CHAPITRE II

Et en peult l'en ouvrer en plusieurs et diverses guises et manières et luy donner diverses couleurs et tainctures, pour draps de graine que l'on nomme escarlate, pour faire les ouvraiges et pourtraictures de bestes, de poissons, d'oyseaulx, de fleurs, de fueilles et aultres belles et merveilleuses choses et plaisantes à veoir. Et pourroit-on porter des draps de laine en telles parties de ce monde, que on les vendroit plus chèrement que draps de soye. Et aussi est et doit estre une brebis plus honorée et chère tenue pour le bien de sa laine, que ung ver ou vermine dont vient la soye. Les peaulx des oeilles, moutons, brebis et bestes à laine, dont nous traictons, sont proufïitables à faire parchemins pour faire livres et notes et plusieurs escritures. Et pour tanner et mégissieret courrayer en plusieurs et diverses manières, à faire grandes lanières et aultres choses nécessaires et prouffitables à plusieurs bons usaiges. dont les particularitez seroient trop longues à mettre en escrit.

La chair du mouton et de l'oeille est bonne pour nourrir créature humaine, pour menger avec la porée et pour faire plusieurs viandes en temps convenable.

Les escoliers à Paris, à Orléans et ailleurs, et plusieurs aultres le sçavent bien, et en fait l'on service à table plus communément que de chairs d'aultres bestes.

Les entrailles que l'on appelle trippes et la teste du mouton ou de brebis que les gens de Picardie nomment rebbardeure ou demie rebbardeure, lespiedz, le foye, le poulmon, quant il n'est point blecé ne corrompu des dauves ou d'aultres maies herbes, et les aultres choses de par dedans sont bonnes et prouffitables aux pauvres gens, car plusieurs en prennent nourriture et recréation à grand suffisance. Le suif et la gresse est bon et prouffitable à faire chandelle et oinctures, et aucune fois en met l'on es oignemens des cyrurgiens, pour la bonté et saincteté de la beste. Les boyaux sont bons et prouffitables à faire plusieurs cordes grosses et menues, les grosses pour mettre en ars , en espringa-