C’est-à-dire d’erain, d’airain

LA COSMOGRAPHIE

et y a d’aultres montaignes qui ont mynes d’argent et fer, et y a une montaigne et en une rivière qui descend d’elle, où l’on cueulle en abundance d’or aussi en la montaigne que en la rivière. En ceste terres y a vignes qui portent raisins de demye aulne de long. Les gens de la terre sont vaillans gens et ne prènent jamais femmes jusques ad ce qu’ilz ayent apporté une teste ou deux de leur ennemy en présent à leur roy. Et quand le Roy la prent en présent, faict oster la langue de ladicte teste et la faict manger à celluy qui l’a apportée, avec du pain. Et après qu’il l’a mangée, il luy donne congé de soy marier. Et leur est grand honneur d’apporter une teste ou plusieurs de leurs ennemys à leur roy. Et celluy qui plus en apporte, est le plus grand chevalier. Ceste province tient, à l’austre midy, la mer Occéane, et en occidant, la mer Persique. Entre la mer Persiane et la mer Occéane, au dedans de l’entrée de la mer de Perse, est l’isle appellée Hermus \ de laquelle isle se peult veoir Arabye Félix. En laquelle isle est la ville appellée Hermuse qui est une grand ville et riche, et le chasteau du Roy de Portugal. Et, comme j’ay dict, il a icy son facteur pour acheter l’or et la piarrerye. Et ladicte isle, comme j’ay dict, est d’une matière de piarre de sel, et est la terre si chaulde que en toute la terre n’y en a poinct de plus chaulde. La ville est riche et noble, et icy viennent beaucoup de marchandises et de piarrerye. Et de Hermuse gist la coste de Carménye, jusques au cap de Gédyosie, l’est et ouest au long la mer Occéane. Et est ladicte isle de Hermuse par les vingt sept degrez de la haulteur du polie arctique ; et