B. AU LIEU DU PRIVILEGE A L'AVIS SUIVANT

Aux huinbles lecteurs,

Les Laconiens ont été fort prisés et honorés h, cause de leur briefveté et non superflues sentences ; parquoy encores jusques aujourdhui tiennent les modernes la louange d'icelle breviloquence en leurs bouches ; et dict l'on en commun proverbe de leur manière de parler et escripre : briefveté laconique. Et à vray dire, superfluité de langage engendre fascherie. A ceste cause a été faict et extraict de plusieurs livres le présent stille de praticque, tant du droit canon, civil, des docteurs qui auroient escript sur iceux droicts, que de plusieurs coutumiers, ordonnances, stilles et practiques, tant de la souveraine court de parlement que du cliastellet de Paris. Lequel contient les institutions et manière de procéder, deffendre son droict, vivre selon raison et justice, appartenans à tous en général sçavoir et apprendre ; car sans la practique pou prouffiteroient les loix et escriptures. Au dict livre est contenue la manière de procéder, tant es cours souveraines que es aultres juridictions du royaulme, et le plus communément. Et néantmoins qu'il ayt esté plusieurs foys imprimé, par les singularitez estans en icelluy, à l'utilité d'ung chascun, a esté de nouvel, oultre les précédentes impressions, reveu et corrigé, hors mis le superflu et qui n'est du présent en usaige. Additionné de plusieurs notables touchant la practique et raisons de droict. Adjousté les ordonnances de la court de parlement et du chastellet de Paris, avec aultres choses singulières, ainsy que l'on pourra veoir en continuant la lecture d'icelluy.