BOUCHERS
(3 Mars i463)
A tous ceulx qui ces présentes lettres verront, Jehan le Mercier, lieutenant gênerai de noble homme Lancellot, seigneur de Honcourt et de Greigneiiseville, escuier d'escuirie, conseillier du Roy nostre sire, son bailly de Gisors et des anceans ressortz dudit bailliage, salut. Comme nagueres plusieurs des maistres et ouvriers du mestier de boucherie en la ville de Gisors feussent venuz devers nous, c'est assavoir : Jehan le Picard, Jehan Trenchant, PerrenotTrenchant, Jehan Desplanches, Perrenot Choppart l'aisné, Perrenot Choppart le jeune, Perrenot Desplanches, Thomas de Sainct Ouen, Jehan le Conte, Robin Simon et Adam Beaulx, en nous requerans que pour le bien de la chose publicque et Tutilité du bien commun, il nous pleust leur bailler ordonnances sur ledit mestier, pour le proffict commun des gens usans et eulx entremettans d'icelluy mestier; sur quoy nous eussent baillez aucuns articles touchant icelluy mestier et nous ont requis que les voulssions veoir et délibérer avec gens en ce cognoissans, pour icelles acroistre ou diminuer à nostre plaisir ainsi que verrions estre à faire et qu'il appartient par raison pour le bien et utilité de la chose publicque; savoir faisons, que, après ce que nous et les advocat et substitud du procureur du Roy, nostre dit seigneur, en ladicte ville de Gisors, et plusieurs autres notables personnes avons veu à grant et meure délibération lesdictz articles, nous inclinans à leur dicte requeste, voullans et deslrans ledit mestier estre doresnavant gouverné par bonne police, régime et ordonnance, principallement au bien de la chose publicque et dudit mestier, avons mis correption et augmentation sur lesdictz articles, et les aucunes augmentez et les autres diminuez; après lesquelles choses faictes, les avons baillez ausdictz bouchers, qui les ont veues et rapportées devers nous, requerans très instamment que, en leur dit mestier, nous voulsissions construire ordonnances selon lesdictz articles. Oye laquelle requeste, par l'adviz et délibération desdictz advocat et substitud dudit procureur du Roy et autres notables personnes, gens de justice, avons construict ordonnances estatu eudit mestier de boucherie, en ladicte ville de Gisors, pour en joyr en temps advenir selon lesdictz articles, dont la teneur ensuict.
Et premièrement,
Lesdictz bouchers et marchans seront tenuz de pourvoir et fournir, à leur povoir, ladicte ville de Gisors aux jours acoustumez à vendre char, de bonnes chars saines et habilles à estre exposez en vente pour la substantion de corps d'homme et de femme, selon la saison, sur peine de vingt solz parisis d'amende à applicquer moittié au Roy, nostre sire, et l'autre moittié aux jurez dudit mestier.
Item, nul ne pourra vendre ou exposer en vente beuf, vache ou autre beste qui ait morsure de leu, ne de chien arragé, ne d'autre beste périlleuse, et aussi qui soit entachée de la malladie que l'en appelle pomeliere; et se aucun faict le contraire, la char de la beste que il aura exposé en vente, sera condempnée par justice à estre gettée en la rivière aux despens des dellinquens, ou donnée aux chiens à menger, et le cuir et suif d'icelle beste vendu par moittié au proffict du Roy, nostre dit seigneur, et des jurez dudit mestier. Est adjousté en ce présent article, que nul boucher ne pourra tuer, ne vendre char entechée de fy, ne autre mauvaise malladie dont corps humain pourroit estre en péril, sur peine de vingt solz parisis d'amende à applicquer moittié au Roy, nosire dit seigneur, et l'autre moittié aux jurez et affaires d'icelluy mestier ; et se la beste n'esloit bonne, loyalle et marchande, ou qu'elle fust entechée de la pommeliere ou d'autre maladie dedens le corps, le marchant de qui lesdictz bouchers l'auront achettée, sera tenu de le recompenser et desdommager, au taux de justice et desdictz jurez.
Item, se aucun marchant de dehors vend beuf, vache ou autre beste aux bouchers dudit Gisors, qui soient esbranllez ou mutiliez, celluy ou ceuix de qui icculx bouchers les auront euz seront tenuz de les restituer, au taux de justice et desdictz jurez.
Item, nu! ne pourra exposer en vente char de vache qu'el soit en chasse, se elle n'est reffroidie de quinze jours du moins ; et s'aulcun est trouvé faisant le contraire, il dcmourera en la forfaicture, telle qu'il sera ordonné par justice.
Item, nul ne pourra exposer en vente char de thorel, s'il n'est de poyturc seiche sans -aller aux champs, sinon depuis la sainct Martin d'iver jusques à la Penthecouste, pourveu que icelle chair ait faige et lueur suffisans ; et, se aucun demande ce c'est char de thorel, le vendeur sera tenu le dire, sur peine de dix solz parisis d'amende à applicquer comme dessus.
Item, nul ne pourra exposer en vente char de porc sourseinc avec autre char saine, ne en lieu acoustumé à vendre les autres chars, mais la pourra
vendre à une autre table ou estai hors de la boucherie, affin que chascun puisse congnoistre que ladicte char soit sourseinée, et le marchant mesmes sera tenu dire aux achetteurs s'il leur est demandé ; et si aucun est trouvé faisant le contraire, il en sera tenu paier douze solz parisis d'amende, à applicquer comme dessus.
Item, se aucun boucher achette porc à son essient, qui soit sourseiné, il ne le pourra exposer en vente à détail en ladicte boucherie ne ailleurs, mais le pourra tuer pour en faire du lard salle, s'il luy plaist; et qui sera trouvé faisant le contraire, il l'amendera de dix solz parisis à applicquer comme dessus.
Item, nul boucher marchant ne pourra exposer en vente chair de mouton à couille que l'en appelle belin, ne de brebiz mesmes, se elle n'est chastrée, depuis l'entrée d'aoust jusques à la sainct Remy ; et qui fera le contraire, il paiera cinq solz parisis d'amende, à applicquer comme dessus.
Item, nul ne pourra tuer, pour exposer en vente, porc achapté d'ung barbier, ne d'ung huillier, ne d'ung ladre, ne d'ung mareschal, sur peine de forfaicture et d'amende de vingt solz parisis à applicquer comme dessus; et avec ce, ladicte char sera gettée ou traynée en l'eaue, ou donnée aux chiens par celluy qui l'aura exposé en vente.
Item, nul ne pourra exposer en vente, à détail, autre char de bestes prinses en lieu où il y ait mortalité de bestes, ne à une lyeue près de là, sans auctorité de justice ou des jurez ; et, se aucun est trouvé faisant le contraire, il perdra ses denrées qu'il aura achettez, et la char gettée en la rivière ou donnée au chiens à menger, aux despens de celluy qui les auroit exposez en vente, et le cuir et suif d'icelles bestes, sera vendu au prouffict du Roy et desdictz Jurez, par moittié.
Item, se aucun admène beste de plus loing de cinq lieues en ladicte ville de Gisors ou au lieu où il sera demourant, il ne les pourra tuer pour exposer en vente, jusques à ce que les jurez dudit mestier les aient veues et visitées et veu boire et menger; et qui fera le contraire, il paiera dix solz parisis d'amende à applicquer comme dessus.
Item, et pour ce que aucunes fois advient que beufz, vaches, porcz et autres bestes se desargottent pour cause de traval, eschauffeture ou autrement, et que pour ce, sont admenez en charettes ou sur chevaulx, nul ne les pourra tuer pour exposer en vente, avant qu'ilz soient veuz et visitez par lesdictz jurez, sur peine de dix solz à applicquer comme dessus.
Item, nul ne pourra exposer en vente, en ladicte ville et chastellenie dudit Gisors, chair quelque qu'elle soit, s'elle n'est bonne, loyalle et marchande et qu'elle ait faige et lueur suffisant; et qui fera le contraire, ladicte char sera forfaicte et gettée en l'eaue, ou donnée à menger aux chiens par celluy qui l'aura exposée en vente, et si amendera de dix solz parisis à applicquer comme dessus.
Item, nul veau de laict ne sera exposé en vente en ladicte boucherie, se il n'a dix huit jours du moins et que il ait lay raisonnable ; et qui fera le contraire, il paiera cinq solz parisis d'amende à applicquer comme dessus.
Item, nul boucher de ladicte ville et chastellenie ne sera chanJellier, et ne fera chandelle en son hostel pour user de deux mestiers ensemble, sinon pour sa provision, sur peine d'estre forclos de l'un d'iceulx mestiers ; et est à entendre que celluy qui en sera trouvé coulpable de ce choisira lequel d'iceulx deux mestiers qui luy plaira, et fera amende de vingt solz parisis à applicquer comme dessus, duquel desdictz deux mestiers il aura esté aprentiz et juré maistre d'icelluy.
Item, nul boucher ne pourra estre taneur, ne faire taner pour exposer en vente aucuns cuyrs. pour user d'iceulx mestiers l'un avec l'autre, mais conviendra qu'il se restraigne à user duquel d'iceulx mestiers qu'il luy plaira, sur la peine contenue en l'article précédente et par la condition dessusdicte.
Item, nul boucher, ne autre personne ne pourra tuer beste pour la vendre chaude, c'est assavoir: telle chair comme l'en a acoustume vendre en la boucherie, sans le commandement desdictz jurez, pourveu qu'il y ait d'autres chars refroidées à quantité suffisant pour la substentation de la dicte ville et pays d'environ, réservé le jour de lundy, auquel jour chascun en pourra tuer et vendre de chaude et de froide, ainsi qu'il luy plaira ; et qui fera le contraire, il paiera cinq solz parisis d'amende à applicquer comme dessus.
Item, nul boucher de ladicte ville de Gisors ne pourra avoir que ung aprentiz audit mestier pour une fois, lequel aprentiz paiera d'entrée, vingt solz parisis aux maistres dudit mestier, et cinq solz à la confrarie sainct Jacques; et qui fera le contraire, il paiera huict solz parisis d'amende à applicquer comme dessus.
Item, nulz rôtisseurs ne pasticiers de ladicte ville ne pourront achater char au jour de lundi à boucherie en temps d'esté, depuis Pasques jusques à la sainct Rcmy, sinon pour la provision et distribution du mardi ensuivant, et en temps d'iver pour le mercredi et jeudi ensuivant dudit jour de lundi,
laquelle char, iceulx pasticiers et rôtisseurs seront tenuz mettre sur leur estai ou fenestre, et ne pourront icelle rostir ne mettre en pastez, jusques ad ce qu'elle soit visitée par les jurez sur ce ordonnez ; et s'il advenoit que iceulx jurez trouvassent en l'hostel desdictz rôtisseurs et pasticiers aucunes chars qui ne feussent d'une essence et valleur, et qu'ilz eussent mis aucune bonne chair sur autre char de mendre valleur, qui ne fust pas convenable, ne bonne à rostir ou mettre en pasté, toute icelle bonne et autre sera forfaicte ; et qui sera trouvé coulpable, il sera ung jour en prison, et avec ce paiera dix solz parisis d'amende qui sera distribuée par moittié au Roy, nostre dit seigneur, et ausdictz jurez, lesquelz jurez seront tenuz de faire service Visitation ledit jour de lundi, après heure de midi passée, et le mardi à heure de soleil levant; et s'ilz en sont reffusans ou en demeure, ilz en seront pugniz par justice.
Item, lesdictz rôtisseurs et paticiers ne pourront tuer ne faire tuer bestes pour faire leursdictes marchandises, c'est assavoir : beuf, vache, veau, porc ne mouton, mais seront tenuz à aller achetter la char pour ce faire, en la boucherie et lieux ou l'en a acoustumé à vendre char, par la forme et manière que en l'article cy dessus est declairé, sur la peine devant dicte; et est à entendre qu'ilz pourront tuer toutes autres bestes de layt et vendre tant lièvres, connins, faisans, perdriz, chappons, comme cochons et toute autre vollaille, pourveu qu'elle soit bonne et loyalle pour user à corps de homme ; et se aucun est trouvé en faulte, la denrée sera forfaicte et l'amenderont les coulpables chascun de cinq solz parisis à applicquer comme dessus.
Item, nul tavernier ne hostellier ne pourra tuer, ne faire tuer char en son hostel, quelque qu'elle soit, pour revendre à sa taverne, réservé poullaille et sauvagine, sur peine de vingt solz parisis d'amende à applicquer comme dessus.
Item, nul ne pourra lever son mestier de boucherie en ladicte ville, s'il n'a aprins son mestier en icelle ville, et que il n'ait servy trois ans; après lequel temps il sera visité par les maistres dudit mestier, fera chef d'œuvre, et s'il est trouvé suffisant, il sera par eulx présenté à Jour d'assize par devant monditseigneur le bailly ou son lieutenant, fera serment de garder ces présentes ordonnances, puys pourra marchander et user dudit mestier comme les autres maistres d'icelle ville, ausquelz maistres il sera tenu paier pour vinage six livres parisis, et cinquante solz parisis au soustenement de la confrarie monseigneur sainct Jacques constituée en l'église sainct Gervais dudit Gisors ; et s'il est filz de l'un d'iceulx bouchers maistres en icelle ville, il ne paiera riens d'icelle somme, mais seullement fera chef d'œuvre; et s'il est trouvé suffisant par les maistres, il sera par eulx amené et fera serment comme dessus ; et qui fera le contraire, il paiera vingt solz parisis d'amende à applicquer moittié au Roy et l'autre moittié aux jurez dudit mestier.
Item, sur le faict de ladicte marchandise, aura trois hommes notables de ladicte ville de Gisors, jurez par justice, c'est assavoir : deux bouchers et ung bourgois, lesquelz seront tenuz visiter ladicte marchandise par chascun jour à heure deue, bien et suffisamment, et rapporter les exploictz, se faulte y a, devers justice, sans en relâcher ne conseillier aucun ; et ce ilz sont de ce faire reffusans ou en demeure, ilz seront pugniz par prison et amende à la voulenté de justice.
Item, lesdictz bouchers ne pourront estre que deux à ung coustel parçonniers à vendre char à estai, sur peine de cinq solz parisis d'amende à applicquer
comme dessus.
De laquelle ordonnance garder pour le temps advenir, lesdictz maistres et ouvriers dudit mestier, dessus premiers nommez, tant pour eulx que pour leurs successeurs bouchers, firent le serment en tel cas acoustumé, promettans icelles ordonnances tenir et garder fermement, sans enfraindre en aucune manière, sur les peines et amendes declairez es articles dessusdictz ; lesquelles peines et amendes, nous, dès maintenant, ores et pour le temps advenir, avons dit et disons estre cueilliz et levez, et les transgresseurs desdictz articles estre pugniz et corrigez selon la teneur d'iceulx, et pour chascune fois qu'ilz escherront esdictes peines et amendes ; laquelle ordonnance monditseigneur le bailly ou son lieutenant et ses successeurs, pourront croistre et admenuissier, modérer ou du tout oster, se mestier est, et ainsi que justice verra bon estre. Si donnons en mandement à tous les maistres et ouvriers dudit mestier presens et advenir, que cesdites ordonnances tiengnent et gardent sans enfraindre ; mandons en oultre à tous les sergens ou soubz sergens dudit bailliage, et au premier sur ce requis, que cesdicies ordonnances ilz facent entretenir et garder ainsi que dit est.
En tesmoing desquelles choses, nous, lieutenant gênerai dessus nommé, avons mis à ces présentes le grant seel aux causes dudit bailliage.
Ce fut faict le troiziesme jour de mars, l'an de grâce mil quatre cens soixante trois, ainsi signé : G. Vaurilon, ung paraphe.
A tous ceulx qui ces présentes lettres verront ou orront, Robert du Vveu, lieutenant gênerai de noble et puissant seigneur monseigneur Jehan de LA ViEFzviLLE, chcvalicr, seigneur de Wcstjx'han, Hadincourt, Avenj'- et Danmcsnil, conseillier, chambellain ordinaire du Roy nostrc sire, son bailly et cappiiaine de Gisors et des anceans ressortz dudit bailliage, salut. Savoir faisons, que, vcues par nous, en la compaignie des advocat et procureur du Roy, nostre
sire, audit] bailliage, les ordonnances sur le faict du mestier et marchandise de bouchers enladicte ville de Gisors, parmy lesquelles ces présentes sont annexées, lesquelles avons trouvé bonnes, Justes et loyallement faictes pour le bien de la chose publicque, nous, de l'accord et consentement desdictz advocat et procureur, avons icelles ordonnances confermées et confermons par ces présentes, mandons et commettons en oultre à chascun des sergens ou soubz sergens dudit bailliage, de icelles ordonnances faire entretenir, garder et observer par tous ceulx et ainsi qu'il est plus à plain contenu esdictes ordonnances, jouxte leur forme et teneur.
En tesmoing de ce, nous avons seellé ces présentes du petit seel aux causes dudit bailliage, le vingt ungiesme jour d'apvril après Pasques, Tan mil cinq cens et six, ainsi signé : H. du Vieu, ung paraphe, et seellées de cire verte.
A tous ceulx qui ces présentes lettres verront ou orront, Robert du Vyeu, lieutenant gênerai de noble et puissant seigneur monseigneur Jehan Basset, chevalier, seigneur de Normanville , la Bucaille et Ribetyré, conseillier, chambellain du Roy, nostre sire, son bailly et cappitaine de Gisors et des anceans ressortz dudit bailliage, salut. Savoir faisons, que, veu par nous en la compaignie des advocat et procureur du Roy, nostre sire, audit bailliage, les ordonnances sur le faict du mestier et marchandise de boucherie en ladicte ville de Gisors, parmy lesquelles ces présentes sont annexées, lesquelles avons trouvées bonnes, justes et loyallement faictes pour le bien de la chose publicque, nous, de l'accord et consentement desdictz advocat et procureur, avons icelles ordonnances confermez et confermons par ces présentes, mandons et commettons en oultre à tous et chascuns des sergens et soubz sergens dudit bailliage, icelles ordonnances faire entretenir, garder et observer par tous ceulx et ainsi qu'il est plus à plain contenu esdictes ordonnances, jouxte leur forme et teneur.
En tesmoing de ce, nous avons seellé ces présentes du petit seel aux causes dudit bailliage, le quatriesme jour de juillet, l'an de grâce mil cinq cens et dix neuf, ainsi signé : J. le Lanternier, ung paraphe.
A tous ceulx qui ces présentes lettres verront, Hector du Vyeu, licentié en loix, lieutenant gênerai de noble et puissant seigneur monseigneur Adrian Thiercellin, chevalier, seigneur de Brosse, Passé et Marines, l'un des gentilz hommes ordinaires de la chambre du Roy nostre sire, son
bailly et cappitaine de Gisors et des anceans ressortz d'icelluy, salut. Savoir faisons, que, veu par nous, en la compaignie des advocat et procureur du Roy nostre sire oudit bailliage les ordonnances sur le faict du mestier de boucher en la ville dudit Gisors, parmy lesquelles ces présentes sont annexées, lesquelles ordonnances avons trouvé bonnes, justes et loyallement faictes pour le bien de la chose publicque, nous, de Taccord et consentement desdictz advocat et procureur, avons icelles ordonnances confermé et conformons par ces présentes, mandons et commettons en oultre à tous et chascun des sergens ou soubz sergens dudit bailliage faire entretenir, observer et garder lesdictes ordonnances par tous ceulx et ainsi qu'il est plus à plain contenu en icelles ordonnances, jouxte leur forme et teneur.
En tesmoing. nous avons mis à ces présentes le petit seel aux causes dudit bailliage, le vingt deuxiesme jour d'aoust l'an de grâce mil cinq cent vingt quatre. Ainsi signé : Bernard, ung paraphe.
Collation est faicte sur lesdictes ordonnances et ataches dessus transcriptes qui ont esté restituées et rendues à Nicollas le Fournier, l'un des gardes et jurez du mestier de boucher pour l'année présente, le mardy vingt cinquiesme jour de novembre mil cinq cens trente neuf. Fichet, ung paraphe.
COURAYEURS
(lo Décembre 147G)
A tous ceulx qui ces présentes lettres verront ou orront, Pierre le Lan- TERN'iER, escuier, lieutenant de noble homme François du Tiercent, escuier, conseillier et chambellain du Roy nostre sire, son bailly et cappitaine de Gisors et des anceans ressorts dudit bailliage, salut. Comme de tous temps, à l'office de monditseigneur le bailly, compette et appartient povoir mettre, ordonner, constituer et establir ordonnances bonnes et loyalles au faict et police de tous les mestiers et autres choses neccessaires pour Testât de marchandise, et sur le faict et gouvernement de la police du bien et de la chose publicque et par espetial en la ville et chastellenie de Gisors, entre lesquelles choses nous avons regardé, conclud et délibéré ce qui estoit bon à faire au regard du mestier de courayer cuir tané en ladicte ville de Gisors, et faict mettre par escript et par article la forme, manière et estât de leur gouvernement, savoir faisons, que aujourd'huy dixiesme jour de décembre, l'an de grâce mil quatre cens soixante et seize, nous, pour les causes dessusdictes, avons, en la présence et par Toppinion des conseil et substitud du procureur du Roy, nostre dit sire, audit bailliage et autres notables personnes, les gens dudit mestier pour ce appeliez et dont les noms ensuivent : c'est assavoir Jehan RiNGLET et autres..., faict, ordonné et délibéré les ordonnances cy après declairées, pour estre entretenues et gardées pour le temps advenir en la forme et manière qui s'en suict.
Et premièrement.
Nul maistre dudit mestier ne pourra avoir que ung aprentiz seullement, lequel aprentiz sera tenu servir le temps de trois ans acompliz sans gaigner aucun argent, et paiera pour son vin aux com.paignons dudit mestier, à l'entrée de son service, la somme de huict solz parisis ; et se il advenoit que le dit aprentiz delaissast son service, son dit maistre ne pourra poinct louer d'autre, tant que icelluy aprentiz ait renoncé audit mestier et paie le vin d'entrée, sur peine audit maistre de quarante solz parisis moittié à justice et moittié aux jurés dudit mestier.
Item, nul ne pourra lever ledit mestier en la dicte ville et fors bourgs de Gisors , s'il n'a servy trois ans comme aprentiz oudit mestier de couraierie et qu'il en face apparoir deuement par lettres de son dit service aux maistres d'icelluy mestier, et aussi qu'il soit veu et visité par les jurés du dit mestier en icelle ville, savoir se il est suffisant et qu'il ait faict trois chefz d'œuvres , c'est assavoir : ungde cuir de vache, ung dozà semelle du pris de quarante huict solz parisis et d'une douzaine de cordouan, et s'il fault à faire Icsdictz chefz d'œuvres, il sera renvoie raprendre et repputé inhabille à lever ledit mestier pour icelle fois, et paiera les interestz et despens raisonnables que feront les dicts maistres, en faisant icelluy examen, et fera amende au Roy pour chascun chef d'œuvre qu'il aura failly à faire, de seize sols parisis moittié au Roy, nostre dit sire, et l'autre moittié ausdits jurés; et s'il est trouvé suffisant, il sera admené par les jurez, à jour d'assize, devant mondit seigneur le bailly ou son lieutenant, faire le serment de garder ces présentes ordonnances dont il aura lettre, et paiera pour vinage aux maistres dudit mestier trente deux sols, dont huict sols seront convertiz à la confrarie monseigneur sainct Crespin et sainct Crespinian, constituée en l'église sainct Gervais de Gisors.
Item, les filz de maistres, quand ilz vouldront lever ledit mestier, paieront aux compaignons dudit mestier douze solz parisis pour leur vin et feront le serment à justice comme dessus et après lèveront ledit mes'.ier, se ilz sont suffisans ouvriers d'icelluy, et non autrement.
Item, nul ouvrier dudit mestier ne pourra courayer cuyr tanné, soit pour les tanneurs de la ville ou autre de quelque estât que ilz soient, se premier et avant tout ledit cuyr n'est merché du mercq de la ville dudit Gisors à ce acoustumé, et se ilz font le contraire, ilz l'amenderont, c'est assavoir: ledit courayeur de cinq solz parisis à celluy qui lui aura baillé à faire, pourveu qu'il ait congnoissance de ceste ordonnance de cinq sols parisis, semblablement à applicquer les deux partz à justice et le surplus aux jurez dudit mestier.
Item, chascun maistre dudit mestier en ladicte ville aura ung mercq qui luy sera baillé par justice, dont il sera tenu mercher chascun cuyr qu'il aura courayer, et ne les pourra livrer ne mettre en quelque manière hors de sa main, jusque ad ce qu'il les ait merchés, sur peine de douze deniers parisis pour chascun cuyr à applicquer moittié à justice et moittié aux dicts jurez, et seront les mercqz mis en empraintte en la geollc de Gisors avec le nom du maistre d'icelluy mercq.
Item, nul ne pourra vendre cuyr courayé audit Gisors qui viengne de dehors ladicte ville, qu'il ne soit visité par les jurez dudit mestier, sur peine de cinq solz parisis, les deux partz à justice et le surplus aux dictz jurés.
Item, se aucun cuyr est trouvé mal courayé en ladicte ville, celluy qui aura faict la faulte Tamendera, pour chascun cuyr, de deux solz à applicquer comme dessus, et se sera ledit cuyr amendé à ses despens.
Item, nul de quelque estât qu'il soit ne pourra tenir ouvrier dudit mestier en son hostel pour courayer, se ce ne sont les maistres dudit mestier, sur peine de vingt solz d'amende pour chascune fois qu'ilz en seront trouvez coulpables, à applicquer comme dessus, et se ne pourra nui maistre d'icelluy mestier loer l'un des varletz des autres maistres d'icelluy mestier, jusques ad ce que il se soit departy de lui par son accord, sur ladicte peine à applicquer comme dessus.
Item, nul dudit mestier ne pourra besongner en la dicte ville au jour de samedi, sinon jusques au deuxiesme son de vespres, sur peine d'amende à applicquer comme dessus.
Item, il aura audit mestier deux jurés, l'un d'icelluy mestier et l'autre sera cordouennier, qui se renouvelleront chascun an, lesquels auront puissance et auttorité d'aller aux hostels des maistres dudit mestier de courayer, toutesfois qu'il leur plaira, pour visiter les dictz cuyrs, sans ce que les dicts maistres le puissent contredire, et se ilz en sont reffusans, ilz paieront cinq solz d'amende ou autre amende au taux de justice, selon le cas, à applicquer comme dessus.
Item, pour ce que plusieurs plainttes ont esté faictes à justice, de ce que plusieurs ouvriers dudit mestier de couroirie usoient en faict du couroy de leurs dictz cuyrs, depuis qu'ils estoient noirs de maillet, par quoy le couroy et labour desdictz cuyrs n'estoit pas si bon trouvé d'estre faict au pié, ordonné est que doresnavant les dictz courayeurs, ne aucun d'eulx, ne ouvreront aucunement dudit maillet en labour des dictz cuyrs soient noirs ou rouges, excepté seuUement es fortz cuyrs à semelle et empiengne qui soient convenables à faire au pié, lesquelz ils pourront mailleter devant qu'ilz soient noirs devers la char des dictz cuyrs, et non de l'autre part, pour ce que le grain du cuyr n'en seroit pas si bel ; et qui sera trouvé faisant le contraire, il l'amendera de douze deniers parisis pour chascun cuyr, à applicquer par moittié à justice et aux dictz jurez.
Item, se aucun apporte cuyr courayé en ladicte ville, pour vendre, qui soit trouvé mal courayé, il l'amendera, pour chascun cuyr ou l'on trouvera faulte, de deux solz parisis, à applicquer moittié à justice et moittié aux dicts jurés, et se sera ledit cuyr mal courayé baillé à ramender à ses dépens.
Item, que nul dudit mestier ne pourra detrier cuyr, ne faire prest qui ne se esvente ung jour et une nuyct, depuis qu'il sera foullé pour abruner, depuis
la sainct Remy jusques à Pasques, sur peine de cinq solz parisis, moittié à justice et moittié aux jurés dudit mestier.
Item, que nul courayeur ne pourra hesongner de cuyr depuis la sainct- Remy jusques à Karesme prenant, que jusques à huict heures, et de matin ne besongnera qu'il ne soit cinq heures, sur peine de cinq sols parisis d'amende à applicquer comme dessus ; et seront tenuz iceulx maistres faire faire ung coffret fermant à clef, dont lesdictz jurez auront la garde, c'est assavoir : l'un ledit coffret et l'autre la clef, ouquel coffret seront mises les ordonnances de leur dict mestier et autres escriptures servans à icelluy.
En tesmoing de ce, nous, lieutenant dessus nommé, avons seellées ces présentes ordonnances de nostre signet dont nous usons audit office, et signée de nostre seing manuel, et pour greigneur congnoissance et approbation en l'absence du grand seel aux causes de ce bailliage, y avons faict mettre le seel aux obligations de la dicte chastellenie.
Ce fut faict es an et jour dessus dit. Ainsi signé : le Lanternier , ung paraphe et non seelé.
Collation est faicte sur l'original desdictes ordonnances dessus transcriptes qui ont esté rendues à Jehan de Sainct Ouen et Pierre Ansart, gardes et jurez du mestier de courayeur, en l'année dernière, le dix septième jour de décembre, mil cinq cents trente neuf. Fichet (avec paraphe).
THISSERRANS EN TOILLES
(i6 Mars 147g)
A tous ceulx qui ces présentes lettres verront ou orront, Guillaume Jubert, lieutenant gênerai de noble homme monseigneur Jehan de la ViefviLLE , chevalier, seigneur de Westrehan et de Herincourt , conseillier et chambellain du Roy nostre sire, bailly et cappitaine de Gisors et des anceans ressortz d'icelluy bailliage, salut. Comme nagueres plusieurs des maistres et ouvriers du mestier de tisserens en thoilles en la ville et chastellenie de Gisors feussent venuz devers nous, c'est assavoir : Pernet Vincent, Robin Driet, Jehan Carrier, Jehan le Carpentier, Guillemin Ygon, Massin le Sueur, Thomas le Gros, Pernot des Champs et Jehan des Nouiers, en nous requérant que pour le bien de la chose publicque et l'utilité du bien commun, il nous pleust leur bailler ordonnances sur leurdit mestier, pour le proffict commun des gens usans et eulx entremettans d'icelluy mestier; sur quoy nous eussent baillé aucunes articles touchant icelluy mestier, et nous ait requis que les voulsissions voir et délibérer avec gens ad ce recongnoissans, pour icelles acroistre où diminuer à nostre plaisir, ainsi que verrions estre à faire et qu'il appartiendra par raison pour le bien et utilité de la chose publicque; savoir faisons, que, après ce que nous et les advocat et procureur du Roy nostre dit seigneur audit bailliage et plusieurs autres personnes, avons veu à grant délibération lesdictz articles, nous, inclinans à leurdicte requeste, voullans et desirans ledit mestier estre doresnavant gouverné par bonne police, régime et ordonnance, principallement au bien de la chose publicque et dudit mestier, avons mis correction et augmentation sur lesdictz articles et les aucunes avons diminuées et les autres augmentées ; après lesquelles choses faictes, les avons baillées ausdictz tisserens qui les ont veues et rapportées devers nous, requerans très instamment que, en leurdict mestier, nous voulsissions construire ordonnances selon lesdictz articles. Oye laquelle requeste et par l'adviz et délibération desdictz advocat et procureur du Roy et autres notables personnes, gens de justice, avons construict ordonnances selon lesdictz articles, pour en joyr en temps advenir selon icelles articles dont la teneur ensuict.
Et premièrement,
Nul ne nulle dudit mestier de tisserens en linge ne pourra lever son ouvrouer en ladicte ville et bourgoisie, s'il n'est de la prinse de ladicte ville et qu'il ait servy trois ans entiers' son premier maistre, et après iceulx acompliz ouvrer deux mois entiers et faict son chef d'œuvre de l'ouvrage de quoy il se vouldra aider pour gaigner sa vie, et n'entreprendra icelluy ouvrier œuvre quelconque à faire, s'il n'en est ouvrier et qu'il la sache faire de luy mesmes sans aide d'autruy, et ne se meslera ledit ouvrier d'autre ouvrage que de ce dont il fera son chef d'œuvre ; et si ledit ouvrier fait chef d'œuvre de doubleterie, il pourra entreprendre toutes autres besongnes ; et s'il ne scait faire que thoille seullement, il ne sera passé seullement que pour thoille, ainsi qu'il est acoustumé faire en ladicte ville et chastellenie de Gisors ; et après ledit chef d'œuvre faict, dont ledit maistre vouldra user, sera visité par les gardes dudit mestier, et s'il est trouvé suffisant pourra lever son mestier et fera serment devant monditseigneur le bailly ou sondit lieutenant, en la présence des gardes dudit mestier, de garder ces présentes ordonnances ; et paiera ledit ouvrier seize solz parisis à la confrarie Nostre Dame des Adveus, huit solz parisis aux maistres et jurez dudit mestier, et vingt quatre solz parisis au vinage, et une livre de cire neufve pour emploier à la torche de ladicte confrarie; et s'il est filz de maistre, il paiera par moittié, sans diminuer ladicte livre de cire, et avec ce, fera serment à ladicte confrarie des Adveus pour l'aider à maintenir.
Item, nul dudit mestier ne lèvera icelluy mestier en la ville et chastellenie, jusques ad ce qu'il ait faict le serment devant Justice de bien et loyamment garder ces présentes ordonnances, et sera tenu de faire icelluy serment devant les jurez dudit mestier, et paiera pour vinage huict solz parisis avec demie livre de cire, et si paiera vingt solz parisis pour applicquer moittié à ladicte confrarie et l'autre moittié aux maistres dudit mestier, et fera son chef d'œuvre, pour lequel visiter les jurez et gardes auront quatre solz parisis; et s'il fait chef d'œuvre de doubleterie, tant en la ville que dehors, il paiera, oultre ce que dit est, vingt quatre solz parisis à applicquer comme dessus.
Item, nul dudit mestier ne prendra aprentiz moins de trois ans et sera tenu le preneur de avancher ledit marché aux gardes dudit mestier pour doubte des frauldcs ; et seront tenuz de le mener devant justice pour faire serment de bien et loyamment garder ces présentes ordonnances, et aussi de bien servir son maistre; et paiera ledit aprentiz d'entrée cinq solz parisis et cinq solz, quant lesdictz trois ans seront acompliz, pour aider à soustenir ladicte frarie ; et ne pourront lesdictz maistres et ouvriers avoir que ung aprentiz à la fois, si ce n'cstoit ung filz de maistre qui voulsist aprendrc ledit mestier, mais pour-
— 3r — roient lesdictz maistres avoir sur la derraine année, ung autre aprentiz pour le dhuire audit mestier et pour tramer, lequel ne pourra besongner dudit mestier jusques ad ce qae l'autre aprentiz ait acomply sa ferte ; qui fera le contraire, il paiera trente solz parisis d'amende à applicquer comme dessus.
Item, quant aucun maistre dudit mestier yra de vie à trespas, sa femme pourra tenir ouvrouer de sondit mestier en la manière que son mary le tenoit en son vivant; toutesfois, si ledit maistre avoit enffant masle qui voulsist entretenir ledit mestier, il pourroit entreprendre emplus avant par paiant les droictures, ainsi que devant est declairé ; et s'il estoit ainsi que ladicte vefvc se remariast à autre homme que dudit mestier, l'ouvreur luy seroit clos.
Item, nul ne nulle ne mettra ouvrier en besongne qui soit loué à aultruy ou promis à besongner, s'il n'en part par le consentement et accord de celluy à qui il aura promis ou soy loué, sur peine de cinq solz parisis d'amende; et aussi nul maistre, ne ouvrier ne substraira par parolles en aucune manière que ce soit, aucun varlet ne ouvrier d'autry pour le ratraire avec luy, sur peine d'amende devant dicte à applicquer comme dessus.
Item, nul ouvrier dudit mestier ne prendra œuvre à faire, que autruy maistre ait ourdie, ou commencée, ou allouée, si ce n'est du congié de celluy ou celle qui l'aura commencée ou par le congié de justice, et s'il ainsi que les gardes en soient embesongnez, la partie qui airoit tort paira cinq solz parisis d'amende moittié au Roy et l'autre moittié aux jurez dudit mestier.
Item, nul ne pourra vendre, cngaiger, ne transporter autry fil soit en lincel ou en chaingne, et aussi ouvrage faicte, se ce n'est du congié de celluy ou celle qui l'aura baillée à faire, sur peine de dix solz parisis d'amende à applicquer comme dessus.
Item, si aucun ou aucune dudit mestier est trouvée portant œuvre parmy la ville à tout la laine tenant à la besongne, il paiera dix solz parisis d'amende.
Item, que nul dudit mestier ne fera œuvre mendre que le bougon ne contient, c'est assavoir : toilles marchandes ou bellinges, pourveu que aucune personne commande à faire aucune besongne de mendre ley, mais que ce soit pour son user ou de ses gens, les dessusdictz faire le pourront, pourveu qu'il ait ung cent de detraict au dessoubz dudit bougon, et s'ilz s'entremettent de faire œuvre soit doubliers, ou touailles, ou cuvrechefz, lesdictz ouvriers faire le pourront, à la voullenté de leurs challans, soit audessus ou audessoubz dudit estallon, lequel estallon les gardes porteront pour visiter et estallonner les œuvres commencées sur les mestiers, et les roz et lames visiteront et estallon-
neroiit, toutesfois que bon leur semblera et que mestier sera ; et s'aucun est trouvé faisant le contraire, il paiera dix solz parisis d'amende à applicquer comme dessus.
Item, s'il est trouvé que aucun ait faulx poix ou faulse aulne, les gardes seront tenuz l'apporter devers justice pour en ordonner par justice ainsi qu'il appartiendra ; et ne seront tenuz Icsdictz ouvriers rendre à tel poix comme ilz recevront, sauf toutesfois que s'aucune personne est plainctif et que son œuvre soie par frauldc moullée ou empesée pour plus peser, les gardes seront tenuz de visiter ladicte œuvre et en faire rapport pour faire raison aux parties.
Item, s'aucune personne bourgois ou autre est plainctif d'aucuns desdictz ouvriers, disans que son œuvre qu'el avoit allouée à faire n'est pas faicte comme il avoit marchandé, ou qu'elle ne seroit pas du lé qu'elle debvroit estre, ou autre faultes qu'il vouldroit alléguer, les gardes seront tenuz visiter et rapporter ce qu'ilz auront trouvé; et se par ledit rapport il est trouvé qu'il y ait faulte dudit ouvrier, il paiera dix solz parisis d'amende à applicquer comme dessus; et aussi s'ilz rapportent qu'elle soit bonne, le plainctif paiera le desdommagement avec la paine desdictz gardes.
Item, s'il est trouvé que aucun ait applicqué fil à son profïict, il en sera mis en amende au taux de justice, et privé ung an de besongner.
Item , nulle personne estrange ne pourra venir besongner en ladicte ville pour gaengner argent avec l'un des maistres, qu'il ne paie douze deniers parisis à son entrée.
Item, que nul dudit mestier qui se vouldra entremettre de façon tayes à lict, esconviendra qu'il face entraire sa lame et son ros sainement, et partir son fîl noir parmy le blanc ; et s'il est trouve faisant au contraire par le rapport des gardes, il paira l'amende de dix solz parisis à applicquer comme dessus.
Item, nul quelconque dudit mestier, soit maistre allant par les ateliers qui soit soippcçonné d'aucun cas criminel, ne pourra ouvrer en ladicte ville et chastcllenie de Gisors, jusques ad ce qu'il soit purgé du cas ou s'il n'en a congié de justice, qui pour le cas dessusdict le tendra en arrest comme prisonnier ; et ne pourront les dessusdictz ouvriers tenir femme avec eulx à pain et à pot, s'clle n'est leur femme espousée, pour aucuns inconveniens qui en pevent advenir.
Item, pour garder et entretenir ces présentes ordonnances, aura deux maistres dudit mestier qui seront commis par justice gardes et jurez dudit
mestier, et feront serment Je faire loyalle Visitation des ouvrages dudit mestier en ladicte ville et chastellenie, ou qui seront portez vendre en icelle, et se renouvelleront par chascun an, et auront de chascun maistre par chascun an, pour leurdicte Visitation, en tant qu'il y en a hors ladicte ville, douze deniers parisis.
Item, nul dudit mestier de dehors ladicte ville et chastellenie ne pourra venir quérir fil en ladicte ville de Gisors, ne apporter toille à nul de la ville, qu'il leur ait faicte, sur peine de dix solz parisis d'amende à applicquer comme
dessus.
De laquelle ordonnance garder et entretenir pour le temps advenir, lesdictz maistres et ouvriers dudit mestier dessusnommez, tant pour eulx que pour leurs successeurs, firent le serment en tel cas acoustumé, promettans icelle ordonnance tenir et garder fermement sans enfraindre en aucune manière, sur les peines et amendes déclairées es articles dessusdictz, lesquelles peines et amendes, nous, dès maintenant, ores et pour le temps advenir, avons dit et disons estre cueillies et levées, et les transgresseurs desdictz articles estre pugniz et corrigez selon la teneur d'iceulx, et pour chascune fois qu'ilz escherront esdictes peines et amendes, lesquelles monditseigneur le bailly ou son lieutenant, ou ses successeurs, pourront croistre, diminuer, modérer et du tout oster se mestier est, ainsi que Justice verra bon estre. Si donnons en mandement à tous les maistres et ouvriers dudit mestier que cesdictes présentes ordonnances tiennent et gardent sans enfraindre; mandons en oultre à tous les sergens dudit bailliage, que ceste dicte ordonnance ilz facent garder bien et deuement.
En tesmoing de ce, nous avons seellé ces présentes du grant seel aux causes dudit bailliage.
Ce fut faict le seiziesme jour de mars , l'an de grâce mil quatre cens soixante dix neuf, ainsi signé : Jubert, ung paraphe, et seellé de cire verte où sont emprainctes trois fleurs de liz.
Collation est faicte sur ladicte ordonnance qui a esté rendue à Jehan Driet, dit Berthault, et Jehan Dessaulx, gardes et jurez dudit mestier pour l'année présente, le dymenche second Jour de novembre, mil cinq cens trente neuf.
FicHET (avec paraphe).
