DU MOYS DE OCTOBRE

N Octobre, mette le berger ses brebis matin aux champs pour pasture, et eu regard à la qualité du temps, comme dit est dessus. Et, au matin, les doit tenir et conduire es nouvelles gaschières : car les nouvelles herbettes et chardons qui crois-

sent es nouvelles gaschières leur sont moult prouffitables. Et, après disner, les doit mener es chaumes et es esteules comme en Aoust, et les tenir es chaumes jusques à une lieue de nuyct ou environ. Et pource qu'en ce temps les bestes ne sont pas encore refroidies et tiennent encore grand partie de leur chaleur pour le cohit naturel : et que les chars des bestes portières ou moutons ne sont pas lors bien convenables à menger : la seigne'e audit mois est deffendue, et toute médecine à faire à tout bergin, tant aux moutons comme chastris, portières, brebis, antenoises et aigniaulx. Excepté que se aulcune en estoit découragée de menger ou malade par aulcun accident, l'on luy doit donner à menger des fueilles de choulx, pour son appétit recouvrer.