DU MOYS DE FEBVRIER

u moys de Febvrier doit le berger lever bien matin devant le jour, pour affourager ses bestes portières de feurre de bled pour les réconforter. Et pource que en Febvrier faict communément noire gelée, le pasteur doit mettre ses bestes aux champs

bien matin. Car la noire gelée essuyé l'herbe, et adoncques les bestes paissent voluntiers, et l'herbe ainsi essuée leur est moult proffitable : et s'il advenoit que par jour survinst rousée, ou pluye, ou dégel, dont les herbes fussent mouillées, le berger doit donner à ses brebis, au soir, du fourrage de favatz de fèves et non pas de celuy de pois : car le fourrage de fèves est sec, et celuy des pois est moiste.

Audict moys de Febvrier, le berger ne doit point porter de houlette, car il n'en est besoing, pource que les brebis portières sont griefves et prestes à faonner. Si ne doit pas jetter terre sur les brebis ne les batre de corgées, qu'il ne les froisse ou blesse, et de son povoir doit garder qu'il ne nuyse aux bestes ne aux faons. En lieu de houlette doit avoir et porter ung crochet de couldre, pour prendre ses bestes par le pied, s'il en y a aulcunes qu'il vueille oingdre ou luy faire quelque chose nécessaire au mestier. Et, pour chasser ses brebis, doit porter une vergette «de saulx déliée, à