THIBAULT DE TERMES

De trois à quatre mille sont

Leans, je l'ose très bien dire, Des plus vaillans et des plus prous Que on pourroit dire n'escripre.

A peine les pourrez destruire Que vostre oust ne soit diffamé, Et sont gens pour nous desconfire; De leur povoir suis informé.

DENIS DE CHAILLI.

A très grant peine les aurez.

Dame, je le vous certiffie;

Mès ainçois vous pourront grever

Et voz gens par artillerie.

Il ont leans grant seigneurie.

Tous gens de lait, gens de puissance,

Que pour morir ne souffront mie

Perdre la place en leur presance.

CANEDE.

Je n'y voy nulle espérance Que le bouloart vous ayez, Que il ont trop belle deffence Pour tout vostre oust contraryer.

Y sont leans fortiffiez De pouldres et artillerie, Que à grant peine les aurez.

Et croy que ne les aurez mie.

VILLARS

Je scay bien Glasidas y est, Fouquamberge et autres seigneurs, Qui ont fait leans grant aprest

Pour tenir et porter tous heurs.

Et se tiennent leans bien sceurs

Que nul ne les pourroit avoir,

Et vous en peut venir doleurs

Par quoy vostre oust s'en peut doloir.