CHAPITRE IV 4J

qui engendre maulvais air et punaisie es estables, n'a pas si grand vertu quand elle est couverte de fiens. Et la punaisie engendre plusieurs maladies et grans inconvéniens aux bestes audict mois. Si y fait bon obvier par laisser ledit fiens : car la frescheur d'iceluy fiens n'est pas si maie ne périlieuse comme l'humeur corrumpu de la terre des estables, par les vapeurs qui lors yssent d'icelle terre, comme dit est. Et. en tous aultres mois, excepté ledict mois de May, l'on peult et doit curer les estables, et en oster le fiens en chascun mois, par deux fois ou plus. Et qui plus le fait, mieux vault. pource que plus sont les bestes tenues et gouvernées nettement, et plus fructifient.

Item, le pasteur doit eschever et obvier de tout son povoir que ces bestes et oeilles ne soyent mouillées en nul temps : pource que la pluye est contraire et nuysible aux oeilles et les fait descroistre et empirer. Si s'en doit garder songneusement que elles ne voysent à la pluye et que elles ne soient mouillées, excepté au

mois de May : car en May est bon que les oeilles ayent de la pluye par avant que elles soient tondues : pource que la laine en est plus nette et meilleure à tondre, et mieux vendable. Et aussi la pluye qui chiet sur la laine avant la tonsure engendre aux oeilles le bon suin qui leur garde le corps, et leur est moult prouffitable pour lors. Mais autant que ladicte pluye vault et proufïite aux oeilles par avant la tonsure : de tant plus assez leur est-elle nuysant et dommageable après la tonsure et en toutes aultres saisons.

En tous temps doit le berger conduire et raconduire son bestial et oeilles à leur aisément et prouffit, et les doit garder songneusement, choyer et défendre de toutes les choses qui leur pourroient porter dommage. Toutes ces reigles doit garder chascun berger, et aulcunes aultres qui sont bien ne'cessaires, convenables à ceste doctrine, et lesquelles seront baillées cy ensuyvant en espécial.