CHAPITRE LI

Comme on doit croire les dix commendemens de la loy.

Nous deuons croire les x comendemens de la loy que Dieu escript de son doit en deulx tables au mont de Sjnay moult lonc temps douant, et les bailla à Mouyze pour monstrer au peuple d'Israël, dont il y y en a deulx des plus principaulx. C'est que l'en doit croire, craindre et amer Dieu sur toutes choses et de tout son courage. Et l'autre que l'en ne doit faire à autruy que l'en voudroit que autruy luy fist. Et qui gardera bien ces commandemens, et les choses dessusd. croira fermement, il sera sauué. Et sachant de vray que toutez les choses que Dieu comanda à la vielle loy sont par figures en celle du Nouueau Testament, ainssi que seroit par figure par le serpent d'erraîn que Moises fist dressier au désert bien hault sur vng fust contre la morsure des serpens, qui parfigure nostre seigneur Ihesuscrist, qui fut pendu et leué bien hault en l'arbre de la croix pour garder et deffendre tous ceulx qui en luy croient contre la morssure du Diable, qui par aduant auoit puissance sur toutez âmes lesquelles il perdi adonques.

1 Dans le ms. original, tous les chapitres qui suivent ne sont plus numérotés qu'an crayon.