CHAPITRE XI

nomme bouveraude : et est de maulvaise digestion, et moult nuysant aux brebis, ou guoitron de leur gorge : car, si tost comme les brebis ont goûté de la bouveraude, il convient que le berger soit tout prest pour les ayder et secourir, et incontinent leur fault du sel en la bouche, pour donner occasion de boire, pour digérer et avaler l'amertume de la bouveraude.

Le bon pasteur se doit garder souverainement de conduire ses bestes en pasture, audict moys de Mars, en lieux marescageux, bas et moistes. Car lors naist et croist es palus une herbe trèspérilleuse, à une petite fueillette ronde et bien verte, que l'on appelle dauve, laquelle les brebis convoitent moult à menger, mais elle leur est trop nuysant et dommageuse : car, si tost que les brebis en ont gousté et l'ont avalé en leurs entrailles, la dauve est de telle nature, qu'elle demeure et se adhert au foye de la brebis ou aultre oeille. Et celle maie herbe ne remonte plus, ne revient à runge à la gorge de la beste, comme font

aultres herbes. Mais, de celle dauve par sa corruption sur le foye sont engendrez une manière de vers qui par pourriture ont vie et mengent et corrompent tout le foye de la beste : dont elle est mise à mort par l'infection de ladicte maie herbe nommée dauve. Et après ce que la brebis l'a reçeu et mengé, on s'en peult appercevoir à ce que elle boit plus souvent et plus habondamment que quand elle est saine. Et se peult celle maladie des dauves tapir et latiter es brebis ung an ou plus : mais, en la fin, convient-il que elles en meurent. Car la dauve destruict le foye, et le foye est ung des trois membres principaulx où la vie gist, après le cueur et le cerveau : et par ce, la brebis endauvée ne peult vivre. Si doit bien doncques le berger eschever que il ne conduise ses brebis près des lieux et marescages, esquelz croist et règne ladicte dauve, par tout le temps d'esté'.

Et quant au gouvernement et garde des aigniaulx audit mois de Mars : quand les aigniaulx ont ung mois passe', qu'ilz