaigné le cueur des gentilzhommes et des adventuriers qu'ilz feussent tous mors pour luy. Eulx assemblez au conseil, fut demandé par ledit seigneur à tous les cappitaines leur advis, que chascun dist au mieulx qu'il sceut; et pour conclusion fut ordonné qu'on donneroit l'assault sur les huit ou neuf heures l'endemain matin , et telle fut l'ordonnance : c'est que le seigneur de Molart avecques ses gens de pied conduyroit la première pointe, mais devant luy yroit le cappitaine

Hérigoye et ses gens escarmoucher ; après en une troppe marcheroient ce cappitaine Jacob, que l'empereur Maximilian avoit devant Padoue en la bende du prince de Hanno (mais par moyens fut gaigné au service du roy de France, et avoit alors deux mille lansquenetz), les cappitaines Bonnet, Maugiron, le bastard de Glèves* et autres, jusques au nombre de sept mille hommes, et le duc de Nemours, les gentilzhommes que conduysoit le grant séneschal de Normandie^, avecques la plus grosse force de la gendarmerie à pied marcheroient à leur costé, l'armet en teste et la cuyrasse sur le doz ; et monseigneur d'Alègre seroit à cheval à la porte Sainct-Jehan, qui estoit la seulle porte que les ennemys tenoient ouverte, car ilz avoient muré les autres, avecques trois cens hommes d'armes pour garder que nul ne sortist. Le vertueux cappitaine de la Palisse ne fut point à l'assault, car le soir de devant il avoit esté blessé en la teste d'ung esclat, par ung coup de canon qu'on avoit tiré de la ville au chasteau. Geste ordonnance faicte, chascun la trouva bonne, excepté le bon chevalier, qui dist après ce que le duc de Nemours selon son ordre eut parlé à luy : « Monseigneur, saufve vostre révérence et de tous messeigneurs, il me semble qu'il fault faire une chose dont nous ne parlons point. » Il luy fut demandé par ledit seigneur de Nemours que c'estoit : « C'est, distil, que vous envoyez monseigneur de Molart faire la première pointe ; de luy je suis plus que asseuré qu'il ne recullera pas, ne beaucoup de gens de bien qu'il a