Ne se faignoient pas, n'étaient pas fainéants

306 HISTOIRE DE BAYART

retirer l'armée pour le soir, affin d'eulx reposer, car d'heure en autre estoit attendu le combat, pour estre leurs ennemys à deux mille ou environ d'eulx. Le soir après soupper, plusieurs cappitaines estoient au logis dudit duc de Nemours, devisans de plusieurs choses, mesmement de la bataille. Si adressa sa parolle au bon chevalier sans paour et sans reprouche icelluy seigneur de Nemours et luy dist : « Monseigneur de Bayart, avant vostre venue, les Espaignolz, par de noz gens qu'ilz ont prins prisonniers, demandoient tousjours si estiez point en ce camp, et à ce que j'en ay entendu font grosse estime de vostre personne. Je serois d'advis, s'il vous semble bon, car jà de long-temps congnoissez leur manière de faire, que demain au matin ilz eussent de par vous quelque escarmouche, de sorte que les puissez faire mettre en bataille et que voyez leur contenance. » Le bon chevaher, qui pas mieulx ne demandoit, respondit : « Monseigneur, je vous prometz ma foy que. Dieu aydant, devant qu'il soit demain midy, je les verray de si près que je vous en rapporteray des nouvelles. » Là estoit présent le baron de Béarn, lieutenant du duc de Nemours, lequel estoit advantureux chevalier, et tousjours prest à l'escarmouche. Si pensa en soymesmes que le bon chevalier seroit bien matin levé s'il la dressoit plus tost que luy , et assembla aucuns de ses plus privez, ausquelz il déclaira son vouloir, à ce qu'ilz se tiensissent prestz au jour poignant*. Vous orrez ce qu'il en advint.