I. Ainsi, certainement

ay ouy souvent tes gemissemens, que tu vouldroys jà estre en la liberté de la gloire des Filz de Dieu ; tu prens plaisir en celle delectacion de la Maison pardurable ou ' Pays celés tien plain de délices et de gloire où tout bien abunde ; mais encores n'est pas l'heure venue , ainçoys * encore il y a ung aultre temps, c'est assavoir le temps de bataille, de labeurs et de tribulacion , auquel te convient esprouver. Tu desires y estre remply de tout bien souverain , mais tu ne le peuz pas encores avoir. Se suys-je', et me attens, dist Nostre Seigneur, jusques à ce que le royaulme de Dieu soit venu. Il te fault encores esprouver en terre et en ce monde, et exerciter en plusieurs choses. Tu auras aulcunesfoyz quelque consolacion , mais elle ne te vauldra pas sacieté planiere. Reconforte-toy doncques et te tien fort et ferme, tant en labourant comme en soustenant choses contraires à ta voulenté. Il te convient faire nouvel homme, estre changé en aultre personne. Il te fault souvent faire ce que tu ne veulx pas, et délaisser ce que tu veulx. Ce qui plaira aux aultres sera acomply , et ce qui te plaira demourra imparfait. Ce que les aultres diront , sera bien escouté et loué , ce que tu diras sera réputé comme rien et chose de nulle valeur. Ce que les aultres demanderont leur sera baillé, et tu n'auras chose que tu demandes.