DE LE QUATRO CO MARE

( Patois Grenoblois)

PISSISEN

No, je ne volo plu que me filliet sorteison Ni que lou mistoudin tojour le charonteison ; Dussion-tei dépéta, lamenta, se fachié Quan je me couchirai, je le ferai couchié.

Ne farai-je pas bien, qu’en dite-vo, comare?

Vo savei mieu que mi coma von lou zafare;

U l’aurion pro d’envei, lassa, de se logié ;

Mais din lo tem presen eit en vain d’y songié,

Lo bougeoi, lo marchan que se marion à Grenoblo Demandon mei d’argent qu’u tem passa lou noblo Incou, passe-to tôt pe bagues, pe joyaux,

Pe coëfe, pe ruban ou pe d’autre zaffutiau : Veiquia de vrai, perque lou pare que son sageo, Metton plu tard qu’u pou lou garçon en meinageo Et perque le filliet que jason tôt lour sou,

Ont bian pro d’amoeirou et for pou d’épozou.

JAQUETI

J APPETA

Comare, vo parla coma fena de sienci,

Tan de corratari me font perdre patienci ;

Le miene ne vodrion que dansier, que sauta, Aveque lour galan, tôt lo jour civeta ;

Se fat tan de foli, j’ai pou qui s’oblieison,

Que n’arrivei malheur et que le gen parleison. Celou que le veion son de fran firi-not.

Que pe le zattrapa roulon u tour du pot;

De petits ferloquet, de contou de novéle,

Que ne fon que cori de femelle en femelle,

Avé lou serimen dont i n’en tenon poin,

U le fon deveni plu jaune que de coin :

Témoin ceu panegun que demore à man dreita, Qu’at amuzia dou zan ma cosina Beneita,

Que deviet l’eposa, se disiet, ceteu mei,

Et que vin de fiancier du coutier de Veurei ;

La poura creytura! li faziet cent caresse ; Cependan vo veyé l’éfat de se promesse :

Ah! si je lo tenin, ceu petit dadolin,

Je farien ce qu’on fat le filliet de Tullin,

FALIBEN

Voey! que me dite-vo! sarî-to veritablo?

Lou meino d’ujordeu son tou de décevablo ;

Ne s’ere jamai veu gen que s’amission mieu,

Ceu gonet, m’eit-avi, la migeave du zieu ;

Le filliet du pais, ma fei, sont malheirouse,

Entre cen, queteu yan, gnia que quatro d’eipouse Tandi que de defour u venon pe croquet