MERCIERS

(i8 Novembre 1476)

A tous ceulx qui ces présentes lettres verront ou orront, Guillaume Michel escuier, seigneur de Mommor, licentié es loix, lieutenant gênerai de noble et puissant seigneur messire Adrien Thiercellin, chevalier, seigneur de Brosse, Possey, Chars et Marines, cappitaine du château de Loches, l'un des geniilz hommes ordinaires de li chambre du Roy, nostre seigneur, son bailly et cappitaine des ville et chasieau de Gisors e: des anceans ressors d'icelluy bailliage, salut. Comme puis nagueres, à la requeste et instance du procureur du Roy audit bailliage, eussent esté convenuz et approchez par devant nous, les gardes, jurez et maistres de tous les mestiers de la dicte ville, affin de monstrer et faire apparoir des statuz, reigles et ordonnances qui autresfois auroient esté faictes et baillées à chascun des dictz mestiers, pour estre veuz par le dit procureur, sçavoir et congnoistre si les dictz maistres se reiglent et gouvernent bien et deuement, jouxte leurs dictes ordonnances, et s"ilz y commettent poinct aucuns abbuz ou malversations pour en faire la pugnition et correction selon droict et justice, sur lequel approuchement et convocation les aucuns des dictz maistres auroient declairé avoir ordonnance en forme, les autres dict qu'ilz n'avoient que les coppies en papier, et les autres auroient dict que leurs dictes ordonnances estoient produittes en la cour de parlement à Rouen ou ailleurs, à la desduction de certains procès qui se seroient meuz et suscitez pour raison des droictz et previlleges contenuz es dictes ordonnances, dont leur auroit esté ordonné produire ce qu''ilz avoient par devers eulx, au greffe, pour estre veu par le dit procureur, recours à l'acte de nous donné, datte du vingt et ungiesme jour d'octobre, dernier passé, et soit ainsi que pour fournir au dit appoinctement , Denis le Villain, Guillaume Gasteau, Guillaume Rubert, Robin Bradechal, Nicolas de Sauveaumare, Guillaume Bradechal, Anthoine de Sauveaumare, Robert Mauvoisin, Olivier Dupuis, Jehan le Veau, Jehan de Naynville, Pierre le Lanternier , Pernot Fleschemer, Laurens Routier, Laurens Degenestais, tous maistres jurez du mestier et estât de mercier, cyrier, espicier et chandcUier en la dicte ville et chastellenie de Gisors, auroient comparu devant nous, dict et remonstré que par fortune de feu, mallegardc ou autrement, les ordonnances du dit mestier

qui leur auroient esté baillées, auroient esté perdues ou tellement adirées que impossible leur estoit les recouvrer, toutesfois en avoient trouvé et recouvert une coppie en papier dont et de laquelle la teneur s'ensuict.

A tous ceulx qui ces présentes lettres verront ou orront, Pierre le Lanter- NiER, escuier, lieutenant gênera! de noble homme François duTiercknt, escuier d'escurie et conseillier du Roy, nostre seigneur, son bailly, et cappitaine de Gisnrs, et des anceans ressortz dudit bailliage, salut. Comme nagueres, plusieurs des maistres et ouvriers du mestier de chandellerie, cyrerie, mercerie et espicerie en la ville et chastellenie de Gisors, feussent venuz devers nous, c'est assavoir: Robin Rouvray, Jehan le Villain, Guillaume James, Guillaume le Veau, Robin Hourdel, Guillaume Brad.xhat, Jehan Dupuis, Jehannet James, Petit- Jehan Mauvoisin et Masiot le Villain, en nous requerans que pour le bien de la chose publicque et l'utilité du bien commun, il nous pleust leur bailler ordonnances sur leur dict mestier pour le proffict du commun des gens usans et eux entremettans d'icelluy mestier, sur quoy nous eussent baillez aucunes articles touchant le dit mestier, et nous on requis que voulsissions veoir iceulx articles et délibérer avec gens à ce recongnoissans, pour iceulx articles acroistre ou diminuer à nostre plaisir, ainsi que verrions estre à faire et qu'il appartiendroit par raison ; sçavoir faisons, que, après ce que nous et le substitud [du] procureur du Roy, nostre seigneur, en la dicte ville et chastellenie de Gisors , et plusieurs autres notables personnes, après avoir veu à grande et meure délibération les dictz articles, nous inclinans à leur dicte requeste. vouUans et desirans le dit mestier estre doresnavant gouverné par bonne police, régime et ordonnance, principallement au bien de la chose publicque et du dit mestier, avons mis correction et augmentation sur les dictz articles, et les aucuns augmentez et les autres diminuez ; après lesquelles choses faictes, les avons baillées aus dictz maistres de chandellerie et cirerie qui les ont veues et rapportées devers nous, requerans très instamment que à leur dict mestier, nous voulsissions construire ordonnances selon les dictz articles ; oye laquelle requeste, par l'adviz et délibération du dit substitud [du] procureur du Roy, nos.re dit seigneur, et autres notables personnes gens de justice, avons construict ordonnances et siatuz ou dit mestier, pour d'iceulx joyr et user au temps advenir, selon les dictz articles desquels la teneur ensuict.

Premièrement,

Chascun des dictz maistres et ouvriers du dit mestier pourra vendre toutes manières d'espicerie et mercerie, bonnes et loyalles, et faire toutes ouvrages de cire et chandelle de suif, lesquelles denrées et ouvrages de cire et suif seront visitées par les jurez et gardes du dit mestier, lesquelz jurez et gardes seront

reno ivellez chascun an devant mon dit seigneur le bailly ou son lieutenant, dont des dictz gardes en aura ung des bourgois de la ville et deux des maistres du dit mestier, et seront tenuz les dictz maistres d'icelluy mestier faire la chandelle de suif bonne et loyalle, sans y mettre aucun suif de trippes ou de mesguissier, aucun flambel de paticier ou rotissier, ne autre suif corrompu , ne seine de porc ou d'autre beurre, ne autre gresse tendre, mais sera la dicte chandelle aussi bonne dedens comme dehors, sans aucunement estre fardée, sur peine à ceulx qui en ce seront trouvez deffaillans en leur chandelle autrement faicte que cy dessus est declairé, icelle prinse par les dictz jurez et gardes du dit mestier, et apportée vers justice pour estre condempnée forfaicte; et le maistre qui en sera trouvé saisi, estre mis et tauxé en amende de vingt solz parisis, à applicquer moittié au Roy, nostre seigneur, et Tautre moittié aus dictz jurez et maistres du dit mestier, tant pour les affaires d'icelluy mestier que autres choses ordonnez et establiz par les dictz jurez et maistres, ainsi que cy après sera declairé et qu'ilz verront bien estre.

Item, chascun maistre et ouvrier du dit mestier sera tenu mettre à la chandelle du poix de douze à la livre, à simple mesche, trois filz de cotton avec le fil de linge ; et à la chandelle du poix de seize et vingt à la livre, deux filz de cotton; et à celle de vingt quatre à la livre, ung fil de cotton seullement; et mesmes à la chandelle à deux mesches, à l'eq-iipollent et nombre de fil de cotton des espèces delà chandelle cy dessus declairée, laquelle chandelle sera à fil de Linge avec le dit fil de cotton blanchy et nect de haresches et de toutes autres ordures; et la chandelle que l'on trouvera autrement faicte, comme cy dessus est dict, sera condempnée forfaicte, et le dit maistre qui en sera trouvé saisi, mis et tauxé en amende de vingt solz parisis à applicquer comme dessus.

Item, nul des dictz maistres ne pourra poiser chandelle ne autre marchandise du dit mestier n'est en ballances allant et venant et qu'il s'en reviengne parmy la langue du fust et poix ensemble, selon raison qu'il peult et doibt suffire de livrer la marchandise parmy le dit fust et que c'est le plus loyal en toutes choses, et pourront et seront tenuz les dictz jurez visiter toutes les manières de poix et ballances, et aussi toutes mesures là où l'on mesure gresses, et celhiy ou ceulx qui seront trouvez en faulte en poix de ballances ou mesures, pour la première fois, la pièce ou mesure faulse sera forfaicte. et si le maistre qui en sera trouvé saisi mis et tauxé en amende de vingt solz parisis, et pour la seconde fois mis et tauxé en amende de soixante solz parisis à applicquer le tout comme dessus.

Item, se aulcun de la ville ou bourgaige de la ville de Gisors avoit faici faire de la chandelle à aucun des dictz maistres pour son estorement, et il estoit trouvé vendant la dicte chandelle, ou prouvé contre luy qu'il en eust vendu,

pour chascune fois qu'il en aura vendu ou qu'il sera prouvé contre luy, il sera mis et taxé en amende de semblable somme de vingt solz parisis pour chascune fois, à applicquer comme dessus.

Item, si aucun maistre d'icelluy mestier alloit de vie à trespas ainçois que sa femme, et la dicte femme avoit aucuns enffans masles de son dit mary, elle pourra faire le dit mestier et avoir ung maistre varlet pour apprendre à ses dictz enffans, tant comme elle tiendra Testât de veufage, et quant les dictz enffans seront aagez et suffisans et qu'ilz vouldront faire chef d'œuvre, ilz y seront reçeuz et ne doibveront que demy vin, mais seront tenuz faire plain chef d'œuvre.

Item, nul maistre d''icelluy mestier ne pourra avoir que ung aprentilz à la fois, lequel aprentiz sera tenu servir son dit maistre l'espace de trois ans acompliz, excepté que au cas que le dit maistre pour estre entretenu de serviteur de son dit mestier, s'il veoit que bon soit, pourra prendre et louer ung autre nouvel aprentiz sur la dernière année du dit premier aprentissage, lequel nouvel aprentiz, comme dit est, sera par semblable tenu servir son dit maistre par l'espace de trois ans tous acompliz, et paiera chascun aprentiz aux jurez et maistres du dit mestier, pour le vin d'entrée, vingt quatre solz parisis, moittié d'iceulx pour le vinage du dit mestier, et l'autre moittié à la délibération et volunté des dictz jurez et maistres; et ne commencera le temps du service du dit aprentiz jusques ad ce qu'il ait paie ausdictz Jurez et maistres les dictz vingt quatre solz parisis, et faict le serment en tel cas acoustumé, comme est de garder et entretenir bien et deuement ces ordonnances selon leur forme et teneur.

Item, nul des dictz aprentiz ou filz de maistre ne pourra faire aucunes opérations de cire, chandelle ne autres choses touchant le faict du dit mestier, jusques ad ce qu'il ait servy au dit mestier l'espace des dictz trois ans acompliz et reçeu lettre d'aprentissage de son dit maistre, et qu'il ait en oultre faict le chef d'œuvre, paie et acomply les solennitez du dit mestier, jouxte les dictes ordonnances, et avec ce, qu'il ait esté rapporté ouvrier suffisant devant mon dit seigneur le bailly ou son lieutenant, par les jurez et gardes d'icelluy mestier et par le maistre qui luy aura aprins, s'il est vivant ; et faict le serment de garder ses dictes ordonnances, comme dit est, comme l'un des dictz maistres, sur peine de cent solz parisis d'amende, à applicquer comme dessus.

Item, nul marchant de dehors ne autre personne ne pourra vendre en gros ne en détail chandelle de suif, ne ouvrage de cire en quelque manière que ce soit en la dicte ville et bourgaige de Gisors, fors le jour de marché qui est le lundi seullement, sur peine de vingt solz parisis d'amende pour chascune fois qu'ilz seront trouvez defaillans, à applicquer comme dessus.

Item, le dit jour de lundi, qui est le jour de marché de Gisors, pourront tous marchans de dehors et autres venir vendre audit Gisors la dicte marchan' dise, pourveu qu'elle soit bonne et loyalle et marchande, après ce qu'elle aura esté veue et visitée par les jurez et gardes du dit mestier, tant la dicte marchandise que le poix et ballancés, laquelle marchandise les dictz marchans de dehors ne pourront exposer en vendue, que jusques ad ce qu'elle ait esté veue et visitée par les dictz jurez et gardes d'icelluy mestier, et qu'ilz aient congié d'iceulx vendre, sur peine de vingt solz parisis d'amende à applicquer comme dessus.

Item, chascun des maistres d'icelluy mestier aura ung merc dont il sera tenu mercher l'ouvrage, tant en cierges que en torches, et ne les laissera partir de son hostel, jusques ad ce que à icelles son dit merc soit exposé et empraint, sur peine de cinq solz parisis d'amende; et se ainsi advenoit que aucuns des dictz maistres eussent faict de sa cire aucun cierge, torche ou autre ouvrage de cire, pour vendre, et la dicte cire n'estoit bonne ou qu'elle ne fust propre, mais eschaudée, ou qu'elle se fust prinse à la table, la dicte ouvrage sera forfaicte et le dit maistre mis en amende, par chascune fois qu'il y commettra faulte, de vingt solz parisis d'amende à applicquer comme dessus.

Item, s'aucun des dictz maistres avoit en son hostel ung serviteur qu'il ne fust poinct aprentiz du dit mestier et il estoit trouvé que par le commandement de son dit maistre ou maistresse, il allast faire ou fist de la chandelle ou autre ouvrage du dit mestier, ou qu'il entrast à l'eschoppe du maistre pour y assister et y faire comme aprentiz, l'amendera, pour chascune fois, de dix solz parisis ; et si le dit serviteur faisoit oultre le commandement de son dit maistre ou sa maistresse, et que de ce il a esté par eulx adverty, il l'amendera, par chascune fois, de dix solz parisis à applicquer comme dessus.

Item, que ung chascun tilz de maistre ou aprentiz du dit mestier qui aura servy le temps cy dessus declairé et faict les solennitez dessus dictes, voullant acquérir la maistrise du dit mestier et estre rapporté ouvrier suffisant par les maistres et jurez d'icelluy mestier, par devant mon dit seigneur le bailly ou son lieutenant, sera tenu principallement faire chef d'œuvre à ce requis et acoustumé et en la manière cy après declairée.

C'est assavoir : pour le chef d'œuvre du mestier de la cire, le dit filz de maistre ou aprentiz sera tenu faire ung cierge de cire [du] pesant de six livres, une torche à baston du pesant de quatre livres et une autre torche sans baston du pesant de deux livres à quatre bras et cordons, laquelle il sera tenu faire sans frotoir, mais sera fondue au feu comme bougée, et s'il advenoit que d'icelle torche de deux livres, l'un des dictz bras tint à l'un des autres ou

se cassast aucunement en icelluy faisant, ou que l'on y trouvast aucunes faultes qui demourront à la congnoissance et discrétion des dictz maistres, icelluy sera renvoie aprendre jusques ad ce qu'il soit trouvé et rapporté ouvrier suffisant ; et le dit ouvrage, ainsi par luy commencé ou faict, sera et demourra es mains des dictz jurez et maistres, pour en faire et disposer ainsi qu'ilz verront bon estre.

Item, pour le chef d'œuvre du mestier de chandellerie de suif, le dit filz de maistre ou aprentiz sera tenu faire deux broches de chandelle à une mesche, du nombre de quatorze chandelles pour livre ; deux autres broches de chandelle à une mesche, du nombre de vingt chandelles pour livre; deux autres broches de chandelle du nombre de vingt quatre pour livre; deux autres broches de chandelle à deux mesches, du nombre de douze chandelles pour livre; et deux autres broches de chandelle courte, d'estude, mesche de cotton seullement sans fil de linge, du nombre de seize chandelles pour livre ; laquelle chandelle ainsi spetiffiée et declairée, il sera tenu faire au Juste, comme ung ouvrier doibt faire, et de la mesche de la sorte et du nombre pour livre de la dicte chandelle, comme dessus est dict, icelle exiber et monstrer aus dictz jurez et maistres du dit mestier, ainçois qu'il la mette en œuvre pour sçavoir si elle est bonne, loyalle et de sorte; laquelle, si ainsi n'estoit, demourra es mains des dictz jurez et maistres pour en disposer comme dit est ; et icelluy tilz de maistre ou aprentiz sera renvoie aprendre comme dessus.

Lesquelz chefz d'œuvres dessus declairez, tant de cire comme de chandelle, après qu'ilz auront esté faictz et deuement acompliz par le dit filz de maistre ou aprentiz, ainsi que dessus est dict, et qu'il aura esté rapporté ouvrier suffisant par les dictz jurez et maistres, il sera tenu laisser iceulx chef d'œuvres es mains des dictz jurez et maistres, pour iceulx estre convertiz à faire deux torches que l'on appellera les torches du mestier de chandellerie et cirerie, qui seront délaissez à l'église pour servir aux jours et festes solennelles, et par espetial aux premières et secondes vespres du jour de la benoicte dame martire, madame sainte Barbe.

Item, sera tenu le dit filz de maistre ou aprentiz paier et mettre es mains des dictz jurez et maistres, la somme de trente deux solz parisis, pour iceulx estre convertiz à l'encommenchement et augmentation de la confrarie et charité de la benoicte dame et martire, madame saincte Barbe, fondée ou espérée fonder par les maistres jurez du dit mestier, en l'église sainct Gervais et Prothais du dit Gisors, ou autre service divin en icelle église, ainsi qu'il sera par entre eulx advisé estre faict, et mesmes aucune partie ou portion des amendes dessus declairez, et qui appartiendront aus dictz jurez et maistres du dit mestier à leur délibération et bon plaisir.

Item, sera tenu le dit filz de maistre, ou aprentiz, faire ung disner à tous les maistres et jurez du dit mestier, lesquelz jurez et maistres seront tenuz appeller le juge et greffier devant lesquels le rapport et passé maistre sera faict pour le jour, ensemble les advocat et procureur du Roy, nostre seigneur, s'ilz sont en la ville du dit Gisors.

De laquelle ordonnance garder et entretenir pour le temps advenir, les dictz maistres ouvriers jurez du dit mestier cy dessus nommez, tant pour eulx que pour leurs successeurs, promisdrent et s^obligèrent sans aucunement Tenfraindre, et en feirent le serment en tel cas requis et acoustumé, le tout sur les peines et amendes declairées es articles dessus transcriptes ; lesquelles peines et amendes, nous, dès maintenant, ores et pour le temps advenir, avons dictes et disons estre cueillies et levées, et les transgresseurs et infracteurs d'icelles, estre pugniz et corrigez, selon la teneur des dictz articles, et pour chascune fois qu'ilz escherront es dictes peines et amendes ; laquelle ordonnance mon dit seigneur le bailly ou son lieutenant et ses successeurs pourront acroistre ou diminuer, modérer ou du tout oster, si mestier est, ainsi que justice verra bon estre. Si donnons en mandement à tous les maistres et ouvriers dudit mestier, presens et advenir, que ses dictes ordonnances ilz tiennent et gardent sans enfraindre ; mandons en oultre à tous les sergens ou soubz sergens du dit bailliage, et au premier sur ce requis, que ses dictes ordonnances il face garder et entretenir, ainsi que dit est.

En tesmoing desquelles choses, nous, lieutenant dessus nommé, avons mis à ces présentes nostre signe dont nous usons oudit office, et signées de nostre seing manuel icy mis, le dix huictiesme jour de novembre, mil quatre cens soixante et seize, ainsi signé: le Lanternier, ung paraphe.

Aces causes auront requis iceulx maistres du dit mestier les dictes ordonnances estre refaictes sur les articles dessus transcriptes, et icelles estre augmentées, diminuées ou corrigées et en faire par justice, selon et ainsi qu'il appartiendra, affin que à l'advenir, les dictz maistres et leurs successeurs se puissent mieulx reigler et gouverner selon icelles ordonnances, comme ilz ont faict par cy devant et font encores de présent, sans nul contredict.

Savoir faisons, que, aujourd'uy dix huictiesme jour de novembre l'an de grâce mil cinq cens trente huict, les assizes du dit lieu de Gisors séantes et par nous tenues, lieutenant gênerai dessus nommé, comparurent personnellement, les dessus dictz maistres du dit estât de mercier, cirier, espicier et chandellier, lesquelz ont recongnu les choses dessus dictes véritables et juré et affermé

solennellement qu'ilz ne scavaient ou estoient les dictes ordonnances en forme et ne les pourroient recouvrer, et oultre que les articles contenues en la dicte coppie dessus transcripte estoient raisonnables, tant pour ledit estât et mestier, que pourle bien et proffict de la chose publicque, et de tout temps et d'anceanneté en avoient ainsi joy et usé paisiblement et pacifficquement, requerans ordonnances leur estre baillées soit par confirmation et revalidation des primitives ou par rénovation, lesquelles ilz promettent et ont promis tenir, garder et observer à tousjours sans les enfraindre, sur les peines d'amende au cas appartenant.

A ces causes, après avoir veu et diligemment entendu les poinctz et articles dessus transcriptz, et les requestes, raisons et affirmations des dictz maistrcs du dit estât et mestier, et le tout délibéré aux officiers du Roy, nostre seigneur, en ce bailliage, soubzsignez, et autres notables conseulx, mesmes aux gouverneurs et procureur de la dicte ville de Gisors, par Tadviz desquelz eu esgard aux choses dessus dictes, et que de tout temps et anceannetc à l'office de mon dit seigneur le bailly compette et appartient pourveoir, mettre, ordonner, constituer et establir ordonnances bonnes et loyalles, au faict, police et gouvernement de tous les mestiers et autres choses neccessaires en Testât de marchandise pour le bien et utilité commun et de la chose publicque, nous avons dict, ordonné, conclud et appointté, disons, ordonnons, concluons et appointtons que les dictz maistres du dit mestier de mercier, cirier, espicier et chandellier de ceste dicte ville et faulxbourgs et leurs successeurs, fairont, entretiendront et garderont, ores et pour le temps advenir, les articles et ordonnances dessus transcriptes. Jouxte leurs formes et teneurs, sans en riens y contrevenir et en tant que mestier est, les avons revallidez et confermez, revallidons et confermons, sauf et à la réservation de les augmenter, diminuer ou du tout oster par cy après, si Justice veoit que bon soit; mandons à tous les sergens du dit bailliage et à chascun d'eulx, premier sur ce requis, icelles ordonnances faire garder et entretenir.

Donné au dit Gisors, les assizes séantes et par nous tenues, Tan et Jour dessus dictz, ainsi signé: Michel le Blanc, le Peletier avec trois paraphes, et seellées de cire verte, sur double queue.

Collation est faicte sur les dictes ordonnances rendues à Guillaume Bradechart et Guillaume Gasteau, gardes et jurez dudit mestier de mercyer, pour Tannée présente, au greffe du bailliage de Gisors, et par nous soubzsignez, le lundy dix septiesme jour de novembre, mil cinq cens trente neuf.

FicHET (avec paraphe).

TEMPNEURS

(4 Mars 144g)

A tous ceulx qui ces lettres verront ou orront, Guillaume du Fay, escuier, lieutenant gênerai de noble homme messire Jehan de Bressay, chevalier, seigneur de la Chutardière, de Corboen et de Mindray, conseillier, chambellain du Roy, nostre seigneur, et son bailly de Gisors et des anceans ressortz d'icelluy bailliage, salut. Comme de tout temps à l'office de mon dit seigneur le bailly, compette et appartient pourveoir, mettre, ordonner, constituer et establir ordonnancés bonnes et loyalles au faict et police de tous les mestiers et autres choses neccessaires pour le faict de marchandise, et sur le faict et gouvernement de la police du bien et de la chose publicque, et par espetial en la ville et chastellenie de Gisors, entre lesquelles choses nous avons regardé, conclud et délibéré [ce] qui estoit bon à faire au regard du mestier de tennerie au dit Gisors, et faict mettre par escript la forme, manière et estât de leur gouvernement, savoir faisons que, aujourduy quatriesme jour de mars, l'an de grâce mil quatre cens quarante neuf, les assizes du dit lieu seans par nous illec tenuz, nous, pour les causes dessus dictes, avons en la présence et pjr Toppinion des conseil et substitud du procureur du Roy, nostre dit seigneur, ou dit bailliage, et autres notables personnes, les gens du dit mestier pour ce appeliez et dont les noms ensuivent, c'est assavoir :

Et premièrement,

Nul ne pourra estre tenneur en la dicte ville s'il n'est filz de maistre, ou s'il n'a esté aprentiz cinq ans du moins au dit mestier, par quoy il sache faire bonne œuvre et loyal.

Item, que tel fîlz de maistre ou aprentiz ne autre personne quelconque ne pourront avoir ne tenir le dit mestier au dit Gisors, ne user de franchises et previllèges par estranges tenneurs et ouvriers, se ilz ne sont residens et demourans en la dicte ville, et se ilz ne le font faire à leurs propres lieux et hostelz pour les faultes et mauvaises œuvres qui y pcvent estre faictes.

Item, et quant aulcun voulJra lever le dit mestier sera trouvé par les

maistres suffisant, il sera tenu faire serment par devant la justice qu'il fera ou fera faire à son povoir bonne œuvre et loyalle, et gardera les ordonnances d'icelluy mestier de poinct en poinct, et le proffict du commun peuple sans y souffrir, consentir, ne commettre fraulde, chose qui soit contre les dictes ordonnances, et s'il vient à sa congnoissance que aucun face le contraire, il le fera sçavoir ausdictz maistres et jurez.

Item, et que chascun tenneur puisse avoir ung aprentiz seullement, toutes voies par tel temps et pris comme le maistre et aprentiz seront d'accord, sauf que ce ne soit pas à moins de cinq ans, et les cinq ans finiz, l'aprentiz s'en pourra départir et devenir maistre en la manière dessus declairée et non autrement.

Item, et que en la dicte ville de Gisors ait deux preudes hommes jurez du dit mestier de tennerie, pour regarder à visiter toute manière de cuir tenné, pour sçavoir qu'il soit bon et loyal, bien et suffisamment tenné, avant qu'il soit mis en vente, et se par eulx est trouvé bon et loyal, qu'il soit signé du seing sur ce ordonné par justice, et s'il n'est suffisamment tenné, qu'il soit arrière remis en tan, jusques ad ce qu'il soit bien tenné ; et que nul de la dicte ville ne soit si hardi de vendre ne porter en foire, ne en marché, aucun cuir tenné plus tost qu'il soit veu et visité et signé du seing comme dit est ; et s'il y a aucun d'eulx faisans le contraire, ilz en seront pugniz par amende dont le Roy aura les deux parts et les gardes et jurez du dit mestier auront le tiers ; et ou cas où le cuir sera trouvé sec et qu'il ne pourra estre amendé, il sera ars et l'amendera de la valleur du cuir, moittié à justice et moittié aus dictz jurez ; et se celluy qui aura esté ainsi reprins est coustumier d'ainsi faire, il l'amendera de amende arbitraire ; et au regard de la vendue des cuirs en gros à marchans de dehors, iceulx maistres le pourront faire ains que la Visitation, mais ne pourront riens livrer sans premier estre la derrée visitée par les jurez et gardes du dit mestier.

Item, et que s'aucuns apportent derrée de cuir tenné en la dicte ville, soit à foire, marché ou autrement, qu'ilz n'ayent esté signez ou visitez comme dit est, que ceulx qui les auront apportez ne soient si hardiz de les mettre ne exposer en vente, jusques ad ce qu'ilz aient esté veuz et visitez par les maistres et jurez de la dicte ville, sur les peines devant dictes; et ou cas où le cuir sera trouvé vert et mal tenné, il l'amendera et sera remis au tan ; et s'il est sec et tel qu'il ne puisse estre amendé, il sera ars et l'amendera comme dessus.

Item, et pour ce que aucuns maistres et ouvriers du dit mestier se sont entremis à tenner en sablon, qui est contre le bien publicque et les anciennes ordonnances, deffendu est que plus n'en usent, sur peine d'amende arbitraire.

Iiem, que nulz ne vendront ne exposeront en vente cuirs tennez jusques à ce qu'ilz aient osté le tan d'entour les dictz cuirs, sur peine de douze deniers parisis d'amende pour chascun cuir qui sera ainsi trouvé, car le tan n'y profficte poinct, depuis que le tan est levé hors de la fosse, et si en seroient deçeuz ceulx qui Tachetteroient.

Item, s"il est trouvé que aucun cuir vert ou moullé et que les maistres et jurez le tesmoingnent mal tenné, celluy qui l'aura exposé en vente l'amendera de dix solz, dont les six seront à justice et les quatre solz aus dictz maistres et jurez pour la garde du dit mestier ; et, dès lors, sera le dit cuyr signé par les dictz jurez et livré à celluy à qui il sera, pour remettre en tan, et fera serment que jamais ne l'exposera en vente jusques ad ce qu'il soit suffisamment tenné; et s'il peult estre sceu qui le vende sans retenner, icelluy cuvr sera forfaict et acquis à justice, et si l'amendera de dix solz comme dit est, et s'il est coustumier de commettre souvent telle faulte, il en sera pugny par arbitration de justice selon le delict; et se le cuir est sec et qu'il ne puisse estre amendé, il sera ars et l'amendera d'autant que de cuir moullé.

Item, et pour ce que les bouchers de la dicte ville, leurs varletz et autres marchans qui achettent cuir à poil, sont coustumiers de les mouller et abreuver à l'eaue pour les faire plus gros et semblé estre meilleur pour le vendre plus cher, deffendu est que doresnavant ilz ne le moullent ni abreuvent, ne façent mouller ne abreuver, car c'est fraulde et mauvaistre et en est pire et plus cher vendu au préjudice du commun peuple; et quiconque le moullera ou fera mouller ou abreuver ainçois qu'il vienne à la main du tenneur et il peult venir à congnoissance, il en rendra le dommage au tenneur et l'amendera de la moittié de cuir dont les deux partz de l'amende seront à justice et le tiers aus dictz maistres et jurez en la manière dessus dicte ; et s'aucun est coustumier de ce faire et que autresfois en est esté repris, il sera pugny par justice d'amende arbitraire ; et s'aucun tenneur a achetté telz cuirs abrevez ou qui les tiouve, il est et sera tenu par serment sans faveur de le faire sçavoir aus dictz maistres et jurez, et de le monstrer le cuir s'il est tel, et s'il ne le faict et il est aitainct, il l'amendera de semblable amende et peine comme le dit vendeur.

En tesmoing de ce, nous, lieutenant gênerai dessus nommé, avons mis à ces présentes nostre seel dont nous usons oudit office, avec nostre seing manuel ; et pour greigneur confirmation, en l'absence du grant seel aux causes du dit bailliage, avons faict mettre cil aux obligations de la chastellenie du dit Gisors.

Ce fut faict les an, jour et assizes dessus dictz, ainsi signé : dd F.w, ung paraphe.

Item, appert par une atache donnée de Pierre le Lanternier, lieutenant de noble homme François de Tiercent, escuier d'escuirie, conseillier et chambellain du Roy nostre seigneur, et son bailly et cappitaine de Gisors, atachée es dictes ordonnances, dattée du quinziesme jour de mars quatre cens soixante quatorze, comme entre autres choses est dict : que aucun maistre qui prendra aprentiz ne le tiendra en sa maison que quinze jours, sans qu'il admaine à justice faire le serment de bien et loyallement servir son dit maistre, garder les ordonnances du mestier, et aussi le dit maistre de bien et loyallement aprendre son dit mestier de tenncur au dit aprentiz, sur peine d'amende.

Item, coppie, par autre atache donnée de Robert du Vieu, lieutenant gênerai de noble et puissant seigneur monseigneur Jehan de la Viefzville, chevalier, seigneur de Vestrehen, Harincoiirt , Adveny et Danmesnil , conseillier et chambellain du Roy, nostre seigneur, et son bailly et cappitaine de Gisors, le penultime jour d'aoust l'an mil cinq cens et sept, atache es dictes ordonnances, comme entre autres choses^ de l'accord et consentement des advocat, procureur du Roy et autres notables bourgois du dit Gisors, des maistres et ouvriers du dit mestier de tenneur, augmentation a esté faicte es dictes ordonnances, c'est assavoir : que tout aprentiz alloué pour aprendre le dit mestier, à son entrée sera tenu et subgect paier la somme de quarante solz parisis, et quant il sera passé maistre, la somme de cent solz parisis, à applicquer les dictes sommes, c'est assavoir : la moittié à la confrarie de monseigneur sainct Claude, qui est la confrarie du dit mestier, et l'autre moittié aux jurez et gardes du dit mestier.

Item, les jurez et gardes du dit inestier qui feront la visitation des cuirs admenez de dehors en la ville de Gisors, non tennez, auront pour leur visitation vingt six deniers parisis, pourveu qu'il y en ait jusques à une douzaine du moins ; et s'il y en a jusques à une douzaine, il auront deux deniers parisis pour pièce, que paieront les marchans qui exposeront en vendue les dictz cuirs, lesquelz deniers des dictes visitations seront applicquez au proffict de la dicte confrarie.

Item, tous les deniers des amendes en quoy les maistres, ouvriers et marchans du dit mestier pevent et pourroient encourir en transgressant les dictes ordonnances, par lesquelles estoit mis que la moittié des dictes amendes au Roy et l'autre moittié aux gardes et maistres du dit mestier ; icelle moittié qui revenoit aus dictz gardes et maistre pour le temps advenir, sera et reviendra au profhct de la dicte confrarie pour convertir au bien et entretenement d'icelle.

Item, et pour le temps advenir, il est prohibé et deffendu à tous qu'ilz ne baillent ne mettent es mains des courayeurs aucuns cuirs pour courayer, ne autrement, qu'ilz n'ayent esté visitez et merchez du mercq de la dicte ville, sur

peine à ceulx qui seront trouvez faisans le contraire, de douze deniers parisis d'amende, pour chascun cuyr. à applicquer moittié au Roy, nostre dit seigneur, et Tautre moittié à la dicte confrarie ; et s'aucuns estoient trouvez coustumiers de ce faire, ilz l'amenderont à l'ordonnance de justice, promettans les dictz Jurez et gardes du dit meslier, pour eulx et ceulx qui après euls seront maistres du dit mestier en la dicte ville de Gisors , le contenu en ces présentes tenir et fermement acomplir jouxte ce que dit est, et laquelle atache estoit et est signée du dit DU ViEU et maistre Jehan le Peletier, procureur du Roy, nostre seigneur, ou bailliage du dit Gisors, et maistre Jehan le Moyne, substitud de l'advocat du dit seigneur.