Quatrin (quattrino), quatrième partie du denier

294 HISTOIRE DE BAYART

ne pourroit attaindre, suis venue pour vous suplier très humblement qu'il vous plaise avoir pité de nous en eslargissant vostre acoustumée libéralité. Vecy ung petit présent que nous vous faisons ; il vous plaira le prendre en gré. » Alors prist la boete que le serviteur tenoit, et l'ouvrit devant le bon chevalier qui la veit plaine de beaulx ducatz. Le gentil seigneur, qui oncques en sa vie ne fist cas d'argent, se prist à rire et puis dist : « Madame, combien de ducatz y a-il en ceste boete? » La povre femme eut paour qu'il feust courroucé d'en veoir si peu, luy dist : « Monseigneur, il n'y a que deux mille cinq cens ducatz ; mais si vous n'estes content, vous en trouverrons plus largement. » Alors il dist : « Par ma foy, madame, quant vous me donneriez cent mille escus, ne m'auriez pas tant fait de bien que de la bonne chère que j'ay eue céans et de la bonne Visitation que m'avez faicte, vous asseurant qu'en quelque lieu que je me trouve, aurez, tant que Dieu me donnera vie, ung gentilhomme à vostre commandement. De voz ducatz, je n'en vueil point et vous remercye; reprenez-les. Toute ma vie ay tousjours plus aymé beaucoup les gens que les escuz, et ne pensez aucunement que je ne m'en voyse aussi content de vous que si ceste ville estoit en vostre disposition et me l'eussiez donnée. » La bonne dame fut bien estonnée de se veoir esconduyte; si se remist encores à genoulx, mais guères ne luy laissa le bon chevalier, et relevée qu'elle fut, dist : « Monseigneur, je me sentirois à jamais la plus malheureuse femme du monde, si vous n'emportiez si peu de présent que je vous fais, qui n'est riens au pris de la courtoysie que m'avez cy-devant faicte et faictes encores à pré-

sent par vostre grande bonté. » Quant le bon chevalier la veit ainsi ferme et qu'elle faisoit le présent d'ung si hardy courage, luy dist : « Bien doncques, madame, je le prens pour l'amour de vous; mais allez-moy quérir voz deux filles, car je leur vueil dire adieu. » La povre femme, qui cuydoit estre en paradis de quoy son présent avoit enfin esté accepté, alla quérir ses filles, lesquelles estoient fort belles, bonnes et bien enseignées, et avoient beaucoup donné de passe-tems au bon chevalier durant sa maladie, parce qu'elles sçavoient fort bien chanter, jouer du luz * et de l'espinete, et fort bien besongner à l'esguille. Si furent amenées devant le bon chevalier, qui, cependant qu'elles s'acoustroient , avoit fait mettre les ducatz en trois parties, es deux à chascune mille ducatz et à l'autre cinq cens. Elles arrivées se vont gecter à genoulx, mais incontinent furent relevées; puis la plus aisnée des deux commença à dire : « Monseigneur, ses deux povres pucelles à qui avez tant fait d'honneur que de les garder de toute injure viennent prendre congé de vous, en remerciant très humblement vostre seigneurie de la grâce qu'elles ont receue, dont à jamais pour n'avoir autre puissance seront tenues à prier Dieu pour vous. » Le bon chevalier, quasi larmoyant en voyant tant de doulceur et d'humilité en ses deux belles filles , respondit : « Mes damoyselles, vous faictes ce que je devrois faire ; c'est de vous remercier de la bonne compaignie que m'avez faicte, dont je m'en sens fort tenu et obligé. Vous sçavez que gens de guerre ne sont pas