CHAPITRE IX ?S

Du moys de Janvier sont les brebis portières moult griefves et pesantes des aigneaux et faons qui sont en leurs ventres. Et aulcunes aignelent et faonnent oudict moys, quand elles ont esté luites et saillies en Aoust : car, aussi comme des fruictz, les unes sont plus hastives que les aultres.

Et encontre ce, la pourveance divine y a mis bon et convenable remède : car, audit moys, les loups suyvent les louves et vont après elles pour faire leur cohit, et, par ce, se oublient en ce moys, et ainsi ne font point de dommage aux brebis. Car se ne fust l'empeschement qu'ilz ont lors de poursuir leur chaleur et de continuer avec les louves, ils effondreroient les ventres des brebis pour avoir les aigneaux. Mais Dieu ne le veult pas, qui ainsi y a pourveu par sa grâce.

Au moys de Janvier se doit le berger lever moult matin et, si tost qu'il voit le jour, se doit desjeuner et menger du pain et du potage qui est demouré et gardé du soir du jour de devant. Et bien

matin, doit mener les bestes aux champs se il n'y a empeschement de pluye ou de blanche gelée.

Dudit moys de Janvier, les brebis portières qui ont esté saillies du Septembre précédent, approchent le temps de faonner sur le Febvrier. Et pour ce, doit-on eschever de les mener aux champs, à la blanche gelée, pour le péril et inconvénient qui en ensuit. Pource que la blanche gelée faict mourir les aigneaux es ventres des mères, et faict les brebis abortir, et les petitz aigneletz ainsi mors sont nommez avortons.

Et se le berger est jeune et ne soit pas encore instruict suffisamment en ceste science, il se doit adviser que il face à l'exemple et à la semblance des aultres bergers de la ville où il demeure, ou des aultres villes voysines, avec lesquelz il doit converser et de eulx apprendre l'art et usage, car en apprenant devient-on maistre.